តាមទីភ្នាក់ងារ AFP ផ្សាយថា អាជ្ញាធរ កងទ័ព និងក្រុមអ្នកស្ម័គ្រចិត្តជាច្រើនពាន់នាក់ បានចុះតាមតំបន់នៅទូទាំងប្រទេសស្រីលង្កា កាលពីថ្ងៃទី១២ សីហា កន្លងមក ដើម្បីធ្វើការជំរឿនចំនួនដំរីព្រៃជាលើកដំបូងរបស់ប្រទេស ទោះបីជាមានក្រុមអភិរក្សសត្វព្រៃខ្លះធ្វើការជំទាស់ក្រោយពី មានលេចឮដំណឹងថា អាជ្ញាធរនឹងឆ្លៀត
តាមទីភ្នាក់ងារ AFP ផ្សាយថា អាជ្ញាធរ កងទ័ព និងក្រុមអ្នកស្ម័គ្រចិត្តជាច្រើនពាន់នាក់ បានចុះតាមតំបន់នៅទូទាំងប្រទេសស្រីលង្កា កាលពីថ្ងៃទី១២ សីហា កន្លងមក ដើម្បីធ្វើការជំរឿនចំនួនដំរីព្រៃជាលើកដំបូងរបស់ប្រទេស ទោះបីជាមានក្រុមអភិរក្សសត្វព្រៃខ្លះធ្វើការជំទាស់ក្រោយពីមានលេចឮដំណឹងថា អាជ្ញាធរនឹងឆ្លៀតឱកាសនេះចាប់កូនដំរីមកហ្វឹកហ្វឺនឱ្យស៊ាំ ដើម្បីយកទៅដង្ហែក្នុងពិធីសំខាន់ៗផ្នែកសាសនា។
ក្រុមអភិរក្សសត្វព្រៃជាច្រើននាក់ បានសម្រេចចិត្តមិនចូលរួមក្នុងការស្រាវជ្រាវចំនួនដំរីព្រៃនៅស្រីលង្កានេះទេ ដោយសារមានក្តីបារម្ភក្រោយពីរដ្ឋមន្ត្រីក្រសួងសត្វព្រៃស្រីលង្កាបង្ហាញនូវការយល់ឃើញថា ការស្រាវជ្រាវលើកនេះ នឹងមានការចាប់ដំរីមកហ្វឹកហ្វឺន ។ ទោះបីជាយា៉ងណាក៏ដោយ មានប្រជាជនប្រហែល៤.០០០នាក់ ចូលរួមធ្វើជំរឿន តាមការកំណត់រយៈពេល២ថ្ងៃ ដោយចាត់ទុកថា ជាលើកដំបូងដែលប្រទេសស្រីលង្កាព្យាយាមធ្វើការជំរឿនចំនួនសត្វដំរីក្នុងឧទ្យានជាតិនៅទូទាំងប្រទេស ។ ការជំរឿនចាប់ផ្តើមឡើងតាំងពីព្រឹកថ្ងៃទី១២ សីហា នៅបរិវេណតំបន់ទឹក អាងស្តុកទឹកបុរាណ និងតាមទន្លេផ្សេងៗដែលមានប្រទះឃើញដំរីព្រៃជាញឹកញាប់ ។
លោកប្រាឌីប ហេតទីយ៉ារ៉ាឈី (Pradeep Hettiarachchi) មន្ត្រីឧទ្យានសត្វមីណេរីយា៉បាន ប្រាប់ AFP ថា នឹងមានការបែងចែកក្រុមដំរីទៅតាមភេទ និងអាយុ ។ លោកបានបញ្ជាក់ដូច្នេះថា «ចំនួនដំរីក្នុងឧទ្យានរបស់យើងមានចំនួនច្រើន ហើយការស្រាវជ្រាវនេះនឹងជួយឱ្យយើងដឹងពីទិន្នន័យសំខាន់ៗក្នុងការដាក់គម្រោងអភិរក្ស» ។
ចំណែកក្រុមអភិរក្សសត្វព្រៃមួយចំនួនបានប្រឆាំងនឹងការជំរឿនចំនួនដំរីព្រៃនេះក្រោយពីរបាយការណ៍នៃការយល់ឃើញរបស់លោកអេស-អឹម ចាន់ដ្រាសេណា (S.M Chandrasena) រដ្ឋមន្ត្រីក្រសួងសត្វព្រៃស្រីលង្កាកាលពីដើមសសប្តាហ៍មុនបញ្ជាក់ថា ការធ្វើជំរឿនចំនួនដំរី នឹងមានការវាយតម្លៃដល់ការរកដំរីព្រៃដ៏សមស្របសម្រាប់ការបង្ហាត់ហ្វឹកហ្វឺន ។
តាមសារព័ត៌មានមីរ័រ នៅក្នុងប្រទេសស្រីលង្កាបានចុះផ្សាយដោយយោងលើប្រសាសន៍របស់លោកចាន់ដ្រាសេណា ថា «កូនដំរីដែលស័ក្តិសមសម្រាប់ដង្ហែពិធីផ្សេងៗនឹងត្រូវជ្រើសរើសក្នុងពេលធ្វើជំរឿនដំរីព្រៃ ដើម្បីយកមកបង្ហាត់ហ្វឹកហ្វឺនឱ្យស៊ាំនៅមុនពេលបញ្ជូនបន្តទៅតាមវត្តផ្សេងៗទៀត ។ នៅក្នុងសម័យអតីតកាល យើងមានដំរីជាង៣០០ក្បាល ដែលទទួលការបង្ហាត់ហ្វឹកហ្វឺន ប៉ុន្តែបច្ចុប្បន្ននៅសល់ត្រឹម១៥០ក្បាល និងមានការហ្វឹកហ្វឺនតិចតួច»៕
ចែករំលែកព័តមាននេះ