រៀបចំឡានក្រុងចំនួន១១៥គ្រឿង បម្រើសេវាដឹកជញ្ជូនឥតគិតថ្លៃ៥ថ្ងៃ
- សៀមរាប
ខេត្តសៀមរាប ៖ រដ្ឋបាលខេត្ត បានត្រៀមរថយន្ដក្រុងចំនួន១១៥គ្រឿង សម្រាប់ផ្ដល់សេវាដឹកជញ្ជូនបងប្អូនប្រជាពលរដ្ឋពីខេត្តសៀមរាប ទៅកាន់រាជធានីភ្នំពេញដោយឥតគិតថ្លៃ ក្នុងឱកាសពិធីបុណ្យភ្ជុំបិណ្ឌខាងមុខនេះ ។
មន្ត្រីរដ្ឋបាលខេត្តបានឱ្យដឹងថា ក្រោមការយកចិត្ដទុកដាក់ខ្ពស់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី ក្នុងការកាត់បន្ថយការចំណាយប្រាក់កាសលើការធ្វើដំណើរទៅស្រុកកំណើតរបស់បងប្អូនប្រជាពលរដ្ឋក្នុងឱកាសបុណ្យភ្ជុំបិណ្ឌនេះ រាជរដ្ឋាភិបាលកម្ពុជា បានរៀបចំរថយន្ដក្រុងចំនួន១១៥គ្រឿង សម្រាប់ដឹកបងប្អូនដោយឥតគិតថ្លៃរយៈពេល៥ថ្ងៃ ចាប់ពីថ្ងៃទី៩ ដល់ទី១៣ ខែតុលា ឆ្នាំ២០២៦ ។
យោងតាមសេចក្ដីជូនដំណឹងរបស់រដ្ឋបាលខេត្ត នៅថ្ងៃទី៥ ខែតុលា ឆ្នាំ២០២៦ បានឱ្យដឹងថា រដ្ឋាករស្វយ័តដឹកជញ្ជូនសា ធារណ:រថយន្ដក្រុង((City Bus) ត្រៀមរថយន្តក្រុងចំនួន១១៥គ្រឿង ដឹកអ្នកដំណើរពីភ្នំពេញទៅសៀមរាប និងពីសៀមរាបត្រឡប់មកភ្នំពេញវិញ តាមទីតាំង និងម៉ោងកំណត់ ។
សម្រាប់បងប្អូនប្រជាពលរដ្ឋដែលមានបំណងធ្វើដំណើរពីភ្នំពេញមកសៀមរាបចេញដំណើរនៅម៉ោង៦និង៣០នាទីព្រឹក នៅចំណត OCIC ជ្រោយចង្វា មកចតនៅទីតាំងមណ្ឌលរដ្ឋបាលមន្ទីរខេត្ត ចាប់ពីថ្ងៃទី៩ ដល់ថ្ងៃទី១៣ ខែតុលា ឆ្នាំ២០២៦។
ដោយឡែក សម្រាប់បងប្អូនប្រជាពលរដ្ឋដែលមានបំណងចង់ធ្វើដំណើរពីខេត្តសៀមរាប ទៅកាន់រាជធានីភ្នំពេញចេញដំណើរនៅម៉ោង៦និង៣០នាទីព្រឹក ទីតាំងចំណតនៅមណ្ឌលរដ្ឋបាលមន្ទីរខេត្ត ទៅទីតាំងចំណតដីឡូត៍ OCIC នៅជ្រោយចង្វា រាជ ធានីភ្នំពេញ ៕
ចែករំលែកព័តមាននេះ