យេម៉ែន-អារ៉ាប៊ីសាអូឌីត ៖ ពួកឧទ្ទាមហ៊ូធីយេម៉ែន កាលពីថ្ងៃទី៥ តុលា បានធ្វើការវាយប្រហារជាច្រើនលើកបណ្ដាទីតាំងនៅ
អារ៉ាប៊ីសាអូឌីត។ ជាការឆ្លើយតបវិញតួកគី និងប៉ាគីស្ថានជាសម្ព័ន្ធភាពត្រីភាគីជាមួយអារ៉ាប៊ីសាអូឌីត បានប្រកាសពីការបញ្ជូនកងកម្លាំងយោធាទៅជួយក្រុងរីយ៉ាដ ។
ពួកហ៊ូធីប្រកាសថា បានវាយប្រហារនាថ្ងៃទី៥ តុលា ទីតាំងជាច្រើនរបស់អារ៉ាប៊ីសាអូឌីត ជាមួយដ្រូន មីស៊ីលបាលីស្ទិក និង
មីស៊ីលបណ្ដែត ដោយក្នុងចំណោមទីតាំងវាយប្រហារទាំងនេះ មានជាពិសេស ព្រលានយន្តហោះអន្តរជាតិក្រុងរីយ៉ាដ និងរោងចក្រចម្រាញ់ប្រេងកាតរបស់ក្រុមហ៊ុនប្រេង ARAMCO នៅក្រុងរ៉ាប៊ីស។ អ្នកនាំពាក្យយោធារបស់ហ៊ូធីក៏រៀបរាប់ដែរពីការវាយប្រហារ បណ្ដាទីតាំងយោធានិងបណ្ដាព្រលានយន្តហោះនៅភាគខាងត្បូងអារ៉ាប៊ីសាអូឌីត។ នាវេលាល្ងាចថ្ងៃទី៥ តុលា ស្នូរផ្ទុះនានា បានលាន់ឮនៅក្រុងរីយ៉ាដ ។
ជាការតបតវិញ ក្រុមចម្រុះយោធាដឹកនាំដោយអារ៉ាប៊ីសាអូឌីតនៅយេម៉ែន ប្រកាសពីការវាយប្រហារនានាប្រឆាំងបណ្ដាទីតាំងយោធារបស់ហ៊ូធី នៅក្រុងកំពង់ផែហូដីដា ជាប់សមុទ្រក្រហមកាន់កាប់ដោយហូធី ។ អ្នកនាំពាក្យយោធារបស់ក្រុមចម្រុះនោះអះអាងថា កងកម្លាំងជើងទឹក បានកម្ទេចបណ្ដាឃ្លាំងអាវុធបណ្ដាទីតាំងដាក់បណ្ដានាវា ដែលរាយអន្ទាក់ និងរាយគ្រាប់មីននិងបំផ្លាញគម្រោងវាយប្រហារ ប្រឆាំងបណ្ដាផ្លូវសមុទ្រនៅភាគខាងត្បូងនៃសមុទ្រក្រហម ។
បន្ទាប់ពីការវាយបលុកផ្លេកបន្ទោរមួយកាលពីខែកញ្ញា ពួកហ៊ូធីអាចដណ្ដើមយកបានពីកងទ័ពរដ្ឋាភិបាលយេម៉ែនគាំទ្រដោយអារ៉ាប៊ីសាឌីត បណ្ដាដែនដីតាមឆ្នេរសមុទ្រក្រហមនាភាគខាងលិចយេម៉ែន ។ រួចកាលពីថ្ងៃទី៤ តុលា កងទ័ពរដ្ឋាភិបាលគាំទ្រដោយកងយន្តហោះអារ៉ាប៊ីសាអូឌីត ប្រកាសពីការវាយបកធំមួយនិងអះអាងថា បានវាយប្រហារតាមអាកាសជាង១០០០លើក ព្រមទាំងប្រកាសពីការវាយលុកមួយ ឆ្ពោះទៅកាន់រដ្ឋធានីសាណាត្រួតត្រាដោយពួកហ៊ូធីតាំងពីឆ្នាំ២០១៥មក។ ក្នុងសេចក្ដីប្រកាសមួយ ប្រធានាធិបតីយេម៉ែន លោករ៉ាឆាដអាល់អាលីមី ប្រកាសនាពេលមុននេះ ពីការបើកប្រតិបត្តិការយោធាធំមួយ សំដៅដណ្ដើមមកវិញបណ្ដាដែនដីនៃសាធារណរដ្ឋ ហើយពង្រីកអាជ្ញាធររដ្ឋ និងបណ្ដាស្ថាប័នរបស់ខ្លួននៅទូទាំងដែនដីជាតិឡើងវិញ។
ការប្រកាសពីការវាយលុកនេះ បណ្ដាអ្នកសង្កេតការណ៍យល់ថា គេមិនឃើញចំណុចខ្លាំងថា តើប្រធានាធិបតីយេម៉ែនបច្ចុប្បន្ន អាចធ្វើការវាយលុកទ្រង់ទ្រាយធំចាប់ពីពេលនេះ ទៅតាមរបៀបណាឡើយ ក្នុងពេលអ្នកជួយទ្រទ្រង់គឺអារ៉ាប៊ីសាអូឌីតខ្លួនឯង ក៏ពិតជាកំពុងជួបការលំបាកខ្លាំងស្រាប់ និងកំពុងប្រឈមមុខជាមួយការវាយប្រហារពីសំណាក់ពួកហ៊ូធី អំពាវនាវរកអ្នកជួយដែរ ។ បន្ទាប់ពីកិច្ចប្រជុំមួយនៅក្រុងរីយ៉ាដ អារ៉ាប៊ីសាអូឌីត តួកគីនិងប៉ាគីស្ថានដែលទើបបង្កើតជាមួយគ្នានូវសម្ព័ន្ធភាពការពារមួយ បានព្រមព្រៀងគ្នាអនុវត្តកិច្ចព្រមព្រៀងជួយគ្នាទៅវិញទៅមក ដែលចុះហត្ថលេខាកាលពីខែសីហានៅក្រុងឡាម៉ិក ។ តួកគីនិងប៉ាគីស្ថាន បានសម្រេចចាត់បណ្ដាវិធានការចាំបាច់ សម្រាប់ផ្ដល់កម្លាំងយោធានិងសម្ភារយោធា ព្រមទាំងដាក់ពង្រាយដោយឆាប់រហ័សកងកម្លាំងជំនួយនោះនៅអារ៉ាប៊ីសាអូឌីត ។
កាលពីថ្ងៃទី៤ តុលា ពួកហ៊ូធីវាយកាត់ផ្ដាច់់ផ្លូវថ្នល់គន្លឹះមួយ ដែលភ្ជាប់ក្រុងធំទី៣តាអេសភាគនិរតីយេម៉ែន ទៅក្រុងអាដេនដែលជារដ្ឋធានីបច្ចុប្បន្នរបស់រដ្ឋាភិបាលទទួលស្គាល់ដោយអន្តរជាតិ ។ ការបិទផ្លូវថ្នល់នោះរារាំងរដ្ឋាភិបាលក្នុងការបញ្ជូនភស្ដុភារ និងកងកម្លាំងជំនួយទៅកាន់ក្រុងតាអេស ដែលភាគច្រើនស្ថិតក្រោមការកាន់កាប់របស់ខ្លួន ។ ការប្រយុទ្ធគ្នានៅយេម៉ែនមានភាពខ្លាំងក្លានៅគ្រប់រណសិរ្ស ចាប់តាំងពីច្រើនថ្ងៃមកហើយ ទាំងនៅដែនដីវាលរាបទាំងនៅតំបន់ខ្ពង់រាបគឹតំបន់ភ្នំនិងបណ្ដាតំបន់់ឆ្នេរសមុទ្រដែលពួកហ៊ូធី ទើបដណ្ដើមយកបាននាពេលថ្មីៗនេះ ។ ការប្រយុទ្ធគ្នាថ្មីចាប់ពីខែកញ្ញាមក បណ្ដាលឲ្យមនុស្សស្លាប់ច្រើនរយនាក់ ៕
ចែករំលែកព័តមាននេះ