សង្គ្រាមអ៉ីរ៉ង់ ៖ ប្រធានសភាអ៉ីរ៉ង់ លោកម៉ូហាម៉ាដ បាក់ហ័រ កាលីបាហ្វ ក្នុងវេទិកាសាធារណៈមួយថ្លែងថា សហរដ្ឋអាមេរិកនាពេលថ្មីៗនេះ បានដាក់សំណើតាមរយៈអាជ្ញាកណ្ដាលមួយរូប តែលោកមិនបានផ្ដល់ភាពលម្អិតឡើយ ។
ប្រធានាធិបតីអាមេរិក លោកដូណាល់ត្រាំ បានបដិសេធសំណើសន្តិភាពចុងក្រោយរបស់អ៉ីរ៉ង់ដោយយល់ថា មិនគ្រប់គ្រាន់។ លោកកាលីបាហ្វ ដែលចរចាដោយផ្ទាល់ដ៏កម្រជាមួយអាមេរិក កាលពីដើមឆ្នាំនេះគូសបញ្ជាក់ថា អាមេរិកបានធ្វើសេចក្ដីថ្លែងការណ៍ខុសគ្នាក្នុងសារព័ត៌មាន ។ លោកបន្តថា សម័យកាលដែលចង់ចំណេញពេលវេលា ឬក៏ដាក់ការទាមទារជាឯកតោភាគីនានាវាហួសសម័យហើយ និងថាលក្ខខណ្ឌ៧ដែលអ៉ីរ៉ង់លើកឡើង ដើម្បីបើកច្រកសមុទ្រហ័រមូសឡើងវិញទាំងស្រុងនៅតែជាបច្ចុប្បន្នភាព ។
រដ្ឋមន្ត្រីការបរទេសអ៉ីរ៉ង់ លោកអាប់បាស់អារ៉ាសជីលើកឡើងប្រាប់ដល់បណ្ដាឯកអគ្គរដ្ឋទូត និងបណ្ដាអ្នកទទួលខុសត្រូវនៃបេសកកម្មការទូតបរទេសថា ប្រសិនបើអាមេរិកស្វែងរកផ្លូវការទូត នោះអ៉ីរ៉ង់ត្រៀមធ្វើឲ្យសម្រេចបានដំណោះស្រាយត្រឹមត្រូវមួយនិងប្រកបដោយកិត្តិយសដើម្បីបញ្ចប់សង្គ្រាមនេះ ។
ទោះបីយ៉ាងណា លោកបានព្រមានថា រាល់ការប្រឈមមុខថ្មីខាងយោធា នឹងនាំឲ្យមានការតបតវិញខ្លាំងក្លាបំផុត។ លោកអារ៉ាសជីក៏បដិសេធផងដែរ ការអះអាងរបស់អាមេរិកដែលថា គណៈប្រតិភូអ៉ីរ៉ង់ត្រូវបានបណ្ដេញចេញពីសហរដ្ឋអាមេរិក ប៉ុន្មានថ្ងៃបន្ទាប់ពីកិច្ចប្រជុំប្រចាំឆ្នាំ របស់មហាសន្និបាតអ.ស.ប ។ លោកបញ្ជាក់ថា គណៈប្រតិភូអ៉ីរ៉ង់បានវិលត្រឡប់មកប្រទេសខ្លួនវិញ ស្របតាមកាលបរិច្ឆេទកំណត់ ។
ចំណែករដ្ឋមន្ត្រីក្រសួងប្រេងអ៉ីរ៉ង់ បានសុំលាលែងចេញពីតំណែងហើយប្រធានាធិបតីលោកម៉ាសស៊ូដប៉េហ្សេស្គីយ៉ានបានសម្រេចតាមបំណងនោះ ។ ប្រធានាធិបតីបានចាត់តាំងលោកហាមីតបូវ៉ាតជារដ្ឋមន្ត្រីប្រេងកាតស្ដីទី ។ ចំណែកនាវាដឹកប្រេងមួយគ្រឿងរងការវាយប្រហារនៅច្រកហ័រមូសបណ្ដាលឲ្យខូចបន្ទប់ម៉ាស៊ីន ហើយបណ្ដានាវិកនៃនាវានោះពុំមាននរណាម្នាក់រងគ្រោះឡើយ ។
ជារួមចរាចរណ៍របស់នាវាតាមច្រកសមុទ្រហ័រមូសពេលនេះ មានការកែលម្អ តែនៅទាបជាងកម្រិតកាលមុនសង្គ្រាម។ ការបញ្ជូនបណ្ដាផលិតផលថាមពលកាត់តាមច្រកសមុទ្រនោះ ក៏មានការកែលម្អដែរ ដោយសារការខិតខំប្រឹងប្រែងរបស់កងម៉ារីនអាមេរិក ។
ប្រមុខការទូតអ៉ីរ៉ង់លោកអាប់បាស់អារ៉ាសជីអះអាងកាលពីថ្ងៃទី៤ តុលា ថា ពុំមានដំណោះស្រាយយោធាឡើយចំពោះសង្គ្រាមនៅមជ្ឈឹមបូព៌ា ។ ប្រសិនបើសត្រូវយើងជ្រើសរើសជាថ្មីយកការប្រឈមមុខដាក់គ្នាខាងយោធានោះ ការតបតរបស់យើងនឹងខ្លាំងជាងពេលមុនទៅទៀត ។ យើងនឹងការពារខ្លួនកាន់តែខ្លាំងក្លា ៕
ចែករំលែកព័តមាននេះ