ខេត្តក្រចេះ ៖ កម្លាំងសមត្ថកិច្ចចម្រុះ ចំនួន១៦នាក់ ប្រើប្រាស់ទូកម៉ាស៊ីន ៣គ្រឿង បានចុះប្រតិបត្តិការត្រួតពិនិត្យ និងបង្ក្រាបបទល្មើសនេសាទនៅតាមដងព្រែកឆ្លូង ស្រុកឆ្លូង ខេត្តក្រចេះ រយៈពេល២ថ្ងៃ គឺថ្ងៃទី៤ និងថ្ងៃទី៥ ខែតុលា ឆ្នាំ២០២៦ ដោយបានរុះរើ និងបំផ្លាញឧបករណ៍នេសាទល្មើសច្បាប់ជាច្រើន ព្រមទាំងចាក់លែងត្រីចម្រុះប្រមាណ ១៥០គីឡូក្រាម ចូលទៅក្នុងដែនទឹកធម្មជាតិវិញ ។
ប្រតិបត្តិការនេះ ធ្វើឡើងដោយក្រុមការងារចម្រុះ ដែលមានមន្ត្រីខណ្ឌរដ្ឋបាលជលផល នៃមន្ទីរកសិកម្ម រុក្ខាប្រមាញ់ និងនេសាទខេត្តក្រចេះ សហការជាមួយអធិការដ្ឋានរដ្ឋបាលជលផលមេគង្គ កម្លាំងនគរបាលការិយាល័យប្រឆាំងបទល្មើសសេដ្ឋកិច្ចខេត្ត និងគណៈកម្មការស្រុក ក្នុងគោលបំណងទប់ស្កាត់ និងបង្ក្រាបបទល្មើសធនធានធម្មជាតិ និងការនេសាទខុសច្បាប់នៅក្នុងមូលដ្ឋាន ។
នាយខណ្ឌជលផលខេត្តក្រចេះ លោក ម៉ុក ពន្លក អោយដឹងថា កម្លាំងចម្រុះបានរកឃើញឧបករណ៍នេសាទខុសច្បាប់ និងបានរុះរើបំផ្លាញចោល រួមមាន ៖ ដាយចាប់ត្រីចំនួន៨វង់ ដែលមានមុខទំហំចាប់ពី៧ម៉ែត្រ ដល់១៥ម៉ែត្រ បណ្តោយប្រវែងពី៤០ម៉ែត្រ ដល់៦០ម៉ែត្រ និងមានក្រឡាទំហំចាប់ពី២សង់ទីម៉ែត្រ ដល់៩សង់ទីម៉ែត្រ។ ក្រៅពីនេះ ក៏មានខ្សែពួរ ប្រវែង២៥០ម៉ែត្រ ធុងជ័រ៤គ្រឿង និងកានជ័រ៧គ្រឿង ។
ជាមួយគ្នានេះ សមត្ថកិច្ចបានដកហូត ដាយចាប់ត្រីមួយវង់ មានមុខទំហំ៧ម៉ែត្រ បណ្តោយ៤០ម៉ែត្រ និងក្រឡាទំហំចាប់ពី២សង់ទីម៉ែត្រ ដល់៧សង់ទីម៉ែត្រ យកទៅរក្សាទុកនៅខណ្ឌរដ្ឋបាលជលផលក្រចេះ ដើម្បីរង់ចាំការសម្រេចតាមគោលការណ៍របស់ថ្នាក់ដឹកនាំ ។
លោកនាយខណ្ឌបានបន្តថា ក្នុងការបង្ក្រាបនេះ កម្លាំងសមត្ថកិច្ចក៏បានប្រមូលត្រីចម្រុះ ដែលរកឃើញពីឧបករណ៍នេសាទខុសច្បាប់ ហើយចាក់លែងចូលទៅក្នុងដែនទឹកធម្មជាតិវិញ ប្រមាណ១៥០គីឡូក្រាម ។
យ៉ាងណាក៏ដោយ ម្ចាស់ឧបករណ៍នេសាទខុសច្បាប់មិនត្រូវបានឃាត់ខ្លួននោះទេ ដោយពួកគេបានរត់គេចខ្លួនមុនពេលកម្លាំងសមត្ថកិច្ចចម្រុះទៅដល់ទីតាំង។ មន្ត្រីជំនាញ បានបន្តចុះត្រួតពិនិត្យ និងទប់ស្កាត់សកម្មភាពនេសាទខុសច្បាប់នៅតាមតំបន់ ដែលមានហានិភ័យខ្ពស់ ដើម្បីការពារធនធានជលផល និងធានានិរន្តរភាព នៃធនធានធម្មជាតិសម្រាប់ប្រជាពលរដ្ឋ និងជំនាន់ក្រោយ ៕
ចែករំលែកព័តមាននេះ