ទីក្រុងវ៉ាស៊ីនតោន៖ ការដែលគណបក្សសាធារណរដ្ឋទទួលបរាជ័យធ្ងន់ធ្ងរដែលមិននឹកស្មានដល់នៅក្នុងការបោះឆ្នោតសភាកាលពីពេលថ្មីៗនេះអាចចាត់ទុកថាជាសំណើចចំអកដ៏គួរឱ្យអួលណែននៅក្នុងចិត្តឥតឧបមាសម្រាប់លោកដូណាល់ត្រាំ។ ប៉ុន្តែលោកអាចនឹងបម្លែងកាលានុភាពនេះទៅជាឱកាសដើម្បីបោះដៃទៅរកប្រទេសកូរ៉េខាងជើងចរចាគ្នាសាជាថ្មី និងដើម្បីស្ដារមុខមាត់ឡើងវិញ។ ប៉ុន្តែប្រសិនបើលោកហ៊ានតែធ្វើសម្បទានធំដុំសម្រាប់របបដឹកនាំទីក្រុងព្យុងយ៉ាង ពេលនោះច្បាស់ណាស់ថាអាចនឹងធ្វើឱ្យប៉ះពាល់ទំនាក់ទំនងរវាងអាមេរិក និងសម្ព័ន្ធមិត្តសំខាន់ៗនៅក្នុងតំបន់។ ពួកគេក៏កំពុងតាមដានបញ្ហានេះដោយមិនប៉ប្រិចភ្នែកផងដែរ។
ក្រុមអ្នកវិភាគ និងមន្ត្រីរដ្ឋាភិបាលនៅទ្វីបអាស៊ីរំពឹងថាលោកត្រាំនឹងយកចិត្តទុកដាក់ទៅលើនយោបាយការបរទេសរបស់លោកឡើងវិញ ព្រោះនៅសល់២ឆ្នាំទៀត លោកនឹងខិតខំកសាងស្នាដៃឱ្យបានគ្រាន់បើឡើងវិញដើម្បីទុកជាកេរមត៌កសម្រាប់អ្នកជំនាន់ក្រោយ។ នៅពេលនេះ លោកត្រាំមិនដឹងថាត្រូវស្រាវាអ្វីទុកអ្វីនោះទេ។ សង្គ្រាមអ៊ុយក្រែនក៏មិនទាន់ចប់ ហើយសង្គ្រាមអ៊ីរ៉ង់មិនត្រឹមតែមិនទាន់ចប់ទេ ថែមទាំងធ្វើឱ្យគណបក្សរបស់លោកចាញ់ឆ្នោតថែមទៀត។ ដូច្នេះ លោកទំនងជាងាកមករកទ្វីបអាស៊ីវិញម្ដង ព្រោះលោកមានជំនឿថានៅក្នុងទំនាក់ទំនងជាមួយកូរ៉េខាងជើង លោកអាចមានផ្លូវដើរជាបន្តទៀត។
ប្រមុខដឹកនាំកូរ៉េខាងជើង លោកគីមជុងអ៊ុន ដែលលោកត្រាំកំពុងតែអំពៀរៗខិតទៅរកជាបណ្ដើរៗនោះ អាចនឹងក្លាយជាផ្ទាំងស៊ីបសំខាន់មួយនៅក្នុងកិច្ចខិតខំប្រឹងប្រែងរបស់លោកដើម្បីស្ដារមុខមាត់ឡើងវិញ។ លោកបានគីលជូ (Ban Kil-joo) ជាគ្រូបង្រៀនផ្នែកទំនាក់ទំនងអន្តរជាតិនៃបណ្ឌិត្យសភាជាតិផ្នែកកិច្ចការទូតប្រចាំទីក្រុងសេអ៊ូល។ លោកថ្លែងថាលោកត្រាំទំនងជាធ្វើសម្បទានជាដុំកំភួនដើម្បីទទួលបានជោគជ័យនៅក្នុងនយោបាយការបរទេស។ ជាពិសេស នៅក្នុងស្ថានភាពដែលលោកកំពុងតែទទួលរងសម្ពាធកាន់តែខ្លាំងឡើងៗនៅក្នុងប្រទេស។ ដោយសារលោកចង់ឱ្យអ្នកឈរឈ្មោះបន្តពីលោកទទួលជ័យជម្នះនៅក្នុងការបោះឆ្នោតឆ្នាំ២០២៨ ដូច្នេះ ការទាក់ទងជាមួយកូរ៉េខាងជើងប្រាកដជាស្ថិតនៅក្នុងរបៀបវារៈនយោបាយសំខាន់។
ទោះជាយ៉ាងណាក្ដី ក្រុមអ្នកវិភាគយល់ថាលោកគីមជុងអ៊ុនមិនប្រាកដជាបោះដៃត្រឡប់ទៅរកលោកត្រាំវិញទេព្រោះលោកមិនរំពឹងថានឹងទទួលបានផលប្រយោជន៍ជាដុំកំភួន។ ចំពោះសំណួរថាតើលោកត្រាំមានផែនការយ៉ាងណានៅក្នុងនយោបាយការទូតជាមួយកូរ៉េខាងជើង? សេតវិមានឆ្លើយតបជាលក្ខណៈទូទៅថាលោកត្រាំបាននាំត្រឡប់មកវិញនូវភាពខ្លាំងរបស់អាមេរិកនៅលើឆាកអន្តរជាតិ និងពង្រឹងទំនាក់ទំនងជាមួយថ្នាក់ដឹកនាំប្រទេសធំៗនៅលើសាកលលោក។ អ្នកនាំពាក្យសេតវិមាន លោកស្រីអាណា ខេលី (Anna Kelly) ថ្លែងថាលោកត្រាំដាក់ចេញនយោបាយការបរទេសដោយផ្អែកទៅលើកត្តានយោបាយ ហើយលោកធ្វើនយោបាយដោយតម្កល់ផលប្រយោជន៍របស់ប្រជាជនអាមេរិកាំង និងសន្តិសុខជាតិជារឿងសំខាន់៕ ប្រភព៖ Reuters
ចែករំលែកព័តមាននេះ