ប្រទេសនីហ្សេរីយ៉ា ៖ យោងតាមកងទ័ព និងរដ្ឋមន្ត្រីអាកាសចរណ៍នីហ្សេរីយ៉ាថា យន្តហោះដឹកជញ្ជូន១គ្រឿងរបស់កងទ័ពអាកាសនីហ្សេរីយ៉ា បានធ្លាក់កាលពីថ្ងៃទី៥ តុលា នៅភាគខាងត្បូងប្រទេស ជាមួយមនុស្សជិះ៣២នាក់ ។
តាមបណ្ដាញសង្គមX រដ្ឋមន្ត្រីអាកាសចរណ៍នីហ្សេរីយ៉ា លោកFESTUS KEYAMO ថ្លែងថា តាមព័ត៌មានដំបូងៗថា ក្នុងយន្ត ហោះនោះ មានមនុស្សជិះ៣២នាក់ ក្នុងនោះ មានអ្នកដំណើរ២៥នាក់ និងសមាជិកក្រុមយានិក៧នាក់ ។ កងទ័ពអាកាសនីហ្សេរីយ៉ា បានបើកធ្វើប្រតិបត្តិការរុករក និងជួយសង្គ្រោះ ក្រោយគ្រោះថ្នាក់យន្តហោះធុនATR-42 នោះ ដែលកើតមានក្នុងតំបន់
អ៉ីសបូកូដារដ្ឋអុនដូ កាលពីព្រឹកថ្ងៃទី៥ តុលា។
កងទ័ពអាកាសនីហ្សេរីយ៉ាបន្តទៀតថា យន្តហោះនោះ ហោះហើរ់រវាងក្រុងបេណាំងស៊ីធី និងក្រុងឡាហ្គោស ពេលកើតមានគ្រោះថ្នាក់នោះ។ យន្តហោះនេះបានធ្លាក់ជិតមូលដ្ឋាននាវាចរណ៍អ៉ីសបូកូដា ហើយបំណែករបស់វាត្រូវបានរកឃើញ ។
វីដេអូមួយផ្សាយតាមបណ្ដាញសង្គមបង្ហាញមនុស្សម្នាប្រមូលផ្ដុំគ្នានៅជិតទន្លេមួយ មើលបណ្ដាអ្នកជួយសង្គ្រោះកំពុងធ្វើការរុករកតាមនាវា។ មូលដ្ឋាននាវាចរណ៍អ៉ីសបូកូដា ស្ថិតក្នុងតំបន់ប្រេងកាតមួយនាភាគខាងត្បូងនីហ្សេរីយ៉ា៕
ចែករំលែកព័តមាននេះ