ទីក្រុងកៀវ៖ រុស្ស៊ីប្រកាសថាយោធារបស់ខ្លួនវាយប្រហារទ្រង់ទ្រាយធំទៅលើអ្វីដែលខ្លួនចាត់ទុកថាជាទីតាំងយោធា ទីតាំងផលិតថាមពល និងទីតាំងដឹកជញ្ជូននៅទីក្រុងកៀវ និងតំបន់ជុំវិញទីក្រុងនេះ។ នៅទីក្រុងកៀវ ក្រសួងការពារជាតិប្រកាសថាការវាយប្រហារនោះត្រូវចំស្ពាន Northern Bridge ដែលប្រើប្រាស់សម្រាប់ដឹកជញ្ជូនអាវុធយុទ្ធភ័ណ្ឌ គ្រឿងបរិក្ខារយោធា និងយានជំនិះសម្រាប់កងទ័ពអ៊ុយក្រែន។
ក្រៅពីនេះ រុស្ស៊ីវាយប្រហាររោងចក្រ Meridian ដែលប្រើប្រាស់សម្រាប់ផលិតមីស៊ីលបណ្ដែតម៉ាកហ្វ្លាមីងហ្គោ (Flamingo)។ ក្រសួងក៏បានប្រកាសផងដែរថាការវាយប្រហារនោះបណ្ដាលឱ្យខូចខាតហេដ្ឋារចនាសម្ព័ន្ធផលិតថាមពល និងតំបន់ឧស្សាហកម្មជាច្រើនកន្លែងនៅទូទាំងទីក្រុងកៀវ។ ក្នុងនោះមានរោងចក្រអគ្គិសនី ទីតាំងចែកចាយអគ្គិសនី និងរោងចក្រផលិតគ្រាប់កាំភ្លើង។ រុស្ស៊ីក៏បានវាយប្រហារស្ថានីយចែកចាយអគ្គិសនីនៅតំបន់ហ្ស៊ីតូមៀ (Zhytomyr) និងនាវាដឹកទំនិញមួយគ្រឿងនៅសមុទ្រខ្មៅផងដែរ។
រុស្ស៊ីថានាវានោះកំពុងដឹកគ្រឿងបរិក្ខារយោធា និងទំនិញប្រើប្រាស់សម្រាប់ស៊ីវិលផង និងយោធាផង។ ប្រធានាធិបតីអ៊ុយក្រែន លោកហ្សេឡិនស្គី បញ្ចេញប្រតិកម្មចំពោះរឿង និងចោទប្រកាន់ថារុស្ស៊ីបានរុញច្រានទីក្រុងកៀវ និងទីកន្លែងដទៃទៀតរបស់អ៊ុយក្រែនឱ្យធ្លាក់ចូលទៅក្នុងសភាងងឹតដោយវាយប្រហារទីតាំងសំខាន់ៗជាអាយុជីវិត។ ការវាយប្រហារលើកនេះកើតមានឡើងមុនគម្រោងជួបគ្នាត្រីភាគីរវាងរុស្ស៊ី អ៊ុយក្រែន និងអាមេរិក។
លោកហ្សេឡិនស្គីអះអាងថារុស្ស៊ីបញ្ជូនដ្រូន១៧២គ្រឿង និងមីស៊ីលបាលីស្ទីក៣៦គ្រាប់ទៅវាយប្រហារគ្រប់ច្រកល្ហកនៃទីក្រុងកៀវ និងតំបន់ខ្សែក្រវាត់ក្រុង បណ្ដាលឱ្យមនុស្ស៩នាក់រងរបួស។ លោកបង្ហោះសារនៅលើបណ្ដាញអ៊ិចថាទីតាំងផលិតថាមពលគឺជាផ្ទាំងស៊ីបសំខាន់នៃការវាយប្រហារលើកនេះ ហើយបណ្ដាលឱ្យមានបញ្ហារអាក់រអួលយ៉ាងខ្លាំងសម្រាប់ការផ្គត់ផ្គង់អគ្គិសនី ទឹកស្អាត និងកម្ដៅនៅទូទាំងរដ្ឋធានីកៀវ។ អគារស្នាក់នៅរបស់ប្រជាជន ស្ពាន Northern Bridge និងសាលាមត្តេយ្យមួយកន្លែងក៏រងការខូចខាតផងដែរ។
មិនមែនតែរុស្ស៊ីទេដែលវាយប្រហារអ៊ុយក្រែន អ៊ុយក្រែនក៏វាយប្រហាររុស្ស៊ីវិញដែរ។ អ៊ុយក្រែនបញ្ជូនដ្រូនជាច្រើនគ្រឿង និងមីស៊ីលជាច្រើនគ្រាប់ទៅវាយប្រហារទីតាំងជាច្រើនកន្លែងរបស់រុស្ស៊ីកាលពីពេលរំលងអធ្រាត្របណ្ដាលឱ្យខូចខាតយ៉ាងដំណំ ប៉ុន្តែមិនមានស្លាប់មនុស្សទេ។ នេះបើយោងតាមការអះអាងរបស់អាជ្ញាធររុស្ស៊ី។ នៅទីក្រុងអូរីយ៉ូល (Oryol) អ៊ុយក្រែនវាយប្រហារឃ្លាំងស្តុកទុកទំនិញជាច្រើនកន្លែង និងទីតាំងផលិតកម្ម បណ្ដាលឱ្យមានភ្លើងឆាបឆេះ។ នៅតំបន់សារ៉ាតោហ្វ (Saratov) ដ្រូនរបស់អ៊ុយក្រែនវាយប្រហារអគារស្នាក់នៅរបស់ប្រជាជន ប៉ុន្តែមិនបណ្ដាលឱ្យមានមនុស្សស្លាប់ ឬរបួសទេ។ ក្រសួងការពារជាតិរុស្ស៊ីអះអាងថាប្រព័ន្ធការពារដែនអាកាសរបស់ខ្លួនបាញ់ទម្លាក់ដ្រូនរបស់អ៊ុយក្រែន៤១១គ្រឿងដែលហោះទៅវាយប្រហារតំបន់ជាងដប់កន្លែងទូទាំងប្រទេសរុស្ស៊ី៕ ប្រភព៖ Reuters, Times of India
ចែករំលែកព័តមាននេះ