ទីក្រុងព្យុងយ៉ាង៖ កូរ៉េខាងជើងរិះគន់អាមេរិកពាក់ព័ន្ធនឹងការលក់អាវុធទៅឱ្យតៃវ៉ាន់ និងការបន្តជួយជ្រោមជ្រែងកោះនេះផ្នែកយោធា។ កូរ៉េខាងជើងចោទប្រកាន់ថាទីក្រុងវ៉ាស៊ីនតោនកំពុងតែចាក់សាំងស្រោចពីលើភាពតានតឹងដែលកំពុងមានស្រាប់នៅច្រកសមុទ្រតៃវ៉ាន់។ ខាងលើនេះជាការផ្សាយរបស់ទូរទស្សន៍កូរ៉េខាងជើង ខេស៊ីអឹនអេ (KCNA) នៅថ្ងៃនេះ។ ទូរទស្សន៍នេះបានដកស្រង់ពាក្យសម្ដីរបស់លោកគីមម្យុងឆូល (Kim Myong Chol) ជាអ្នកវិភាគអំពីកិច្ចការបរទេសរបស់កូរ៉េខាងជើង។ លោកថ្លែងថានយោបាយរបស់អាមេរិកនៅក្នុងបញ្ហាកោះតៃវ៉ាន់ជាការធ្វើឱ្យចុះខ្សោយសន្តិភាព និងស្ថិរភាពនៅក្នុងតំបន់។
បទវិចារណកថានោះប្រកាសថ្កោលទោសការបង្ហាញវត្តមានរបស់យន្តហោះចម្បាំងដែលអាមេរិកលក់ទៅឱ្យតៃវ៉ាន់។ អាមេរិកគួរតែគិតគូរពិចាណាឱ្យបានល្អិតល្អន់ថាតើខ្លួនត្រៀមខ្លួនរួចហើយឬនៅក្នុងការប្រឈមមុខទល់នឹងប្រទេសដ៏មានឥទ្ធិពលដូចជាសាធារណរដ្ឋប្រជាមានិតចិនដើម្បីការពារកោះតៃវ៉ាន់ និងថាតើខ្លួនអាចដោះស្រាយបានទេនូវផលវិបាកដែលនឹងកើតមាននាពេលខាងមុខ។ សុន្ទរកថារបស់កូរ៉េខាងជើងធ្វើឡើងបន្ទាប់ពីយន្តហោះចម្បាំងម៉ាក F-16 ដែលតៃវ៉ាន់កុម្ម៉ង់ទិញពីអាមេរិកតាំងពីឆ្នាំ២០១៩ចាប់ផ្ដើមបញ្ជូនទៅដល់កោះនេះកាលពីសប្ដាហ៍មុន។
តៃវ៉ាន់កុម្ម៉ង់ទិញយន្តហោះនេះចំនួន៦៦គ្រឿង ប៉ុន្តែទើបតែបញ្ជូនទៅបានប៉ុន្មានគ្រឿងប៉ុណ្ណោះ។ ការបញ្ជូនយន្តហោះនេះកើតមានឡើងស្របពេលដែលតៃវ៉ាន់កំពុងប្រឈមនឹងការគំរាមកំហែងផ្នែកយោធាកាន់តែខ្លាំងឡើងៗ។ ទន្ទឹមនឹងនោះ មេដឹកនាំកូរ៉េខាងជើង លោកគីមជុងអ៊ុន សន្យាជួយជ្រោមជ្រែងប្រទេសរុស្ស៊ីជាបន្តទៀតនៅក្នុងសង្គ្រាមប្រឆាំងនឹងអ៊ុយក្រែន។ លោកសន្យាដូចនេះនៅក្នុងលិខិតជូនពរមួយច្បាប់ផ្ញើជូនលោកពូទីននៅក្នុងឱកាសថ្ងៃខួបកំណើតរបស់លោក ហើយដំណឹងនេះត្រូវបានផ្សព្វផ្សាយតាមទូរទស្សន៍កូរ៉េខាងជើងដដែល។
លោកគីមសរសេររៀបរាប់ថាទីក្រុងព្យុងយ៉ាងនឹងបន្តសហការគ្នាជាមួយរុស្ស៊ីនៅក្នុងភាពជាដៃគូយុទ្ធសាស្ត្រស៊ីជម្រៅគ្រប់ជ្រុងជ្រោយ។ លោកជឿជាក់ថា «សង្គ្រាមពលីដើម្បីយុត្តិធម៌» ដែលរុស្ស៊ីកំពុងតែធ្វើដើម្បីការពារអធិបតេយ្យភាពជាតិ ផលប្រយោជន៍ជាតិ និងបូរណភាពទឹកដីនឹងបញ្ចប់ទៅដោយជ័យជម្នះធ្លាក់ទៅខាងរុស្ស៊ីជាមិនខាន។ នៅក្នុងលិខិតនោះ លោកគីមមិនបាននិយាយចំៗអំពីសង្គ្រាមអ៊ុយក្រែនទេ។ កូរ៉េខាងជើងបានបញ្ជូនកងទ័ពចន្លោះពី១៤០០០ទៅ១៥០០០នាក់ទៅរុស្ស៊ីដើម្បីវាយប្រហារអ៊ុយក្រែនចាប់តាំងពីឆ្នាំ២០២៤។ នេះបើយោងតាមការវាយតម្លៃរបស់អ៊ុយក្រែន និងកូរ៉េខាងត្បូង។ ចាប់តាំងពីមានការចុះហត្ថលេខាលើកតិកាសញ្ញាការពារគ្នាទៅវិញទៅមករវាងលោកគីម និងលោកពូទីន ប្រទេសទាំង២ចាប់ផ្ដើមពង្រឹងទំនាក់ទំនងកាន់តែខ្លាំងឡើងៗ៕ ប្រភព៖ Reuters
ចែករំលែកព័តមាននេះ