ទីក្រុងតេអេរ៉ង់៖ ថ្ងៃនេះ អ៊ីរ៉ង់មានសារនយោបាយផ្ដាំទៅអាមេរិក។ មេដឹកនាំអ៊ីរ៉ង់ព្រមានថាខ្លួននឹងចាត់វិធានការឆ្លើយតបយ៉ាងទាន់ចិត្តប្រសិនបើអាមេរិកហ៊ានវាយប្រហារមកលើខ្លួនសាជាថ្មី។ ការថ្លែងដូច្នេះនៅពេលមានសញ្ញាកាន់តែច្បាស់ថាក្រោយការបោះឆ្នោតសភានៅអាមេរិក ការវាយប្រហារអាចនឹងកើតមានឡើងព្រោះការចរចាគ្នាហាក់ដូចជាគ្មានដំណើរការទៅមុខទាល់តែសោះ។ លោកត្រាំបានប្រាប់ក្រុមប្រទេសសម្ព័ន្ធមិត្តនៅតំបន់ឈូងសមុទ្រពែក្សរួចហើយថាត្រូវត្រៀមខ្លួនទប់ទល់នឹងលទ្ធភាពនៃការវាប្រហាររបស់អ៊ីរ៉ង់។
មេដឹកនាំកំពូលអ៊ីរ៉ង់ លោកម៉ុចតាបា ដែលគេពុំដែលឃើញមុខរបស់លោកសូម្បីតែម្ដងចាប់តាំងពីសង្គ្រាមផ្ទុះឡើងដំបូងនោះ លោកបានជំរុញឱ្យក្រុមយោធាប្រកាន់ជំហរឱ្យបានម៉ឺងម៉ាត់បំផុតដើម្បីចាត់វិធានការវាយបកទៅលើអាមេរិក និងអ៊ីស្រាអែល។ ទន្ទឹមនឹងនោះ បណ្ដាថ្នាក់ដឹកនាំនៅក្នុងតំបន់ក៏កំពុងព្រួយបារម្ភមិនតិចនោះទេ។ ពួកគេអំពាវនាវឱ្យភាគីជម្លោះទាំង២ខិតខំរក្សាភាពស្ងៀមស្ងាត់។
ថ្លែងនៅឯវេទិកាសន្តិសុខដែលរៀបចំឡើងនៅប្រទេសបារ៉េន អនុរដ្ឋមន្ត្រីការបរទេសអារ៉ាប៊ីសាអូឌីតថ្លែងថាអ្វីដែលជាសារផ្ដាំផ្ញើរបស់មេដឹកនាំនៅក្នុងតំបន់គឺថាពួកគេចង់ឱ្យតំបន់នេះវិលទៅរកសន្តិភាពវិញ។ ទីភ្នាក់ងារព័ត៌មានរបស់រដ្ឋអ៊ីរ៉ង់ IRNA បានដកស្រង់ពាក្យសម្ដីរបស់លោកម៉ុចតាបាមកផ្សាយគ្រប់ទម្រង់នៃការគំរាមកំហែងនឹងទទួលការឆ្លើយតបភ្លាមៗពីអ៊ីរ៉ង់។ លោកថ្លែងដូច្នេះនៅពេលជួបជាមួយមន្ត្រីយោធា។ លោកថ្លែងបន្តទៀតថាកងទ័ពត្រូវតែត្រៀមលក្ខណៈសម្បត្តិទុកឱ្យហើយដើម្បីប្រឈមមុខទល់នឹងពួកបច្ចាមិត្ត។
លោកក៏បានអំពាវនាវឱ្យមានការធ្វើបច្ចុប្បន្នភាពលើគោលដៅរបស់អាមេរិក និងអ៊ីស្រាអែលដែលអ៊ីរ៉ង់ត្រូវវាយប្រហារផងដែរ។ ការថ្លែងដូច្នេះនៅពេលមានការព្រួយបារម្ភថាសង្គ្រាមលើកនេះបើកើតមានឡើងមិនមែនតូចតាចនោះទេ។ ពោលគឺជាសង្គ្រាមទ្រង់ទ្រាយធំដូចពេលដែលសង្គ្រាមអ៊ីរ៉ង់ទើបតែចាប់ផ្ដើមដំបូងៗដូច្នោះដែរ។ ថ្ងៃនេះ អនុរដ្ឋមន្ត្រីការបរទេសអារ៉ាប៊ីសាអូឌីតថ្លែងថាប្រទេសនានានៅក្នុងតំបន់កំពុងខិតខំប្រឹងប្រែងដើម្បីទប់ស្កាត់មិនឱ្យស្ថានការណ៍យោធាកាន់តែឡើងកម្ដៅ ហើយក៏ខិតខំចរចាគ្នាដើម្បីឈានទៅដល់កិច្ចព្រមព្រៀងបញ្ចប់សង្គ្រាមផងដែរ៕ ប្រភព៖ AP
ចែករំលែកព័តមាននេះ