ទីក្រុងវ៉ាស៊ីនតោន៖ អាមេរិកព្រមានក្រុមសម្ព័ន្ធមិត្តរបស់ខ្លួនថាត្រូវប្រុងប្រយ័ត្នឱ្យមែនទែនព្រោះអាចនឹងមានការវាយប្រហារពីសំណាក់យោធាអុីរ៉ង់។ មន្ត្រីរដ្ឋាភិបាលអាមេរិកបានជម្រាបប្រាប់បណ្ដាសម្ព័ន្ធមិត្តនៅមជ្ឈិមបូព៌ាថាត្រូវតែត្រៀមលក្ខណៈសម្បត្តិទុកឱ្យហើយដើម្បីត្រៀមទប់ទល់នឹងលទ្ធភាពនៃការវាយប្រហារពីសំណាក់យោធាអុីរ៉ង់ក្រោយការបោះឆ្នោតសភានៅអាមេរិកនាសប្ដាហ៍ក្រោយ ហើយពួកគេក៏ត្រូវត្រៀមទប់ទល់នឹងលទ្ធភាពដែលអុីរ៉ង់វាយប្រហារពួកគេដើម្បីសងសឹកផងដែរ។ នេះបើយោងតាមអ្នកការទូត២រូបដែលដឹងកិច្ចការផ្ទៃក្នុង។
លោកដូណាល់ត្រាំមិនទាន់សម្រេចចិត្តជាលើកចុងក្រោយថានឹងវាយប្រហារអុីរ៉ង់ជាថ្មីទេ។ នេះបើយោងតាមការបញ្ជាក់បន្ថែមពីអ្នកការទូតទាំងនោះ។ ប៉ុន្តែលោកនិយាយញយដងហើយថាលោកកំពុងថ្លឹងថ្លែងថាតើត្រូវប្រើប្រាស់ចំណាត់ការយោធាឬយ៉ាងណាក្រោយការបោះឆ្នោតនៅអាមេរិកនាថ្ងៃទី៣ ខែវិច្ឆិកា។ ការគំរាមកំហែង និងការជំរុញជាថ្មីពីសំណាក់អាមេរិកឱ្យក្រុមសម្ព័ន្ធមិត្តរបស់ខ្លួនត្រៀមទប់ទល់នឹងលទ្ធភាពនៃការសងសឹករបស់អុីរ៉ង់រឹតតែធ្វើឱ្យស្ថានការណ៍នៅមជ្ឈិមបូព៌ាឡើងកម្ដៅ ហើយធ្វើឱ្យគេបារម្ភថាស្រួលមិនស្រួលប្រតិបត្តិការសឹកទ្រង់ទ្រាយធំអាចនឹងកើតឡើងសាជាថ្មី។
អ្នកសារព័ត៌មានព្យាយាមទាក់ទងទៅសេតវិមាន និងមន្ត្រីរដ្ឋាភិបាលអាមេរិកដើម្បីស្នើសុំការឆ្លើយបំភ្លឺ ប៉ុន្តែគ្មានការឆ្លើយតបទេ។ រដ្ឋមន្ត្រីការបរទេសអុីរ៉ង់ លោកអារ៉ាក់ឈី បង្ហោះសារនៅលើបណ្ដាញអ៊ិចកាលពីម្សិលមិញថារដ្ឋាភិបាលរបស់លោកនៅតែបន្តចាត់ទុកមធ្យោបាយការទូតជាមាគ៌ាឆ្ពោះទៅរកការដោះស្រាយបញ្ហាដោយជោគជ័យជានិច្ច។ រដ្ឋាភិបាលរបស់លោកកំពុងសហការជាមួយក្រុមប្រទេសអន្តរការីដើម្បីឱ្យពួកគេពិនិត្យមើលលក្ខខណ្ឌរបស់អុីរ៉ង់ដែលដាក់បញ្ចូលនៅក្នុងផែនការសន្តិភាពកាលពីខែកញ្ញា (ផែនការនោះត្រូវលោកត្រាំបដិសេធភ្លាមៗ)។ អុីរ៉ង់សង្ឃឹមថាផែនការសន្តិភាពនោះអាចបានជាមូលដ្ឋាននៃការវិលទៅរកបទឈប់បាញ់ជាថ្មី។
ទន្ទឹមនឹងនោះ ក្រសួងការបរទេសរបស់ប្រទេសអារ៉ាប់រួមបានចេញសេចក្ដីថ្លែងការណ៍មួយជំរុញឱ្យគ្រប់ភាគីទាំងអស់ប្រើប្រាស់គតិបណ្ឌិត និងបន្តគាំទ្រដំណោះស្រាយតាមផ្លូវនយោបាយដើម្បីទប់ស្កាត់ភាពតានតឹង និងទប់ស្កាត់ការវិលត្រឡប់មកវិញជាថ្មីនៃប្រតិបត្តិការសឹកទ្រង់ទ្រាយធំ។ អាមេរិកបានប្រាប់សម្ព័ន្ធមិត្តរបស់ខ្លួនថាចំណាត់ការយោធាលើកនេះអាចនឹងអូសបន្លាយពេលជាច្រើនថ្ងៃ។ ទោះជាបែបនេះក្ដី មន្ត្រីរដ្ឋាភិបាលប្រទេសនៅក្នុងតំបន់យល់ថាអុីរ៉ង់ និងក្រុមសម្ព័ន្ធមិត្តរបស់អុីរ៉ង់មុខជាមិននៅស្ងៀមទេ។ ពួកគេមុខជាវាយប្រហារសងសឹកវិញជាមិនខាន។ ដូច្នេះ សង្គ្រាមអាចនឹងអូសបន្លាយពេលយូរ៕ ប្រភព៖ AP
ចែករំលែកព័តមាននេះ