ទីក្រុងញូដេលី៖ មានឧបទ្ទវហេតុដ៏រន្ធត់ និងគួរឱ្យសោកស្ដាយមួយកើតឡើងនៅប្រទេសឥណ្ឌាកាលពីពេលថ្មីៗនេះ។ ក្នុងនោះ មនុស្សយ៉ាងតិច៦នាក់បានស្លាប់នៅក្នុងហេតុការណ៍ធ្លាក់ឧទ្ធម្ភាគចក្រមួយគ្រឿងនៅរដ្ឋអុតតារ៉ាក់ហាន (Uttarakhand) នៃតំបន់ភ្នំហិមាល័យ។ នេះបើយោងតាមសេចក្ដីរាយការណ៍របស់ទូរទស្សន៍ឥណ្ឌា ANI ដែលដកស្រង់ប្រភពពីមន្ត្រីរដ្ឋាភិបាលមួយរូបធ្វើការនៅអាជ្ញាធរអាកាសចរណ៍ស៊ីវិល។
មុនពេលកើតហេតុ ឧទ្ធម្ភាគចក្រនោះហោះចេញពីតំបន់បាឌ្រីណាត (Badrinath) ដែលជាកន្លែងធ្វើធម្មយាត្រាដ៏សំខាន់មួយសម្រាប់សាសនិកហិណ្ឌូនៅតំបន់ជួរភ្នំ។ ឧទ្ធម្ភាគចក្រត្រូវធ្វើដំណើរទៅទីក្រុងទេរ៉ាទុន (Dehradun)។ នៅក្នុងចំណោមមនុស្សដែលជិះនៅក្នុងឧទ្ធម្ភាគចក្រទាំង៦នាក់មានអ្នកដំណើរ៥នាក់ និងអ្នកបើកម្នាក់។ ពួកគេស្លាប់ទាំងអស់គ្មាននៅសេសសល់សូម្បីតែម្នាក់។ នេះបើតាមការផ្សាយរបស់ទូរទស្សន៍ឥណ្ឌា ANI។
ទូរទស្សន៍ខាងលើបានដកស្រង់ពាក្យសម្ដីរបស់មន្ត្រីជាន់ខ្ពស់ផ្នែកអាកាសចរណ៍ លោកប្រាទីក ជែន (Prateek Jain)។ អាជ្ញាដដែលប្រាប់បន្តទៀតថាឧទ្ធម្ភាគចក្រនោះនៅពេលហោះពីលើជ្រលងភ្នំចូស៊ីម៉ាស់ (Joshimath) ក៏ស្រាប់តែដាច់ការទាក់ទងជាមួយអង្គភាពតាមដានការហោះហើរតែម្ដង។ នៅពេលតំណាលគ្នានោះ ប្រព័ន្ធតាមដានការហោះហើរមិនអាចដឹងថាតើឧទ្ធម្ភាគចក្រនោះស្ថិតនៅទីណាពិតប្រាកដឡើយ។ ប្រតិបត្តិការដឹកជញ្ជូនមនុស្សក៏ត្រូវផ្អាកសកម្មភាពជាបណ្ដោះអាសន្នដើម្បីជាវិធានការបង្ការគ្រោះថ្នាក់។
ក្រុមហ៊ុនដឹកជញ្ជូនតាមឧទ្ធម្ភាគចក្រមិនបានឆ្លើយតបទេនៅពេលអ្នកសារព័ត៌មានព្យាយាមទាក់ទងដើម្បីស្នើសុំការឆ្លើយបំភ្លឺ។ អាជ្ញាធរឥណ្ឌាជាច្រើនស្ថាប័នបានបើកប្រតិបត្តិការរួមគ្នាដើម្បីបំពេញបេសកកម្មស្វែងរក និងជួយសង្គ្រោះ។ ក្នុងនោះមានអាជ្ញាធរដែនដីនៅនឹងកន្លែងកើតហេតុ ទីភ្នាក់ងារគ្រប់គ្រងគ្រោះមហន្តរាយ និងយោធាប្រចាំតំបន់។ ទូរទស្សន៍ឥណ្ឌាផ្សាយថាក្រុមអ្នកជួយសង្គ្រោះប្រញាប់ចុះទៅកន្លែងកើតហេតុ។ នៅពេលទៅដល់ គេឃើញភ្លើងឆេះ និងផ្សែងដ៏ខ្មៅងងឹតហោះហើរទៅលើអាកាស៕ ប្រភព៖ Asia One
ចែករំលែកព័តមាននេះ