សុខភាព៖ យោងតាមការចុះផ្សាយពីប្រភពបរទេស មនុស្សមួយចំនួនទោះគេងបានគ្រប់ ក៏នៅតែមានអារម្មណ៍ហត់ អស់កម្លាំង និងពិបាកផ្តោតអារម្មណ៍។ តាមអ្នកជំនាញជប៉ុន អ្វីដែលយើងញ៉ាំ ពេលវេលាញ៉ាំ និងលំដាប់នៃការញ៉ាំ ក៏អាចពាក់ព័ន្ធនឹងកម្រិតថាមពលរបស់រាងកាយផងដែរ។ ភាពតានតឹង ការគេងមិនល្អ និងការញ៉ាំអាហារមិនមានតុល្យភាព អាចធ្វើឱ្យរាងកាយស្តារខ្លួនបានមិនល្អ។

១. អស់កម្លាំងផ្លូវចិត្ត គួរចាប់ផ្តើមអាហារដោយបន្លែ។ អ្នកជំនាញណែនាំឱ្យញ៉ាំបន្លែជាមុន បន្ទាប់មកអាហារដែលមានប្រូតេអ៊ីន ហើយចុងក្រោយទើបញ៉ាំបាយ នំប៉័ង ឬអាហារមានម្សៅផ្សេងៗ។ វិធីនេះត្រូវបានលើកឡើងថា អាចជួយកាត់បន្ថយការឡើងចុះខ្លាំងនៃជាតិស្ករក្នុងឈាម និងជួយបន្ថយអារម្មណ៍ខ្សោយកម្លាំង។

២. អស់កម្លាំងរាងកាយក្រោយហាត់ប្រាណ គួរបំពេញថាមពលឱ្យបានទាន់ពេល។ ប្រភពណែនាំឱ្យទទួលអាហារដែលមានម្សៅ និងប្រូតេអ៊ីនក្នុងប្រហែល ៣០នាទីក្រោយធ្វើសកម្មភាពរាងកាយ ដើម្បីជួយបំពេញថាមពល និងស្តារសាច់ដុំ។ ឧទាហរណ៍ អាចញ៉ាំចេកជាមួយទឹកដោះគោជូរ ដែលងាយរៀបចំ និងងាយទទួលទាន។

៣. តានតឹង ឬអារម្មណ៍មិនល្អ គួរយកចិត្តទុកដាក់លើសុខភាពពោះវៀន។ អ្នកជំនាញលើកឡើងថា ពោះវៀន និងខួរក្បាលមានទំនាក់ទំនងគ្នា។ ដូច្នេះ អាហារដូចជា ទឹកដោះគោជូរ មីសូ អាហារជ្រក់ បន្លែ និងផ្លែឈើដែលមានជាតិសរសៃ អាចជួយគាំទ្រសុខភាពពោះវៀន។ ត្រីមានខ្លាញ់ល្អ ដូចជា ត្រីសាលម៉ុង និងត្រីម៉ាកឺរែល ក៏ត្រូវបានលើកឡើងថា អាចគាំទ្រសុខភាពខួរក្បាល និងអារម្មណ៍ផងដែរ។

ជាមួយគ្នានេះ គួរកាត់បន្ថយនំផ្អែម ស្ករគ្រាប់ និងភេសជ្ជៈមានជាតិស្ករ ជាពិសេសនៅពេលល្ងាច ហើយមិនគួរផឹកភេសជ្ជៈផ្អែម ឬទឹកផ្លែឈើនៅពេលពោះទទេជាញឹកញាប់។ សរុបមក ការគេងគ្រប់គ្រាន់នៅតែសំខាន់ ប៉ុន្តែការរៀបចំអាហារឱ្យមានតុល្យភាព និងញ៉ាំឱ្យបានត្រឹមត្រូវ ក៏អាចជួយគាំទ្រការស្តារថាមពល និងកាត់បន្ថយអារម្មណ៍អស់កម្លាំងបានផងដែរ៕