មន្ត្រីឧទ្យានុរក្សចុះល្បាតប្រទះឃើញបទល្មើសលួចកា.ប់ដើមស្រល់នៅគិរីរម្យ ខណៈជនល្មើសរត់គេចបាត់ បន្សល់ទុកវត្ថុតាងមួយចំនួន
- កំពង់ស្ពឺ
ខេត្តកំពង់ស្ពឺ៖ ដើមស្រល់មួយដើមត្រូវបានប្រទះឃើញ ជនខិលខូចលួចកាប់ ផ្តួលរលំពុះជាចម្រៀក ក្រោយពីកម្លាំងមន្ត្រីឧទ្យានុរក្សការិយាល័យឧទ្យានជាតិគិរីរម្យ ធ្វើការល្បាត។
ការប្រទះឃើញជនខិលខូចលួចកាប់ដើមស្រល់ ផ្តួលរលំកាលពីថ្ងៃទី៧ ខែតុលា ឆ្នាំ២០២៦នៅចំណុចភ្នំហាមឃាត់ ស្ថិតនៅក្នុងភូមិសាស្ត្រឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ។
មន្ត្រីឧទ្យានុរក្សគីរីរម្យបាននិយាយឱ្យដឹងថា នៅមុនពេលប្រទះឃើញជនខិលខូចលួចកាប់ដើមស្រល់ក្នុងតំបន់ការពារ គឺនៅថ្ងៃទី៧ ខែតុលា ឆ្នាំ២០២៦ លោក ស្រ៊ុន ប៊ុនថា បាន ដឹកនាំមន្ត្រីឧទ្យានុរក្សការិយាល័យឧទ្យានជាតិគិរីរម្យចំនួន៥នាក់ ចុះធ្វើការល្បាតឃ្លាំមើលបទល្មើសផ្សេងៗ។ ហើយក៏ប្រទះឃើញ មានការកាប់ ផ្តួលរលំ បំផ្លាញព្រៃឈើ(អារឈើ) នៅចំណុចភ្នំហាមឃាត់ ត្រង់និយាមកា ៣៩៥៩៩៥-១២៥២១៨៧ ស្ថិតក្នុងភូមិសាស្ត្រឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ ក្នុងឧទ្យានជាតិព្រះសុរាម្រិត-កុសមៈ«គិរីរម្យ»នៅទីតាំងប្រទះឃើញ ឈើអារប្រភេទលេខ២ ប្រភេទដើម (ស្រល់) មុខកាត់ ០,៤០ គុណនឹង០,៤០ ប្រវែង៣ម៉ែត្រ ចំនួន៤សន្លឹក រណាយន្តធុនធំ(០៧០)ចំនួន១គ្រឿង ដែលជនខិលខូចបន្សល់ទុកផងដែរ។
មន្ត្រីឧទ្យានុរក្សគីរីរម្យ បានបន្តទៀតថា ក្រោយឃើញវត្ថុតាង និងមធ្យោបាយប្រព្រឹត្តបទល្មើសខាងលើរួចមក មន្ត្រីជំនាញកំពុងបន្តធ្វើការស្រាវជ្រាវ ស្វែងរកអ្នកដែលប្រព្រឹត្តដើម្បីចាត់ការបន្តតាមនីតិវិធី ក្រមបរិស្ថាន និងធនធានធម្មជាតិ៕
ចែករំលែកព័តមាននេះ