ទីក្រុងយេរូសាឡឹម៖ គូប្រជែងនយោបាយរបស់លោកណឺតាន់យ៉ាហ៊ូបានឆ្លៀតឱកាសនៃការឈ្នះឆ្នោតយ៉ាងភ្លូកទឹកភ្លូកដីរបស់គណបក្សប្រជាធិបតេយ្យនៅអាមេរិកដើម្បីយកមកប្រៀបផ្ទឹមជាមួយគម្រោងបង្កើតរដ្ឋាភិបាលនៅអុីស្រាអែលបន្ទាប់ពីការបោះឆ្នោតទើបតែបិទបញ្ចប់ថ្មីៗ ហើយលទ្ធផលឆ្នោតបង្ហាញថាថ្វីដ្បិតសម្ព័ន្ធភាពគណបក្សរបស់លោកណឺតាន់យ៉ាហ៊ូទទួលបានសំឡេងឆ្នោតច្រើនជាងគេពិតមែន ប៉ុន្តែមិនបានសំឡេងភាគច្រើនដាច់ខាតដើម្បីបង្កើតរដ្ឋាភិបាលម្នាក់ឯងបានឡើយ។ ក្រុមប្រឆាំងលោកណឺតាន់យ៉ាហ៊ូកំពុងរកវិធីបង្កើតរដ្ឋាភិបាលថ្មីដោយគ្មានវត្តមានរបស់លោក។
គណបក្សប្រជាធិបតេយ្យនៅអាមេរិកឈ្នះឆ្នោតទាំងនៅរដ្ឋសភា និងព្រឹទ្ធសភា។ នេះបើយោងតាមលទ្ធផលឆ្នោតមិនទាន់ផ្លូវការទេព្រោះសន្លឹកឆ្នោតមិនទាន់រាប់អស់នៅឡើយទេ។ ប៉ុន្តែច្បាស់ណាស់ថាគណបក្សនេះទទួលបានសំឡេងគ្រប់គ្រាន់តាមការកំណត់ក្នុងការគ្រប់គ្រងសភាទាំង២។ លទ្ធផលឆ្នោតនេះក៏ជាការសើចចំអកសម្រាប់លោកដូណាល់ត្រាំផងដែរដោយសារតែពលរដ្ឋអាមេរិកាំងភាគច្រើនលើសលប់មានកំហឹងយ៉ាងពុះកញ្ជ្រោលចំពោះសង្គ្រាមអុីរ៉ង់ដែលធ្វើឱ្យប៉ះពាល់ជីវិតរស់នៅរបស់ពួកគេយ៉ាងខ្លាំង ឧទាហរណ៍ ថ្លៃចំណាយលើជីវភាពប្រចាំថ្ងៃកាន់តែខ្ពស់ជាងមុន, សាំង និងម៉ាស៊ូតឡើងថ្លៃ ហើយសង្គ្រាមនេះហាក់ដូចជាគ្មានផលចំណេញអ្វីសោះចំពោះផលប្រយោជន៍អាមេរិកាំង។ ការបោះឆ្នោតនៅអាមេរិកធ្វើឡើងក្រោយការបោះឆ្នោតនៅអុីស្រាអែលមួយសប្ដាហ៍។
ប្រធានាធិបតីអុីស្រាអែល លោកអាយសាក់ ហឺហ្សក់ (Isaac Herzog) ត្រៀមបើកការជជែកគ្នាជាមួយក្រុមអ្នកតំណាងគណបក្សនយោបាយនានាមុននឹងជ្រើសរើសបេក្ខជន២រូបគឺលោកណឺតាន់យ៉ាហ៊ូ និងលោកហ្កាឌី អេសិនខូត (Gadi Eisenkot) ដើម្បីកំណត់ថាតើម្នាក់ណាជាអ្នកដឹកនាំរដ្ឋាភិបាលអាណត្តិថ្មី។ បច្ចុប្បន្ននេះ លោកណឺតាន់យ៉ាហ៊ូបន្តកាន់តំណែងជានាយករដ្ឋមន្ត្រីចាំផ្ទះ។ អាមេរិកជាសម្ព័ន្ធមិត្តដ៏សំខាន់របស់អុីស្រាអែលមិនថាគណបក្សប្រជាធិបតេយ្យ ឬគណបក្សសាធារណរដ្ឋនោះទេ។ អាមេរិកផ្ដល់ជំនួយយោធាមួយឆ្នាំៗរាប់ពាន់លានដុល្លារចាប់តាំងពីអំឡុងទសវត្សរ៍ទី៧០មក។ ប៉ុន្តែផ្ទុយពីមេដឹកនាំអុីស្រាអែលជំនាន់មុនៗដែលតែងតែគាំទ្រគណបក្សធំៗទាំង២នៅអាមេរិក លោកណឺតាន់យ៉ាហ៊ូប្រកាសគាំទ្រគណបក្សសាធារណរដ្ឋជាចំហតែម្ដង។
ទំហំនៃការគាំទ្រពីសំណាក់ក្រុមប្រជាធិបតេយ្យ និងសាធារណរដ្ឋចាប់ផ្ដើមថយចុះបន្ទាប់ពីអុីស្រាអែលវាយប្រហារតំបន់ហ្កាហ្សាក្រោយព្រឹត្តិការណ៍ខែតុលា ឆ្នាំ២០២៣។ សម្រាប់ឆ្នាំនេះ ទំហំនៃការគាំទ្ររឹតតែថយចុះបន្ថែមទៀតចាប់តាំងពីលោកត្រាំ និងលោកណឺតាន់យ៉ាហ៊ូបើកយុទ្ធនាការរួមគ្នាដើម្បីវាយប្រហារអុីរ៉ង់។ បេក្ខជនរបស់គណបក្សប្រជាធិបតេយ្យខ្លះយកបញ្ហាផ្ដល់ជំនួយយោធាទៅឱ្យអុីស្រាអែលធ្វើប្រធានបទដែលត្រូវរិះគន់។ ហេតុនេះកាលពីថ្ងៃអង្គារ លោកត្រាំដែលប្រកាសគាំទ្រលោកណឺតាន់យ៉ាហ៊ូជាបេក្ខជននាយករដ្ឋមន្ត្រីនោះ លោកបានប្រកាសឈប់ផ្ដល់ជំនួយមួយឆ្នាំៗ៤ពាន់លានដុល្លារទៅឱ្យអុីស្រាអែលដើម្បីកុំឱ្យក្រុមប្រជាធិបតេយ្យយកបញ្ហានេះមកនិយាយទៀត។
លោកយ៉ាអៀ ហ្គោឡេន (Yair Golan) ជាប្រធាន «គណបក្សប្រជាធិបតេយ្យ» ដែលជាគណបក្សឆ្វេងនិយមបានបង្ហោះសារនៅលើបណ្ដាញអ៊ិចថាលទ្ធផលបោះឆ្នោតសភានៅអាមេរិកជាការបង្ហាញថាតើលោកណឺតាន់យ៉ាហ៊ូធ្វើឱ្យគេឈឺក្បាលនៅអាមេរិកកម្រិតណាទាំងនៅក្នុងចំណោមក្រុមអ្នកនិយមប្រជាធិបតេយ្យ និងសាធារណរដ្ឋ។ ចំណែកប្រធានគណបក្សប្រឆាំងម្នាក់ទៀត គឺលោកយ៉ាអៀ ឡាពីត (Yair Lapid) ថ្លែងថាលទ្ធផលបោះឆ្នោតនេះបង្ហាញថាអុីស្រាអែលមិនអាចបណ្ដោយឱ្យលោកណឺតាន់យ៉ាហ៊ូកាន់អំណាចតទៅទៀតឡើយ។ បើយើងបន្តទុកគាត់ឱ្យកាន់អំណាចនឹងធ្វើឱ្យគ្រោះថ្នាក់ដល់សន្តិសុខជាតិ, ធ្វើឱ្យមហន្តរាយលទ្ធិប្រជាធិបតេយ្យនៅស្រុកយើង ហើយធ្វើឱ្យប៉ះពាល់មុខមាត់ប្រទេសជាតិយើងនៅលើឆាកអន្តរជាតិ។
លោកណឺតាន់យ៉ាហ៊ូនៅរក្សាភាពស្ងៀមស្ងាត់ចំពោះការបោះឆ្នោតនៅអាមេរិក។ អ្នកសារព័ត៌មានព្យាយាមទាក់ទងទៅខុទ្ទកាល័យរបស់លោកដើម្បីធ្វើអត្ថាធិប្បាយ ប៉ុន្តែគ្មានចម្លើយតបទេ។ អុីស្រាអែលអាចត្រូវការពេលរាប់សប្ដាហ៍ ឬរាប់ខែទៅមុខទៀតទម្រាំដឹងថាតើរវាងលោកណឺតាន់យ៉ាហ៊ូ និងលោកអេសិនខូត នរណានឹងក្លាយជានាយករដ្ឋមន្ត្រី។ សម្ព័ន្ធភាពគណបក្សនីមួយៗអាចស្នើបេក្ខភាពរបស់ខ្លួនទៅសភាដើម្បីបោះឆ្នោតផ្ដល់សេចក្ដីទុកចិត្ត។ អ្នកណាស្នើទៅមុនក៏បានដែរ ប៉ុន្តែបើគ្មានបេក្ខជនណាទទួលបានសំឡេងទុកចិត្តគ្រប់គ្រាន់ទេ អុីស្រាអែលនឹងរៀបចំការបោះឆ្នោតឡើងវិញ៕ ប្រភព៖ Reuters
ចែករំលែកព័តមាននេះ