ទីក្រុងវ៉ាស៊ីនតោន៖ អនុប្រធានាធិបតីអាមេរិក លោកជេឌីវេន ថ្លែងនៅក្នុងបទសម្ភាសផ្ដាច់មុខជាមួយទីភ្នាក់ងារព័ត៌មានរ៉យទ័រថាអ៊ីរ៉ង់ត្រូវតែកាត់បន្ថយការចម្រាញ់សារធាតុវិទ្យុសកម្មឱ្យបានច្រើនដើម្បីធានាថាខ្លួនមិនផលិតអាវុធនុយក្លេអ៊ែរ។ លុះត្រាតែធ្វើបែបនេះទើបអាមេរិកស្ងប់ចិត្ត ហើយយល់ព្រមបិទបញ្ចប់សង្គ្រាម។ រហូតមកដល់ពេលនេះ អាមេរិកមិនទាន់ដឹងឱ្យប្រាកដថាតើទីក្រុងតេអេរ៉ង់នឹង សម្រេចចិត្តបែបណានៅក្នុងការចរចា។
លោកជេឌីវេនជាអ្នកមានមតិសង្ស័យច្រើនអំពីការប្រឡូកនៅក្នុងសង្គ្រាមនៅបរទេស។ លោកដើរតួនាទីជាអ្នកនាំមុខនៅក្នុងការចរចាដើម្បីឱ្យមានដំណោះស្រាយបញ្ចប់ជម្លោះ។ លោកធ្លាប់ចរចាឱ្យមានកិច្ចព្រមព្រៀងនៃបទឈប់បាញ់ជាបណ្ដោះអាសន្នកាលពីខែមិថុនា។ ប៉ុន្តែកិច្ចព្រមព្រៀងនោះមានជីវិតរស់នៅមិនយូរប៉ុន្មានក៏បរាជ័យទៅវិញ។ សង្គ្រាមនេះធ្វើឱ្យទីផ្សារថាមពលមានបញ្ហាធ្ងន់ធ្ងរ ហើយក្លាយជាបន្ទុកនយោបាយមួយសម្រាប់លោកដូណាល់ត្រាំ និងក្រុមគណបក្សសាធារណរដ្ឋរបស់លោកមុនការបោះឆ្នោតសភានាខែវិច្ឆិកា។
លោកវេនថ្លែងថាប្រសិនបើចង់ឱ្យមានកិច្ចព្រមព្រៀងលុះត្រាតែអ៊ីរ៉ង់បង្ហាញការប្ដេជ្ញាចិត្តថាខ្លួននឹងមិនផលិតអាវុធនុយក្លេអ៊ែរទេ។ ពោលគឺការមិនចម្រាញ់សារធាតុវិទ្យុសកម្មដែលមានកម្រិតខ្ពស់។ លោកចាត់ទុកថានេះជាចំណុចមូលដ្ឋានដំបូងបំផុតដែលត្រូវដោះស្រាយ។ អ៊ីរ៉ង់ និងអាមេរិកបានប្រគល់សំណើសន្តិភាពឱ្យគ្នាទៅវិញទៅមកកាលពីប៉ុន្មានសប្ដាហ៍ចុងក្រោយនេះដើម្បីបញ្ចប់សង្គ្រាម និងបើកច្រកសមុទ្រហ័រម៉ូសឡើងវិញ។
លោកត្រាំបដិសេធរបាយការណ៍ដែលថាលោកសុខចិត្តធ្វើសម្បទានសម្រាប់អ៊ីរ៉ង់ដូចជាបន្ធូរបន្ថយទណ្ឌកម្មសេដ្ឋកិច្ច និងអនុញ្ញាតឱ្យប្រើប្រាស់ទ្រព្យសម្បត្តិបង្កកទុក។ លោកថារបាយការណ៍នេះមិនពិតទេ។ លោកថែមទាំងព្រមានថាក្រោយការបោះឆ្នោតសភានៅអាមេរិករួច លោកអាចនឹងបង្កើនប្រតិបត្តិការសឹកកាន់តែខ្លាំងប្រឆាំងនឹងអ៊ីរ៉ង់។ ទោះជាយ៉ាងណាក្ដី លោកជេឌីវេនអះអាងថារដ្ឋាភិបាលរបស់លោកបើកចំហជានិច្ចសម្រាប់ការចរចាឱ្យមានកិច្ចព្រមព្រៀង។ ប៉ុន្តែទន្ទឹមនឹងនោះ លោកចង់ឱ្យអ៊ីរ៉ង់ប្រកាន់ជំហរឱ្យបានប្រាកដប្រជានៅក្នុងបញ្ហានុយក្លេអ៊ែររបស់ខ្លួន។ យើងមិនចង់ស្ដាប់ឮពាក្យសម្ដីដែលនិយាយតែមាត់ទទេនោះទេ យើងចង់ឃើញការអនុវត្តជាក់ស្ដែង៕ ប្រភព៖ Reuters
ចែករំលែកព័តមាននេះ