សង្គ្រាមអ៊ុយក្រែន ៖ តើទំនាក់ទំនងកាន់តែតានតឹង រវាងអ៊ុយក្រែននិងសហរដ្ឋអាមេរិក កំពុងតែមានការកែលំអឡើងវិញឬយ៉ាងណា? កាលពីយប់ថ្ងៃទី២០ តុលា ប្រធានាធិបតីអ៊ុយក្រែន លោកវ៉ូឡូឌីមៀរ ហ្សេឡេនស្គី បានជួបជាមួយបេសកជនពិសេសអាមេរិក លោក STEVE WITKOFF នៅក្រុងអូស្លូន័រវែស ។
នាឱកាសនោះ ប្រធានាធិបតីអ៊ុយក្រែនឲ្យដឹងថា ការចែករំលែកព័ត៌មានស៊ើបការណ៍របស់អាមេរិក មានដំណើរការល្អជាថ្មី ដែលអាចឲ្យប្រទេសលោកដឹងមុនពីការវាយប្រហាររបស់រុស្ស៊ីនាពេលខាងមុខ ។ លោកក៏និយាយដែរពីទំនុកចិត្ត ដែលការពិភាក្សាស្ដីពី STARLINK និងការផ្ដល់មីស៊ីលប៉ាទ្រីយ៉ូត ក៏នឹងទទួលបានច្រកចេញជាវិជ្ជមានមួយដែរ ។
ទំនាក់ទំនងរវាងលោកហ្សេឡេនស្គី និងប្រធានាធិបតីអាមេរិក លោកដូណាល់ត្រាំ មានភាពតានតឹង ។ លោកត្រាំធ្លាប់និយាយថា ធ្វើការជាមួយលោកពូទីនស្រួលជាងធ្វើការជាមួយលោកហ្សេឡេនស្គី ។ ប្រធានាធិបតីអ៊ុយក្រែន កាលពីថ្ងៃទី១៩ តុលា បានចោទប្រកាន់អាមេរិកថា មានការយឺតយ៉ាវក្នុងការផ្ដល់ដល់ប្រទេសលោកបណ្ដាមីស៊ីលស្ទាក់កម្ទេច ។
លោកហ្សេឡេនស្គីបរិហារផងដែរថា ប្រទេសលោកមិនទទួលបានការព្រមានឲ្យដឹងមុនពីការវាយប្រហាររបស់រុស្ស៊ីពីសំណាក់បណ្ដាសម្ព័ន្ធមិត្ត និងថា ការភ្ជាប់់ទំនាក់ទំនងជាមួយប្រព័ន្ធផ្កាយរណបស៊ើបការណ៍ STARLINK នៅមានកម្រិតក្នុងតំបន់មួយចំនួននៃរណសិរ្ស ។
នៅមុខព្រឹទ្ធសភាអាមេរិកលោកហ្សេឡេនស្គីអះអាងថា មន្ទីរប៉ង់តាហ្គោនមានការយឺតយ៉ាវ ក្នុងការផ្ដល់មីស៊ីលដែលបង់ប្រាក់រួចហើយ ដោយបណ្ដាប្រទេសអឺរ៉ុប ។ ពេលដែលទំនាក់ទំនងរបស់លោកជាមួយប្រធានាធិបតីអាមេរិកកំពុងធ្លាក់ចុះ លោកហ្សេឡេនស្គីវាយតម្លៃថា ប្រមុខសេតវិមានកាន់តែខិតទៅជិតស្និទ្ធជាមួយលោកពូទីននិងធ្វើសេចក្ដីសម្រេចចិត្តខាងនយោបាយមួយ កាត់បន្ថយការទ្រទ្រង់ចំពោះក្រុងគៀវ ។
ប្រធានាធិបតីអាមេរិក លោកដូណាល់ត្រាំអះអាងថា លោកគ្រោងជួបជាមួយសមភាគីរុស្ស៊ី លោកវ្ល៉ាឌីមៀរពូទីន និងសមភាគីចិន លោកស៊ីជីនពីង នាខែខាងមុខនេះនៅចិន ។ ពិតណាស់ ការជួបគ្នាកំពូលត្រីភាគិនោះនឹងផ្ដោតជាពិសេស លើការរកច្រកចេញសម្រាប់បញ្ចប់សង្គ្រាមនៅអ៊ុយក្រែន ៕
ចែករំលែកព័តមាននេះ