ទើបចេញពន្ធនាគារមិនរាងចាល! ខឹងម្តាយស្តីបន្ទោស ទាញស្នសម្រាប់ចា.ក់ត្រី គំរា.មដល់ជីវិតម្តាយ ត្រូវនគរបាលឃាត់ខ្លួន
- កំពង់ស្ពឺ
ខេត្តកំពង់ស្ពឺ៖ បុរសម្នាក់ ទើបតែចេញពីពន្ធនាគារ ត្រូវបានកម្លាំងនគរបាលស្រុកគងពិសីធ្វើការឃាត់ខ្លួន ខណៈដែលបុរសរូបនោះគំរាមចាក់សម្លាប់ម្ដាយបង្កើត ដែលជាអ្នកមានគុណព្រោះតែខឹងម្ដាយស្តីបន្ទោសរឿងមិនចេះខ្មាស់គេ មិនជួយធ្វើការងារម្ដាយ កូនប្រុសកើតចិត្តខឹងទាញស្នសម្រាប់ចាក់ត្រី ដេញចាក់សម្លាប់ម្ដាយរត់គេចខ្លួនទាន់ ដោយទ្រាំលែងបាន ម្ដាយបានប្ដឹងឱ្យសមត្ថកិច្ចឃាត់ខ្លួនតែម្ដង។
ករណីហិង្សាក្នុងគ្រួសារបង្កឱ្យមានការភ្ញាក់ផ្អើល កាលពីវេលាម៉ោង៥ល្ងាចថ្ងៃទី១ ខែវិច្ឆិកា ឆ្នាំ២០២៦ នៅក្នុងភូមិព្រៃទទឹង ឃុំព្រះនិព្វាន្ត ស្រុកគងពិសី ខេត្តកំពង់ស្ពឺ។
នគរបាលស្រុកគងពិសីបាននិយាយឲ្យដឹងថា ជនសង្ស័យជាកូនមានឈ្មោះ ផាន់ ប៊ុនធឿន ភេទប្រុស អាយុ៤១ឆ្នាំ មុខរបរមិនពិតប្រាកដ រស់នៅភូមិព្រៃទទឹង ឃុំព្រះនិព្វាន្ត ស្រុកគងពិសី ខេត្តកំពង់ស្ពឺ បានធ្វើសកម្មភាព វាយពាងទឹកបែកចំនួន១ និងបានគំរាមចាក់សម្លាប់ ទៅលើម្តាយបង្កើត ជាជនរងគ្រោះមានឈ្មោះ រៀន ម៉ាច ភេទស្រី អាយុ៦៥ឆ្នាំ មុខរបលក់ដូរ (ត្រូវជាម្ដាយបង្កើត) រស់នៅភូមិឃុំជាមួយគ្នា។
នគរបាលស្រុកគងពិសីបាននិយាយបន្តទៀតថាជនសង្ស័យ បានធ្វើសកម្មភាពយកស្នសម្រាប់ចាក់ត្រី ដងដែក មានប្រវែង ២ម៉ែត្រ គំរាមនិងដេញចាក់ជនរងគ្រោះដែលត្រូវជាម្តាយបង្កើត ប៉ុន្តែត្រូវជនរងគ្រោះជាម្តាយបានរត់គេចទាន់ (ពុំមានរងរបួសនោះទេ)។
នគរបាលស្រុកគងពិសីបានបន្ថែមឲ្យដឹងទៀតថា នៅមុនពេលកើតហេតុ ជនរងគ្រោះជាម្តាយកំពុងរៀបចំអីវ៉ាន់លក់ដូរ ធម្មតាដូចសព្វមួយដង កូនប្រុសដែលទើបចេញពីពន្ធនាគារ មិនជួយរៀបចំ និងជួយការងារអ្វីសោះ។ ម្តាយក៏បានស្ដីបន្ទោសឱ្យ ជនសង្ស័យជាកូនថា ហែងអត់ចេះខ្មាស់គេទេអី មិនជួយការងារ អាយុច្រើនហើយ ស្រាប់តែពេលនោះជនសង្ស័យជាកូនបានខឹងម្តាយស្ដីបន្ទោស បែបនោះក៏ស្ទុះទាញស្នមកដេញចាក់សម្លាប់ ទៅលើម្ដាយរបស់ខ្លួន ប៉ុន្តែជនរងគ្រោះជាម្តាយរត់គេចខ្លួនទាន់ ពុំមានរបួសនោះទេ ។ ម្តាយក៏បានដាក់ពាក្យបណ្តឹងដើម្បីឲ្យសមត្ថកិច្ចជួយអន្តរាគមន៍ឃាត់ខ្លួនជនសង្ស័យជាកូនចាត់ការតាមច្បាប់។ តាមការបញ្ជាក់របស់ម្តាយថា ជនសង្ស័យខាងលើ ធ្លាប់ជាប់ពន្ធនាគារ ទើបចេញ ហើយជាមុខសញ្ញាប្រើប្រាស់គ្រឿងញៀន នឹងតែងតែបង្ករការអុកឡុកក្នុងគ្រួសារញឹកញ៉ាប់ ណាស់។
នគរបាលស្រុកគងពិសីបានបញ្ជាក់ថា ក្រោយពីទទួលបានពាក្យបណ្ដឹងរបស់ម្ដាយ នៅវេលាម៉ោង១២និង៣០នាទីថ្ងៃត្រង់ថ្ងៃទី២ ខែវិច្ឆិកា ឆ្នាំ២០២៦ កម្លាំងជំនាញសហការ ជាមួយកម្លាំងប៉ុស្តិ៍នគរបាលរដ្ឋបាលឃុំ ចុះទៅធ្វើការឃាត់ខ្លួន ជនសង្ស័យខាងលើ យកមកសួនាំ នៅអធិការដ្ឋានគ បាលស្រុកគងពិសី ជនសង្ស័យបានសារភាពថាខ្លួនពិតជាបានធ្វើការគំរាមដេញចាក់សម្លាប់ម្ដាយបង្កើតពិតប្រាកដមែន។
នគរបាលស្រុកគងពិសីបានបញ្ជាក់ឲ្យដឹងទៀតថាក្រោយឃាត់ខ្លួនជនសង្ស័យរួមជាមួយនឹងវត្ថុតាង នគរបាលបានកសាងសំណុំរឿងបញ្ជូនទៅការិយាល័យជំនាញនៃស្នងការដ្ឋាននគរបាលខេត្តកំពង់ស្ពឺដើម្បីចាត់ការបន្តតាមផ្លូវច្បាប់៕
ចែករំលែកព័តមាននេះ