ទីក្រុងប៉េកាំង ៖ ប្រទេសចិនបានទទួលស្វាគមន៍ភ្ញៀវទេសចរណ៍បរទេសចំនួន ១១,៦ លាននាក់ នៅក្នុងត្រីមាសទី៣ (កក្កដា-កញ្ញា) ដែលកើនឡើង ១៥,៦% បើប្រៀបធៀបនឹងរយៈពេលដូចគ្នា កាលពីឆ្នាំមុន ដោយសារតែប្រទេសមហាអំណាចសេដ្ឋកិច្ចលំដាប់ទី២ពិភពលោកមួយនេះ បានកាត់បន្ថយភាពស្មុគស្មាញក្នុងការធ្វើដំណើរសម្រាប់ភ្ញៀវតាមរយៈការលើកលែងទិដ្ឋាការ (Visa) បន្ថែមទៀត។
តាមទិន្នន័យរបស់រដ្ឋបាលអន្តោប្រវេសន៍ជាតិ ដែលបានផ្សាយកាលពីពេលថ្មីៗនេះ បានបង្ហាញថា ភ្ញៀវបរទេសប្រហែលជិត ៤ នាក់ នៅក្នុងចំណោម ៥ នាក់ បានមកប្រទេសចិនដោយគ្មានទិដ្ឋាការ។ បើតាមកាសែត South China Morning Post រាយការណ៍ថា ប្រទេសវៀតណាម គឺជាប្រភពធំទី ៣ នៃភ្ញៀវបរទេសទៅកាន់ប្រទេសចិន អំឡុងពេលត្រីមាសទី៣នេះ បន្ទាប់ពីប្រទេសរុស្ស៊ី និងកូរ៉េខាងត្បូង។
ប្រទេសចិនបានពង្រីកការចូលដោយមិនបាច់ប្រើទិដ្ឋាការ ដើម្បីទាក់ទាញភ្ញៀវអន្តរជាតិបន្ថែមទៀត និងជំរុញការចំណាយលើវិស័យទេសចរណ៍។ ទីភ្នាក់ងារសារព័ត៌មាន ស៊ីនហួ (Xinhua) បានរាយការណ៍ថា ការលើកលែងទិដ្ឋាការដែលបានចាប់ផ្តើមជាការសាកល្បងសម្រាប់ប្រទេសចំនួន ៦ នៅក្នុងឆ្នាំ ២០២៣ បានពង្រីកដល់ ៥០ ប្រទេសត្រឹមខែកញ្ញា ឆ្នាំ ២០២៦ ដែលអនុញ្ញាតឱ្យភ្ញៀវអាចស្នាក់នៅបានរហូតដល់ ៣០ ថ្ងៃ។ ជាមួយគ្នានោះ ប្រព័ន្ធអនុវត្តដាច់ដោយឡែកមួយទៀត អនុញ្ញាតឱ្យអ្នកធ្វើដំណើរដែលឆ្លងកាត់ប្រទេសចិនក្នុងដំណើរទៅកាន់គោលដៅផ្សេងទៀត អាចស្នាក់នៅបានដល់ ១០ ថ្ងៃ ដោយមិនតម្រូវទិដ្ឋាការឡើយ។
នៅក្រោមផែនការអភិវឌ្ឍន៍វិស័យទេសចរណ៍រយៈពេល៥ឆ្នាំ ដែលត្រូវបានអនុម័តដោយក្រុមប្រឹក្សារដ្ឋនោះ អាជ្ញាធរមានគោលបំណងធ្វើឱ្យការទូទាត់ប្រាក់ ការដឹកជញ្ជូន និងការស្នាក់នៅកាន់តែមានភាពងាយស្រួលសម្រាប់ភ្ញៀវទេសចរបរទេស។ វិធានការផ្សេងទៀតរួមមាន ក៏រួមមានការកែលម្អការបង្វិលពន្ធលើការទិញទំនិញ និងពង្រីកជំនួយពហុភាសាផងដែរ។ ផែនការនេះ ក៏ជំរុញឱ្យមានជើងហោះហើរអន្តរជាតិ និងបណ្តាញផ្លូវដែកបន្ថែមទៀត ផ្សារភ្ជាប់ការចូលមកកាន់តែងាយស្រួល ជាមួយការតភ្ជាប់ទៅកាន់គោលដៅនានានៅទូទាំងប្រទេសកាន់តែប្រសើរ។
គួរបញ្ជាក់ថា ប្រទេសចិនមានគោលដៅទាក់ទាញភ្ញៀវទេសចរអន្តរជាតិឱ្យបាន ១៩០ លាននាក់ក្នុង១ឆ្នាំ ត្រឹមឆ្នាំ ២០៣០ និងប្រែក្លាយចំណាប់អារម្មណ៍កំពុងកើនឡើងនៅក្នុងការមកកាន់ប្រទេសនេះ ឱ្យទៅជាការចំណាយលើវិស័យទេសចរណ៍កាន់តែច្រើនឡើងថែមទៀត៕ ប្រភព ៖ Vietnam Express (VnExpress)
ចែករំលែកព័តមាននេះ