រាជធានីភ្នំពេញ ៖ តំណាងកម្ពុជាប្រចាំនៅអង្គកាសហប្រជាជាតិ (UN) បានថ្លែងក្រុមប្រឹក្សាសិទ្ធិមនុស្សថា សកម្មភាពបច្ចុប្បន្នរបស់កងកម្លាំងប្រដាប់អាវុធថៃ នៅក្នុងទឹកដីកម្ពុជា គឺជាការរំលោភធម្មនុញ្ញអង្គការសហប្រជាជាតិច្បាប់អន្តរជាតិ និងកិច្ចព្រមព្រៀងទ្វេភាគី ។
ឯកឧត្តម កែ សុវណ្ណ ឯកអគ្គរាជទូត និងជាតំណាងអចិន្ត្រៃយ៍ នៃព្រះរាជាណាចក្រកម្ពុជា ប្រចាំអង្គការសហប្រជាជាតិ និងអង្គការអន្តរជាតិនានា នៅទីក្រុងហ្សឺណែវ បានថ្លែងបទអន្តរាគមន៍ ក្រោមរបៀបវារៈទី១០ កិច្ចសន្ទនាអន្តរកម្មជាមួយអ្នករាយការណ៍ពិសេសស្តីពីស្ថានភាពសិទ្ធិមនុស្សនៅកម្ពុជា នាសម័យប្រជុំលើកទី៦៣ នៃក្រុមប្រឹក្សាសិទ្ធិមនុស្ស កាលពីថ្ងៃទី២ តុលា ឆ្នាំ២០២៦ លើកឡើងថា កត់សម្គាល់នូវរបាយការណ៍របស់អ្នករាយការណ៍ពិសេស និងបានវាយតម្លៃខ្ពស់ចំពោះកិច្ចសហប្រតិបត្តិការប្រកបដោយស្ថាបនា ក្នុងអំឡុងពេលបេសកកម្មផ្លូវការលើកដំបូងរបស់លោកនៅកម្ពុជា ។
ឯកឧត្ដម ក៏បានបញ្ជាក់សារឡើងវិញ នូវការប្តេជ្ញាចិត្តរបស់កម្ពុជាចំពោះកិច្ចសន្ទនា ដោយបើកចំហការបន្តកិច្ចសហប្រតិបត្តិការ និងការវាយតម្លៃប្រកបដោយតុល្យភាព រវាងបញ្ហាប្រឈម និងវឌ្ឍនភាពសិទ្ធិមនុស្ស ។ ឯកឧត្តមបានលើកឡើងទៀតថា កម្ពុជាបានថ្លែងអំណរគុណជាពិសេសចំពោះការយកចិត្តទុកដាក់របស់អ្នករាយការណ៍ពិសេសលើផលប៉ះពាល់ផ្នែកសិទ្ធិមនុស្សដែលបានបណ្តាលមកពីជម្លោះព្រំដែនកម្ពុជា និងថៃ ។
ប្រជាពលរដ្ឋកម្ពុជា ជាង២០.០០០នាក់ នៅតែមិនទាន់អាចវិលត្រឡប់ទៅផ្ទះសម្បែងរបស់ពួកគេដែលស្ថិតនៅក្នុងទឹកដីកម្ពុជាបាននៅឡើយ ដោយសារវត្តមានរបស់កងកម្លាំងប្រដាប់អាវុធថៃ ។ កម្ពុជាបានគាំទ្រការអំពាវនាវរបស់អ្នករាយការណ៍ពិសេសឱ្យមានការវិលត្រឡប់ដោយសុវត្ថិភាព និងសេចក្តីថ្លៃថ្នូររបស់ប្រជាពលរដ្ឋភៀសខ្លួនកម្ពុជាអនុលោមតាមច្បាប់អន្តរជាតិ ហើយបានអំពាវនាវឱ្យមានការអនុវត្តសេចក្តីថ្លែងការណ៍រួម ថ្ងៃទី២៧ ខែធ្នូ ឆ្នាំ២០២៥ ដោយពេញលេញ និងដោយស្មោះត្រង់ ។
ឯកឧត្តមបន្តថា ចំពោះបទល្មើសឆបោកតាមប្រព័ន្ធបច្ចេកវិទ្យា កម្ពុជាបានសង្កត់ធ្ងន់ថា បទល្មើសឆ្លងដែនតម្រូវឱ្យមានសកម្មភាពរួមគ្នា និងកិច្ចសហប្រតិបត្តិការអន្តរជាតិ ។ កម្ពុជា បានរំលេចនូវការពង្រឹងវិធានការអនុវត្តច្បាប់ និងការរៀបចំសន្និសីទអន្តរជាតិស្តីពីការប្រយុទ្ធប្រឆាំងបទល្មើសឆបោកតាមប្រព័ន្ធបច្ចេកវិទ្យា នៅរាជធានីភ្នំពេញ ថ្ងៃទី២៣-២៤ ខែកញ្ញា ឆ្នាំ២០២៦ ដែលបានអនុម័ត សេចក្តីប្រកាសទីក្រុងភ្នំពេញ ដើម្បីពង្រឹងកិច្ចសហប្រតិបត្តិការអន្តរជាតិ បង្ក្រាបបណ្តាញឧក្រិដ្ឋជនឆ្លងដែន និងកិច្ចការពារជនរងគ្រោះ ។
ជាមួយគ្នានោះដែរ កម្ពុជាក៏បានបញ្ជាក់សារឡើងវិញនូវការប្តេជ្ញាចិត្ត ចំពោះអង្គការសង្គមស៊ីវិល ការចូលរួមផ្នែកនយោបាយ ពហុបក្ស និងលទ្ធិប្រជាធិបតេយ្យសេរីពហុបក្ស ព្រមទាំងពង្រឹងកិច្ចការពារ និងប្រកបដោយបរិយាបន្នដល់ស្ត្រី កុមារ ជនមានពិការភាព ក្រុមជន LGBTQ+ និងសហគមន៍ជនជាតិដើមភាគតិចផងដែរ ។
ជាការឆ្លើយតប កម្ពុជាបានបដិសេធនឹងសេចក្តីថ្លែងការណ៍របស់ថៃថា ជាព័ត៌មានមិនពិត និងធ្វើឱ្យភ័ន្តច្រឡំ ។ កម្ពុជា បានរំលឹកឡើងវិញថា ប្រជាពលរដ្ឋកម្ពុជាដែលកំពុងភៀសខ្លួនបច្ចុប្បន្ន ត្រូវបានបង្ខំឱ្យបោះបង់ចោលផ្ទះសម្បែង នៅក្នុងទឹកដីរបស់ពួកគេ ដោយសារការវាយប្រហារពីសំណាក់កងកម្លាំងប្រដាប់អាវុធថៃ កាលពីឆ្នាំ២០២៥ ហើយបានបញ្ជាក់អះអាងថា សកម្មភាពបច្ចុប្បន្នរបស់កងកម្លាំងប្រដាប់អាវុធថៃនៅក្នុងទឹកដីកម្ពុជា គឺជាការរំលោភធម្មនុញ្ញអង្គការសហប្រជាជាតិ ច្បាប់អន្តរជាតិ និងកិច្ចព្រមព្រៀងទ្វេភាគី៕
ចែករំលែកព័តមាននេះ