ទីក្រុងយេរូសាឡឹម៖ គណបក្សរបស់លោកណឺតាន់យ៉ាហ៊ូបាននិយាយបន្ទរតគ្នានូវការចោទប្រកាន់ដែលថា «សម្ព័ន្ធភាពគណបក្សនិយមអារ៉ាប់ជាអ្នកលួចសន្លឹកឆ្នោត ហេតុដូច្នេះហើយទើបបានជាសម្ព័ន្ធភាពគណបក្សរបស់លោកមិនអាចទទួលបានសំឡេងភាគច្រើនដាច់ខាតដើម្បីបង្កើតរដ្ឋាភិបាលម្នាក់ឯងបាន។ ការលួចសន្លឹកឆ្នោតនេះធ្វើឡើងដោយមានការជួយជ្រោមជ្រែងពីសំណាក់បរទេស»។ ឥឡូវនេះ ក្រុមរបស់លោកណឺតាន់យ៉ាហ៊ូ និងក្រុមគណបក្សដែលដឹកនាំដោយលោកហ្កាឌី អេសិនខូត (Gadi Eisenkot) ស្ថិតនៅក្នុងស្ថានភាព «មួយចានទឹក មួយចានគោក»។
ជាការពិត ក្រុមរបស់លោកណឺតាន់យ៉ាហ៊ូទទួលបានសំឡេងឆ្នោតច្រើនជាងគេពិតមែន។ ប៉ុន្តែមិនបានសំឡេងភាគច្រើនដាច់ខាតទេ។ ប្រសិនបើក្រុមលោកអេសិនខូតរួមគ្នាជាមួយគណបក្សនិយមអារ៉ាប់ ពួកគេអាចមានសំឡេងគ្រប់គ្រាន់ដើម្បីបង្កើតរដ្ឋាភិបាល។ ដូច្នេះ ទុកឱ្យលោកណឺតាន់យ៉ាហ៊ូធ្វើជាបក្សប្រឆាំងវិញម្ដង។ ប៉ុន្តែបើពួកគេជ្រើសរើសផ្លូវនេះក៏ជាករណីកម្រ ហើយក៏ប្រថុយប្រថានផ្នែកនយោបាយខ្លាំងសម្បើមណាស់ដែរ។ លទ្ធផលឆ្នោតដែលប្រកាសដោយគណៈកម្មការរៀបចំការបោះឆ្នោតបង្ហាញថាសម្ព័ន្ធភាពគណបក្សរបស់លោកណឺតាន់យ៉ាហ៊ូទទួលបាន៥៣អាសនៈ, សម្ព័ន្ធភាពគណបក្សដឹកនាំដោយលោកអេសិនខូតទទួលបាន៤៨អាសនៈ និងសម្ព័ន្ធភាពគណបក្សនិយមអារ៉ាប់ទទួលបាន១៩អាសនៈ។
ការរាប់សន្លឹកឆ្នោតបានធ្វើឡើងចប់សព្វគ្រប់អស់ហើយ ហើយរង់ចាំតែប្រគល់លទ្ធផលជូនប្រធានាធិបតីអ៊ីស្រាអែលនៅថ្ងៃពុធសប្ដាហ៍ក្រោយដើម្បីអនុម័តប៉ុណ្ណោះ។ គណបក្សលីឃុត (Likud) របស់លោកណឺតាន់យ៉ាហ៊ូបន្តសាបព្រោះពាក្យមិនល្អអំពីសម្ព័ន្ធគណបក្សនិយមអារ៉ាប់ចាប់តាំងពីលទ្ធផលស្ទង់មតិក្រោយការបោះឆ្នោតបង្ហាញថាលោកណឺតាន់យ៉ាហ៊ូថយសំឡេងគាំទ្រនៅក្នុងការបោះឆ្នោតកាលពីថ្ងៃអង្គារ។ លុះដល់ពេលតុលាការដាក់ការសង្ស័យថាការបោះឆ្នោតលើកនេះទំនងជាមានការជ្រៀតជ្រែកពីបរទេសថែមទៀត ធ្វើឱ្យគណបក្សរបស់លោកណឺតាន់យ៉ាហ៊ូនិយាយបំផ្លោងវោហារសាស្ត្រកាន់តែខ្លាំង។
អនុប្រធានតុលាការកំពូល លោកសូលបឺក (Sohlberg) សរសេររៀបរាប់នៅក្នុងលិខិតផ្ញើជូនទីភ្នាក់ងារសន្តិសុខអ៊ីស្រាអែលថាលោកមិនទាន់អាចបញ្ជាក់ផ្ទៀងផ្ទាត់ការអះអាងនោះទេ។ ប៉ុន្តែដោយយោងទៅតាមអង្គហេតុដែលមិនអាចមើលស្រាលបាន លោកសូមស្នើសុំឱ្យទីភ្នាក់ងារនេះបើកការស៊ើបអង្កេត។ ឆ្លើយតបទៅនឹងលិខិតនេះ គណបក្សរបស់លោកណឺតាន់យ៉ាហ៊ូរឹតនិយាយបន្ទរថា «ការបោះឆ្នោតនៅអ៊ីស្រាអែលលើកនេះមានការលួចបន្លំ។ ការជ្រៀតជ្រែកពីសំណាក់បរទេសចូលទៅក្នុងការបោះឆ្នោតនេះគោលដៅរបស់គេគឺចង់ឱ្យរដ្ឋសភាអ៊ីស្រាអែលស្ថិតនៅក្រោមការគ្រប់គ្រងរបស់បរទេស, ចង់ធ្វើឥស្លាមភាវូបនីយកម្មលើអ៊ីស្រាអែល និងចង់កម្ចាត់រដ្ឋាភិបាលស្ដាំនិយមពីអំណាច។
សារព័ត៌មានក្នុងស្រុកផ្សាយថាសមាជិកខ្លះរបស់គណបក្សលោកណឺតាន់យ៉ាហ៊ូចោទប្រកាន់ថារដ្ឋបរទេសនោះគឺប្រទេសកាតាដែលជនជាតិអ៊ីស្រាអែលភាគច្រើនចាត់ទុកថាជាអ្នកជួយជ្រោមជ្រែងក្រុមហាម៉ាស់។ មិនរង់ចាំយូរទេ កាតាចេញសេចក្ដីបដិសេធច្រានចោលការចោទប្រកាន់នោះ ដោយចាត់ទុកថាជាការចោទដ៏គួរឱ្យអាម៉ាស់ និងដ៏គ្រោះថ្នាក់។ នៅពេលប្រកាសលទ្ធផលឆ្នោតកាលពីព្រឹកថ្ងៃពុធ គណៈកម្មការរៀបចំការបោះឆ្នោតអះអាងថាការសន្និដ្ឋានថាមានរដ្ឋបរទេសជ្រៀតជ្រែកនៅក្នុងការបោះឆ្នោតលើកនេះគឺផ្អែកទៅលើប្រភពព័ត៌មានពីភ្នាក់ងារស៊ើបការណ៍សម្ងាត់។ បញ្ហានេះមិនប៉ះពាល់លទ្ធផលឆ្នោតស្ថាពរទេ ហើយក៏មិនបង្កការបារម្ភអ្វីធំដុំសម្រាប់ប្រជាជនអ៊ីស្រាអែលនោះដែរ៕ ប្រភព៖ AP
ចែករំលែកព័តមាននេះ