ទីក្រុងកៀវ៖ ថ្ងៃនេះ រុស្ស៊ីបញ្ជូនដ្រូនទៅវាយប្រហាររថភ្លើងដែលមានមនុស្សកំពុងប្រមូលផ្ដុំយ៉ាងច្រើនកុះករបណ្ដាលឱ្យពួកគេស្លាប់យ៉ាងតិច១៤នាក់។ ហេតុការណ៍នេះកើតឡើងនៅទីក្រុងឌីនីប្រូ (Dnipro)។ រុស្ស៊ីក៏វាយប្រហារទីក្រុងដទៃទៀតចំនួន៥កន្លែងទាំងកណ្ដាលថ្ងៃផងដែរទោះបីបទឈប់បាញ់នៅតំបន់ខឺសុនផ្ដល់ជាក្ដីសង្ឃឹមថាអាចនឹងមានការចរចាគ្នាផ្នែកការទូតឡើងវិញយ៉ាងណាក្ដី។ មនុស្សជំទង់២នាក់ស្លាប់នៅតាមដងវិថីនៃទីក្រុងឆឺននីហ៊ីវ (Chernihiv) ស្ថិតនៅប្រទេសអ៊ុយក្រែនភាគខាងជើង។
ក្រៅពីនេះ មនុស្ស៣នាក់ស្លាប់ដោយសារការវាយប្រហាររបស់រុស្ស៊ីទៅលើអគារស្នាក់នៅមួយកន្លែងនៃទីក្រុងក្រេមេនឈូក (Kremenchuk)។ នាយករដ្ឋមន្ត្រីអ៊ុយក្រែន លោកសឺហ្គី កូរ៉េតស្គី (Sergiy Koretskyi) បង្ហោះសារនៅលើតេឡេក្រាមថារុស្ស៊ីមានចេតនាប្រមាញ់អាយុជីវិតជនស៊ីវិលនៅលើរថភ្លើង នៅស្ថានីយរថភ្លើង និងនៅក្នុងអគារស្នាក់នៅ។ អំពើភេរវកម្មនេះមិនអាចយកអ្វីមកធ្វើជាអំណះអំណាចដើម្បីបង្ហាញអំពីភាពសមហេតុផលទាល់តែសោះ។ រុស្ស៊ីចង់ធ្វើឱ្យប្រាកដថាកុំស្មានថាមានបទឈប់បាញ់នៅទីក្រុងអូឡេស្គី ខ្លួនក៏ឈប់វាយប្រហារ។ បទឈប់បាញ់អនុវត្តតែនៅក្នុងទីក្រុងដែលភាគីទាំង២ព្រមព្រៀងគ្នាប៉ុណ្ណោះ។
នៅទីកន្លែងដទៃទៀត ដ្រូន និងមីស៊ីលរបស់រុស្ស៊ីបន្តវាយប្រហារប្រព័ន្ធហេដ្ឋារចនាសម្ព័ន្ធសំខាន់ៗរបស់អ៊ុយក្រែន រួមទាំងបណ្ដាញផ្លូវដែកផងដែរ ជាហេតុធ្វើឱ្យជីវិតរស់នៅរបស់ប្រជាជនប្រឈមនឹងបញ្ហាលំបាកកាន់តែខ្លាំងឡើងៗចំពេលដែលស្ថានភាពសេដ្ឋកិច្ចកំពុងយ៉ាប់ស្រាប់ទៅហើយនោះ។ ឆ្លៀតឱកាសដែលអ៊ុយក្រែនគ្មានប្រព័ន្ធការពារដែនអាកាសគ្រប់គ្រាន់សម្រាប់បាញ់ទម្លាក់ដ្រូន និងមីស៊ីល រុស្ស៊ីសម្រុកវាយប្រហារកាន់តែខ្លាំង។ ក្រុមហ៊ុនអាយស្ម័យយានរបស់រដ្ឋថ្លែងថាដ្រូនដែលបំពាក់ម៉ាស៊ីនកម្លាំងខ្លាំងមួយគ្រឿងវាយប្រហារស្ថានីយរថភ្លើងសំខាន់នៅទីក្រុងឌីនីប្រូនៅពេលរថភ្លើងមួយគ្រឿងត្រៀមចាកចេញដំណើរឆ្ពោះទៅទីក្រុងហ្សាប៉ូរីហ្សៀ។
តាមរយៈរូបភាពដែលបង្ហោះដោយប្រធានាធិបតីហ្សេឡិនស្គី គេឃើញសាកសពមនុស្សដេករដូករណែលពាសពេញដី និងឃើញក្រុមអ្នកជួយសង្គ្រោះប្រញាប់សែងអ្នករបួសដាក់លើប្រង់កាទៅមន្ទីរពេទ្យ។ នៅទីក្រុងឆឺនីហ៊ីវ ក្រៅពីមនុស្សស្លាប់២នាក់ មនុស្ស២៣នាក់ទៀតរងរបួសដោយសារការវាយប្រហារពីសំណាក់ដ្រូនរបស់រុស្ស៊ីទៅលើដងវិថីមួយខ្សែដែលមានមនុស្សធ្វើដំណើរយ៉ាងមមាញឹក។ នៅក្រេមេនឈូក (Kremenchuk) ការវាយប្រហារទៅលើអគារស្នាក់នៅបណ្ដាលឱ្យស្លាប់មនុស្ស៣នាក់ និងរបួស១៥នាក់។ នេះបើយោងតាមការបញ្ជាក់ពីអភិបាលនៃគណៈអភិបាលតំបន់។ ឆ្លើយតបចំពោះការវាយប្រហារទៅលើទីក្រុងឌីនីប្រូ លោកហ្សេឡិនស្គីជំរុញឱ្យក្រុមប្រទេសជាដៃគូបន្តដាក់សម្ពាធរុស្ស៊ីឱ្យបានខ្លាំងបន្ថែមទៀត៕ ប្រភព៖ Asia One
ចែករំលែកព័តមាននេះ