រដ្ឋាភិបាលចំណាយជិត៥០០លានដុល្លារ ដើម្បីទប់ទល់នឹងថ្លៃប្រេង និងថ្លៃអគ្គិសនី
- ភ្នំពេញ
សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានឲ្យដឹងថា រដ្ឋាភិបាលកម្ពុជាបានចំណាយសរុបមកដល់ពេលនេះជិត៥០០ លានដុល្លារ ទប់ថ្លៃប្រេង និងថ្លៃភ្លើង ។
សម្តេចធិបតី បានថ្លែងនៅព្រឹកថ្ងៃទី៧ ខែតុលា ថា «ប្រសិនបើរដ្ឋាភិបាលមិនដាក់ចេញវិធានការផ្សេងៗ និងកញ្ចប់ថវិកាទប់ទេ វិបត្តិអសន្តិសុខថាមពលអាចឲ្យតម្លៃប្រេងឥន្ធនៈនៅកម្ពុជាឡើងថ្លៃលើសពីបច្ចុប្បន្នដែលឃើញពី ៩ទៅ១០ភាគរយ»។
សម្តេចធិបតីបានប្រកាសថា ស្ថានការណ៍ពិភពលោកវាធ្វើឲ្យតម្លៃប្រេងប្រែប្រួលខ្លួនណាស់ ហើយរដ្ឋាភិបាលបានខិតខំដោះស្រាយលើបញ្ហានេះ ។
ខណៈដែលតម្លៃប្រេងឆៅនៅលើទីផ្សារអន្តរជាតិប្រែប្រួលខ្លាំង ក្រោយសង្គ្រាមនៅអ៊ីរ៉ង់រយៈពេល៨ខែ នៃឆ្នាំ២០២៦នេះ កម្ពុជាបានបង្កើនការចំណាយលើការនាំចូលប្រេងឥន្ធនៈដល់ទៅ៤០ភាគរយ ។
ស្ថិតិដែលប្រភពផ្តល់ឲ្យបានឲ្យដឹងថា នៅក្នុងរង្វង់ពីខែមករា ដល់ខែសីហា ឆ្នាំ២០២៦ កម្ពុជាចំណាយលើការនាំចូលប្រេងឥន្ធនៈសរុប មានតម្លៃដល់ទៅ៣,៣៨ពាន់លានដុល្លារ ។
គិតត្រឹមព្រឹកថ្ងៃទី៧ ខែតុលា តម្លៃប្រេងសាំងធម្មតាលក់នៅតាមស្ថានីយប្រេងឥន្ធនៈមានតម្លៃ៥.១៥០ រៀល ប្រេងម៉ាស៊ូត៥.៦៥០ រៀល ហើយប្រេងស៊ុបពែរ គឺ ៦.២០០ រៀលនៅក្នុងមួយលីត្រ ៕
ចែករំលែកព័តមាននេះ