ខេត្តស្ទឹងត្រែង ៖ ជនសង្ស័យម្នាក់ ត្រូវបានឃាត់ខ្លួន និងបញ្ជូនទៅតុលាការ កាលពីព្រឹកថ្ងៃទី៣១ តុលា ២០២៦
ក្នុងសកម្មភាពបទល្មើសនេសាទ ប្រព្រឹត្តនៅចំណុចកោះស្រែតាចាន់ ស្ថិតក្នុងភូមិច្រប់ ឃុំក្បាលរមាស ស្រុកសេសាន ខេត្តស្ទឹងត្រែង កាលពីព្រឹកថ្ងៃទី៣០ ខែតុលា ឆ្នាំ២០២៦ រួមជាមួយវត្ថុតាងជាច្រើន ។
លោក ស្រី សំវិចិត្រ នាយខណ្ឌរដ្ឋបាលជលផលខេត្តស្ទឹងត្រែង អោយដឹងនៅរសៀលថ្ងៃទី៣១ តុលា ២០២៦នេះថា ៖ ពាក់ព័ន្ធករណីខាងលើមន្ត្រីខណ្ឌរដ្ឋបាលជលផលស្ទឹងត្រែង សហការជាមួយសហគមន៍នេសាទកាំងដីសសាមគ្គី បានចុះប្រតិបត្តិការល្បាត និងបង្ក្រាបបទល្មើសនេសាទដោយប្រើប្រាស់ឧបករណ៍ឆក់ត្រី ។
លោកបន្តថា ប្រតិបត្តិការនេះ ធ្វើឡើងបន្ទាប់ពីទទួលបានសេចក្តីរាយការណ៍ និងសំណូមពរជាបន្តបន្ទាប់ពីប្រជាពលរដ្ឋរស់នៅភូមិស្រែតាចាន់ ដែលបានរាយការណ៍មកមន្ត្រីជំនាញ អំពីសកម្មភាពរបស់ជនសង្ស័យប្រមាណ៤ ទៅ៥នាក់ ដែលតែងតែប្រើប្រាស់ឧបករណ៍ឆក់ត្រី នៅក្នុងតំបន់នោះ បង្កការព្រួយបារម្ភ និងប៉ះពាល់ដល់ធនធានជលផល។ នៅព្រឹកថ្ងៃទី៣០ ខែតុលា ក្រុមការងារបានរៀបចំទូកចំនួន ២គ្រឿង ចុះទៅលាក់ខ្លួននៅក្បែរតំបន់កោះស្រែតាចាន់ ដើម្បីតាមដានសកម្មភាពជនសង្ស័យ។ រហូតដល់ម៉ោង៧និង៤៩នាទីព្រឹក ជនសង្ស័យបានបើកទូកចេញពីតំបន់កោះខាងលើ ហើយក្រុមការងារក៏បានបើកទូកតាមពីក្រោយ រហូតដល់ម៉ោង០៨និង៣០នាទីព្រឹក ទើបអាចឡោមព័ទ្ធឃាត់ខ្លួនជនសង្ស័យបានម្នាក់ ព្រមទាំងប្រមូលវត្ថុតាងពាក់ព័ន្ធនឹងបទល្មើស ។
មន្ត្រីជាជំនាញបានបង្ហាញអត្តសញ្ញាណជនសង្ស័យដែលត្រូវបានឃាត់ខ្លួនមានឈ្មោះ ថងខាយ ខាំហេង ភេទប្រុស អាយុ ៤៤ឆ្នាំ មានទីកន្លែងកំណើត និងទីលំនៅបច្ចុប្បន្ននៅភូមិហាងសាវ៉ាត ឃុំសាមឃួយ ស្រុកសេសាន ខេត្តស្ទឹងត្រែង ។
ចំណែកវត្ថុតាងដែលមន្ត្រីជំនាញបានដកហូត រួមមាន ៖ ទូកស្មាច់ប្រវែង ៥,៩ម៉ែត្រ ទទឹង ០,៨ម៉ែត្រ ចំនួន ១គ្រឿង ម៉ាស៊ីនម៉ាកហ៊ីណូតា កម្លាំង ១៨សេះ ចំនួន ១គ្រឿង ក្បាលឆក់ត្រជាក់ ១គ្រឿង ក្បាលឆក់ក្តៅ ១គ្រឿង អាគុយម៉ាក JP ទំហំ ៧០អំពែ ១គ្រឿង ថ្នងសម្រាប់ដួសត្រី ១ថ្នង ខ្សែភ្លើងប្រវែង ៥ម៉ែត្រ ខ្សែកាបប្រវែង ៦ម៉ែត្រ និងច្រវ៉ា ១ ។
បច្ចុប្បន្ន ជនសង្ស័យ និងវត្ថុតាងទាំងអស់ ត្រូវបានកសាងសំណុំរឿងបញ្ជូនទៅតុលាការដើម្បីអនុវត្តនីតិវិធីច្បាប់ជាធរមាន។
សូមបញ្ជាក់ថា ការបង្ក្រាបបទល្មើសនេសាទដោយប្រើប្រាស់ឧបករណ៍ឆក់ គឺជាកិច្ចការសំខាន់ក្នុងការចូលរួមថែរក្សា ការពារ និងអភិរក្សធនធានជលផល ដែលជាប្រភពធនធានធម្មជាតិដ៏មានតម្លៃសម្រាប់ជីវភាពរស់នៅរបស់ប្រជាពលរដ្ឋ។ ជាមួយគ្នានេះ ការចូលរួមសហការរាយការណ៍ពីសំណាក់ប្រជាពលរដ្ឋ និងសហគមន៍នេសាទ ក៏ជាកត្តាចាំបាច់ក្នុងការទប់ស្កាត់ និងកាត់បន្ថយបទល្មើសជលផលនៅតាមមូលដ្ឋានផងដែរ ៕
ចែករំលែកព័តមាននេះ