ទីក្រុងកៀវ៖ ជំនួយមនុស្សធម៌ចាប់ផ្ដើមដឹកជាបណ្ដើរៗចូលទីក្រុងអូឡេស្គី (Oleshky) ដែលកំពុងប្រឈមនឹងវិបត្តិធ្ងន់ធ្ងរ។ នេះបើយោងតាមមន្ត្រីរដ្ឋាភិបាលអ៊ុយក្រែន។ បទឈប់បាញ់រវាងរុស្ស៊ី និងអ៊ុយក្រែននៅទីក្រុងនេះបន្តអនុវត្តឈានចូលដល់ថ្ងៃទីបីហើយ ខណៈដែលពួកយោធាចាប់ផ្ដើមដោះមីននៅជុំវិញទីក្រុងនេះ។ រុស្ស៊ី និងអ៊ុយក្រែនបន្តឃ្លាំមើលការអនុវត្តបទឈប់បាញ់ចាប់តាំងពីថ្ងៃអង្គារសប្ដាហ៍នេះ ទោះបីសង្គ្រាមបន្តកើតឡើងនៅទីកន្លែងដទៃទៀតដោយមិនទាន់មានសញ្ញាច្បាស់លាស់ថានឹងបញ្ចប់ទៅវិញនៅពេលណាទេ។
តាមគម្រោង អាមេរិក រុស្ស៊ី និងអ៊ុយក្រែននឹងចាប់ផ្ដើមជួបគ្នាជាថ្មីត្រីភាគីនៅទីក្រុងអាប៊ូដាប៊ី ប្រទេសអារ៉ាប់រួម នាខែវិច្ឆិកា។ គេមិនទាន់ដឹងលម្អិតអំពីរបៀបវារៈនៃគម្រោងជួបគ្នានៅឡើយទេ។ កាលពីពេលកន្លងមកក៏ធ្លាប់មានបទឈប់បាញ់របៀបដូចនៅទីក្រុងអូឡេស្គីដែរ ប៉ុន្តែឈប់បាញ់មិនបានប៉ុន្មានផងក៏ចាប់ផ្ដើមផ្ទុះអាវុធសាជាថ្មី។ ឥឡូវនេះ គេកំពុងរង់ចាំមើលថាតើបទឈប់បាញ់លើកនេះនឹងអូសបន្លាយពេលបានកម្រិតណា។
នៅទីកន្លែងដទៃទៀត សមរភូមិបន្តកើតឡើងយ៉ាងក្ដៅគគុក។ ដ្រូនមួយគ្រឿងរបស់រុស្ស៊ីដែលបំពាក់ម៉ាស៊ីនកម្លាំងខ្លាំងបានវាយប្រហាររថភ្លើង២ខ្សែដែលឈប់ស្ងៀមនៅចំណតនៃប្រទេសអ៊ុយក្រែនភាគកណ្ដាល បណ្ដាលឱ្យស្លាប់មនុស្ស១៣នាក់ និងរបួស១០នាក់។ ប្រធានាធិបតីអ៊ុយក្រែន លោកហ្សេឡិនស្គី បង្ហោះសារនៅលើបណ្ដាញអ៊ិច ដោយចាត់ទុកថានេះជាការវាយប្រហារដ៏សាហាវឃោរឃៅព្រោះវាយចំរថភ្លើងដឹកអ្នកដំណើរនៅតំបន់ឌីនីប្រូ។
រុស្ស៊ីក៏រងការវាយប្រហារពីអ៊ុយក្រែនវិញដែរ។ ក្រសួងការពារជាតិរុស៊ីប្រកាសថាប្រព័ន្ធការពារដែនអាកាសរបស់ខ្លួនបាញ់ទម្លាក់ដ្រូនរបស់អ៊ុយក្រែនសរុប១២១៤គ្រឿងកាលពីយប់មិញ។ នេះជាការបញ្ជូនដ្រូនទៅវាយប្រហាររុស្ស៊ីដ៏ច្រើនបំផុតមួយចាប់តាំងពីសង្គ្រាមផ្ទុះឡើងដំបូង។ នៅក្នុងចំណោមដ្រូនទាំងនោះ ពាក់កណ្ដាលហោះសំដៅទៅទីក្រុងម៉ូស្គូ។ នេះបើយោងតាមអះអាងរបស់អភិបាលនៃគណៈអភិបាលទីក្រុងម៉ូស្គូ លោកសឺហ្គេ សូប៊ីយ៉ានីន៕ ប្រភព៖ AP
ចែករំលែកព័តមាននេះ