ទីក្រុងហុងកុង៖ អភិបាលទីក្រុងហុងកុង លោកចនលី (John Lee) បានសូមអភ័យទោសចំពោះករណីឆេះអគារស្នាក់នៅរបស់ប្រជាជនកាលពីខែវិច្ឆិកា ឆ្នាំ២០២៥ដែលបណ្ដាលឱ្យស្លាប់មនុស្ស១៦៨នាក់ និងរបួសរាប់សិបនាក់ទៀត។ ចំណែករដ្ឋមន្ត្រីក្រសួងគ្រប់គ្រងលំនៅដ្ឋានរបស់ហុងកុងបានលាលែងពីតំណែងចំពោះអសមត្ថភាពក្នុងការដោះស្រាយបញ្ហា។ ចំណាត់ការនេះកើតមានឡើងបន្ទាប់ពីក្រុមអ្នកស៊ើបអង្កេតស្រាវជ្រាវឃើញថាមានចំណុចចន្លោះប្រហោងជាច្រើនដែលធ្វើឱ្យការគ្រប់គ្រងបញ្ហានេះគ្មានប្រសិទ្ធភាព។
យោងតាមលោកចនលី លទ្ធផលស្រាវជ្រាវរកឃើញថាមានចំណុចខ្វះខាតនៅក្នុងការអនុវត្តបទបញ្ញត្តិនៃសំណង់។ សូមរំលឹកថាអគ្គិភ័យនៅក្នុងគ្រានោះគ្រាន់តែចាប់ផ្ដើមភ្លាមក៏បានរីករាលដាលយ៉ាងឆាប់រហ័សដោយគ្មានអ្វីអាចទប់ស្កាត់បានឡើយ។ គាប់ជួននៅពេលនោះ ម្ចាស់អគារកំពុងដាក់រន្ទា និងសំណាញ់ជ័រដើម្បីជួសជុលកែលម្អអគារថែមទៀត។ ដូច្នេះ របស់ទាំងនេះប្រៀបដូចជាការជួយជំរុញឱ្យភ្លើងឆេះកាន់តែលឿន។ ក្រៅពីសម្លាប់មនុស្សជាច្រើននាក់ អគ្គិភ័យនេះក៏បានបង្ខំឱ្យមនុស្សរាប់ពាន់នាក់ផ្លាស់ប្ដូរទីកន្លែងរស់នៅផងដែរ។
អតីតអ្នករស់នៅសំណង់អគារវ៉ាងហ្វ៊ូកខត (Wang Fuk Court) ចំណាយពេលជិតមួយឆ្នាំហើយដើម្បីរង់ចាំមើលដំណោះស្រាយរបស់រដ្ឋអំណាចហុងកុងចំពោះបញ្ហាដែលពួកគេកំពុងតែប្រឈម។ លោកចនលី និងមន្ត្រីកំពូលៗរបស់លោកចំនួន៧រូបទៀតបានលំឱនកាយបន្តិចដើម្បីសូមអភ័យទោសចំពោះការខ្វះខាតដែលបណ្ដាលឱ្យមានអគ្គិភ័យនោះ។ លោកលីថ្លែងថារដ្ឋមន្ត្រីក្រសួងរៀបចំលំនៅដ្ឋាន លោកស្រីវីននីហូ (Winnie Ho) គួរតែជាអ្នកទទួលខុសត្រូវផ្នែកនយោបាយចំពោះរឿងនេះ ទោះបីគេមិនបានរកឃើញថាមានកំហុសឆ្គងផ្ទាល់ខ្លួនក៏ដោយ។ លោកថាលោកស្រីហូបានលាលែងពីតំណែងកាលពីម្សិលមិញ។
គណៈកម្មការឯករាជ្យមួយស្រាវជ្រាវឃើញថាក្រសួងគ្រប់គ្រងលំនៅដ្ឋានមិនបានបំពេញភារកិច្ចរបស់ខ្លួនក្នុងការត្រួតពិនិត្យមើលដំណើរការជួសជុលអគារដែលឆេះនោះទេ។ លោកលីថ្លែងថាមន្ទីរគ្រប់គ្រងលំនៅដ្ឋាន នាយកដ្ឋានគ្រប់គ្រងអគ្គិភ័យ និងនាយកដ្ឋានពលកម្មសុទ្ធតែបំពេញការងាររបស់ខ្លួនមិនបានដិតដល់ក្នុងការចាត់ចែងការងារទៅលើសំណង់អគារដែលឆេះ។ របាយការណ៍របស់គណៈកម្មការស៊ើបអង្កេតរកឃើញភស្តុតាងបង្ហាញថាមូលហេតុនៃការឆេះនេះផ្ដើមចេញពីកន្ទុយបារីដែលបន្សល់ទុករងើកភ្លើង។ ក្រុមអ្នកជំនាញរកឃើញការប្រើប្រាស់បន្ទះក្ដារជ័រ សំណាញ់ និងផ្ទាំងកំណាត់ដែលប្រើប្រាស់សម្រាប់ជួសជុលអគារជារបស់ដែលរួមចំណែកយ៉ាងសកម្មក្នុងការជួយធ្វើឱ្យភ្លើងឆាបឆេះកាន់តែខ្លាំង៕ ប្រភព៖ Asia
ចែករំលែកព័តមាននេះ