ប្រទេសចិន ៖ ហេតុការណ៍ដ៏ភ្ញាក់ផ្អើលមួយបានបង្កឱ្យមានភាពចលាចលយ៉ាងខ្លាំង នៅក្នុងប្រទេសចិន បន្ទាប់ពីបុរសម្នាក់បានបើកអេស្កាវ៉ាទ័រ (គ្រឿងចក្រកាយដី) សម្រុកចូលទៅក្នុងបរិវេណការិយាល័យរដ្ឋាភិបាលមួយកន្លែង ស្ថិតនៅក្នុងខេត្តសានស៊ី (Shaanxi) ដោយបានគាស់កាយបំផ្លិចបំផ្លាញអគារនៅទីនោះ។ នេះបើយោងតាមការចេញផ្សាយពីសារព័ត៌មាន Al Jazeera English និង Euronews កាលពីថ្ងៃទី៩ ខែវិច្ឆិកា។
ហេតុការណ៍នេះ បានកើតឡើងនៅមជ្ឈមណ្ឌលការិយាល័យរដ្ឋាភិបាលស្រុកហ្វឹងដុង (Fengdong) ស្ថិតក្នុងតំបន់ស៊ីសៀនថ្មី (Xixian) ជិតទីក្រុងស៊ីអាន (Xi’an)។ វីដេអូហេតុការណ៍ដ៏ភ្ញាក់ផ្អើល ដែលត្រូវបានចែកចាយលើបណ្តាញសង្គមបានបង្ហាញពីសកម្មភាពអេស្កាវ៉ាទ័រ១គ្រឿង កំពុងបើកបរនៅក្នុងបរិវេណមជ្ឈមណ្ឌលនោះ មុនកាយផ្នែកខាងមុខអគារឱ្យខូចខាតយ៉ាងដំណំ ខណៈដែលបុគ្គលិក និងប្រជាពលរដ្ឋបានត្រឹមឈរមើលហេតុការណ៍នោះពីចម្ងាយ។
យោងតាមរបាយការណ៍របស់បណ្តាប្រព័ន្ធផ្សព្វផ្សាយចិន បានឱ្យដឹងថា បុរសរូបនោះបានចាប់ផ្តើមសកម្មភាពកាយនៅម៉ោងប្រហែល១១ព្រឹក ម៉ោងក្នុងស្រុក។ សាក្សីដែលបានឃើញផ្ទាល់ភ្នែកនិយាយថា ហេតុការណ៍ទាំងមូលបានអូសបន្លាយពេលប្រហែល១ម៉ោង អំឡុងពេលនោះ បុរសរូបនោះ បានបើកអេស្កាវ៉ាទ័រ១គ្រឿង ដើម្បីបំផ្លិចបំផ្លាញអគារ និងរារាំងមិនឱ្យអ្នកដទៃចូលទៅជិតអគារនោះឡើយ។
បើតាមរូបភាពផ្សព្វផ្សាយបង្ហាញថា យ៉ាងហោចណាស់៦កន្លែងនៅបរិវេណអគារនោះ បានរងការខូចខាត ពិសេសត្រង់ច្រកចូលអគារទី១ កាំជណ្តើរត្រូវបានបំផ្លាញ ផ្នែកខ្លះនៃផ្លាកសញ្ញាត្រូវបានរបូតធ្លាក់ រានហាល និងទ្វារកញ្ចក់ក៏បានបែកបាក់។ ការខូចខាតក៏ បានរកឃើញផងដែរនៅផ្នែកខាងក្រោយអគារ និងជញ្ជាំងផ្នែកខ្លះនៃអគារផ្សេងទៀត។
Al Jazeera បានរាយការណ៍ថា មូលហេតុ ដែលនាំឱ្យបុរសនោះ បើកអេស្កាវ៉ាទ័រ បុក និងកាយបំផ្លាញអគារនោះ កើតឡើងជុំវិញវិវាទ ដែលត្រូវបានចោទពីជម្លោះទាក់ទងនឹងប្រាក់សំណងដែលមិនទាន់បានទូទាត់ដល់អ្នកភូមិ។ ប្រភពពីសារព័ត៌មានចិន Sina ក៏បានឱ្យដឹងដែរថា ពាក់ព័ន្ធនឹងមូលហេតុនេះ អាជ្ញាធរតំបន់បានអះអាងថា បុគ្គលដែលពាក់ព័ន្ធ គឺជាបុគ្គលម្នាក់ដែលមិនពេញចិត្តនឹងការផ្ដល់សំណងសម្រាប់ការរុះរើកសិដ្ឋានចិញ្ចឹមសត្វ។ បើទោះបីជាការផ្ដល់សំណងត្រូវបានអនុវត្តទៅតាមគោលនយោបាយរួចហើយក៏ដោយ ប៉ុន្តែការទាមទារគឺហួសហេតុពេក។
ទោះយ៉ាងណាក៏ដោយ បច្ចុប្បន្ន មូលហេតុជាក់លាក់នៃហេតុការណ៍ដ៏ភ្ញាក់ផ្អើលនេះ នៅតែស្ថិតក្រោមការស៊ើបអង្កេតបន្ថែមទៀតនៅឡើយ៕
ចែករំលែកព័តមាននេះ