ទីក្រុងប៉ារីស ៖ ប្រទេសបារាំងបានចោទប្រកាន់កងកម្លាំងឆ្មាំបដិវត្តន៍អ៊ីស្លាមអ៊ីរ៉ង់ថា ជាអ្នកនៅពីក្រោយការវាយប្រហារតាមប្រព័ន្ធអ៊ីនធឺណែត (Cyberattack) ដើម្បីលួចចូលប្រព័ន្ធបញ្ជាទូទឹកកក និងទូបង្កក នៅក្នុងផ្សារទំនើបប្រហែល ៧០០ កន្លែង នៅទូទាំងប្រទេសបារាំង កាលពីខែមុន បង្កការខូចខាតយ៉ាងធ្ងន់ធ្ងរ។ នេះបើតាមប្រភពពី BBC បានចេញផ្សាយនៅថ្ងៃទី១០ ខែវិច្ឆិកា។
ការវាយប្រហារនេះ ក្រុម ហែកឃើ (Hacker) បានដំឡើងសីតុណ្ហភាពក្នុងទូទឹកកក និងទូបង្កកខ្ពស់ខ្លាំងរហូតដល់ ៥០ អង្សាសេ ធ្វើឱ្យខូចខាតទំនិញ និងអាហារកក និងស្រស់ជាច្រើនតោន ហើយថែមទាំងបណ្តាលឱ្យឧបករណ៍មួយចំនួនឆេះទៀតផង។
រដ្ឋមន្ត្រីការបរទេសបារាំង លោក Jean-Noël Barrot កាលពីថ្ងៃទី៩ វិច្ឆិកា បានចាត់ទុកសកម្មភាពនេះថា ការវាយប្រហារបំផ្លិចបំផ្លាញដោយចេតនាដ៏ធ្ងន់ធ្ងរដល់ផលប្រយោជន៍ជាតិជាប្រវត្តិសាស្ត្រ។ បារាំងបានកោះហៅឯកអគ្គរដ្ឋទូតអ៊ីរ៉ង់មកជួប ដើម្បីតវ៉ាយ៉ាងខ្លាំងក្លា ចំពោះទង្វើដ៏ធ្ងន់ធ្ងរជាទីបំផុតនេះ។
ព្រះរាជអាជ្ញាទីក្រុងប៉ារីសប្រកាសថា ការស៊ើបអង្កេតមួយត្រូវបានបើកដំណើរការប្រឆាំងប្រធានអង្គភាពវាយប្រហារតាមអ៊ីនធឺណិតមួយឈ្មោះ Shahid Kaveh ដែលមានទំនាក់ទំនងជាមួយកងឆ្មាំបដិវត្តន៍អ៊ីស្លាមអ៊ីរ៉ង់ ព្រមទាំងអនុប្រធាន២រូបផងដែរ។ ព្រះរាជអាជ្ញារកឃើញការប្រើប្រាស់ភាសាបើ Farsi និងកូដអាស័យដ្ឋាន (IP) ដែលជាប់ពាក់ព័ន្ធទៅកាន់ប្រទេសអ៊ីរ៉ង់។
ប្រទេសអ៊ីរ៉ង់មិនទាន់មានការឆ្លើយតបផ្លូវការនៅឡើយទេ ចំពោះការចោទប្រកាន់នេះ ប៉ុន្តែប្រព័ន្ធផ្សព្វផ្សាយអ៊ីរ៉ង់មួយចំនួនបានទាត់ចោលការចោទប្រកាន់ទាំងនេះថាជារឿងគ្មានមូលដ្ឋាន។
ទោះយ៉ាងណាក៏ដោយ ប្រទេសបារាំងមិនមែនជាជនរងគ្រោះតែឯងនោះទេ ជាក់ស្តែង កាលពីដើមខែនេះ ការវាយប្រហារដូចគ្នាជាលើកទីពីរបានកើតឡើង នៅហាង និងផ្សារទំនើបជាង ១០០ កន្លែងក្នុងបណ្តាប្រទេសនៅអឺរ៉ុប រួមមានបែលហ្ស៊ិក លុចសំបួររងផលប៉ះពាល់ខ្លាំង ខណៈហាងចំនួនតិចតួចក្នុងប្រទេសស៊ុយអែត អៀរឡង់ ហូឡង់ អេស្តូនី និងហ្វាំងឡង់ ក៏ត្រូវបានវាយប្រហារផងដែរ៕
ចែករំលែកព័តមាននេះ