យេម៉ែន-អារ៉ាប៊ីសាអូឌីត ៖ ក្រុងតាអេសជាទីក្រុងធំទី៣របស់យេម៉ែន ទីប្រជុំជននៃខេត្តមានឈ្មោះដូចគ្នានេះ ត្រូវបានពួកឧទ្ទាមហ៊ូធីឡោមព័ទ្ធបិទផ្លូវ ដែលភ្ជាប់ទីក្រុងនោះទៅក្រុងអាដេន ស្ថិតក្រោមការត្រួតត្រារបស់រដ្ឋាភិបាលយេម៉ែនទទួលស្គាល់ដោយអន្តរជាតិ ។ ស្នងការជាន់ខ្ពស់អ.ស.ប ទទួលបន្ទុកសិទ្ធិមនុស្សកាលពីថ្ងៃទី២០ តុលា បានទាមទារឲ្យបើកច្រកមនុស្សធម៌មួយនៅក្រុងតាអេស ជាប់ការឡោមព័ទ្ធតាំងពីដើមខែតុលាមក ដោយពួកឧទ្ទាមហ៊ូធីស្និទ្ធអ៉ីរ៉ង់។
ក្នុងសេចក្ដីប្រកាសមួយ លោកវ៉ុល កូតួក នាយស្នងការសិទ្ធិមនុស្សអ.ស.ប បានចេញការប្រកាសអាសន្នថា ការបិទផ្លូវថ្នល់តែមួយនេះភ្ជាប់ក្រុងនោះទៅក្រុងអាដេន នាំឲ្យបណ្ដាជនស៊ីវិលស្ថិតក្នុងគ្រោះថ្នាក់ធ្ងន់ធ្ងរបំផុត ព្រោះស្ទះដល់ការបញ្ជូនជំនួយមនុស្សធម៌ និងរបស់របរចាំបាច់នានា ។ ស្បៀងនៅក្រុងនេះ ចាប់ផ្ដើមខ្វះក៏ដូចជាទឹកស្អាត ។ ជាមួយការប្រយុទ្ធគ្នាដែលកាន់តែខិតមកដល់ ក្នុងតំបន់មានប្រជាជនរស់នៅច្រើនកុះករនោះ គ្រោះថ្នាក់ចំពោះបណ្ដាជនស៊ីវិលមានកាន់តែខ្ពស់ខ្លាំងបំផុត។
ចំពោះសង្គ្រាមនៅយេម៉ែនប្រទេសអង់គ្លេសនឹងបញ្ជូនបណ្ដាយន្តហោះប្រយុទ្ធទៅជួយអារ៉ាប៊ីសាអូឌីត ក្នុងការប្រឈមមុខជាមួយពួកហ៊ូធី ។ តាមក្រសួងការពារប្រទេសអង់គ្លេសថា បណ្ដាយន្តហោះប្រយុទ្ធអង់គ្លេសនឹងដាក់ពង្រាយ ក្នុងពេលឆាប់ៗដោយមានបេសកកម្មការពារប៉ុណ្ណោះ ។
គោលដៅគឺជួយការពារបណ្ដាទីក្រុងកំពង់ផែព្រលានយន្តហោះ និងហេដ្ឋារចនាសម្ព័ន្ធប្រេងអារ៉ាប៊ីសាឌីត ដែលតែងរងការវាយប្រហារពីសំណាក់ពួកហ៊ូធី ។ អង់គ្លេសស្វែងរកជួយអារ៉ាប៊ីសាអូឌីត ពេលដែលពួកលោកខាងលិច ពិសេស អាមេរិកបដិសេធមិនចូលរួមក្នុងជម្លោះថែមទៀត ៕
ចែករំលែកព័តមាននេះ