ទីក្រុងកៀវ៖ ថ្ងៃនេះ គេស្ដាប់ឮតែសំឡេងស៊ីរ៉ែនប្រកាសអាសន្ន និងសំឡេងផ្ទុះគ្រាប់បែកញ័រកក្រើករដ្ឋធានីកៀវរបស់អ៊ុយក្រែន ចំពេលដែលអធិការបតីអាល្លឺម៉ង់ លោកហ្វ្រ៊ីតរីច ម៊ែក បំពេញទស្សនកិច្ចនៅទីនោះដើម្បីបង្ហាញការគាំទ្រចំពោះរបបដឹកនាំរបស់លោកហ្សេឡិនស្គី។ នៅពេលនេះ រុស្ស៊ីសម្រុកវាយប្រហារខ្លាំងណាស់។ លោកម៊ែកនឹងប្រកាសនូវការដាក់ចេញវិធានការមួយចំនួនសម្រាប់អ៊ុយក្រែន។ ក្នុងនោះមានការផ្ដល់ជំនួយយោធាជាទឹកប្រាក់១ពាន់លានអឺរ៉ូ និងជំនួយគិតជាទឹកប្រាក់៣៥០លានអឺរ៉ូទៀតសម្រាប់ជួសជុលវិស័យថាមពល។ ខាងលើនេះជាការអះអាងរបស់មន្ត្រីរដ្ឋាភិបាលអាល្លឺម៉ង់។ ប្រទេសទាំង២ក៏នឹងប្រកាសអំពីកិច្ចព្រមព្រៀងផលិតដ្រូនរួមគ្នាផងដែរនាពេលឆាប់ៗនេះ។
លោកម៊ែកថ្លែងថាលោកធ្វើដំណើរទៅទីក្រុងកៀវនៅថ្ងៃនេះព្រោះអ៊ុយក្រែកំពុងត្រូវការជំនួយជាបន្ទាន់នាប៉ុន្មានសប្ដាហ៍ខាងមុខនេះ។ លោកថ្លែងបន្តទៀតថាកងទ័ពរុស្ស៊ីបន្តទម្លាក់គ្រាប់បែកទៅលើទីក្រុងតូចធំនានា អគារស្នាក់នៅរបស់ប្រជាជន និងរោងចក្របង្កើតកម្ដៅ។ បើយើងមិនព្រមបញ្ឈប់សកម្មភាពរបស់រុស្ស៊ីទេ យូរឬឆាប់ ម៉ាស៊ីនធ្វើសង្គ្រាមរបស់រុស្ស៊ីនឹងវាយប្រហារមកលើយើងជាមិនខានឡើយ។ លោកថ្លែងថាលោកនឹងជម្រាបប្រាប់លោកហ្សេឡិនស្គីនៅថ្ងៃនេះថា «អ្នកអាចជឿជាក់មកលើយើងក្នុងការប្តផ្ដល់ជំនួយ»។ ថ្ងៃនេះ គេស្ដាប់ឮសំឡេងស៊ីរ៉ែនបួនដងនៅទីក្រុងកៀវតាំងពីព្រឹកព្រលឹម។ សំឡេងផ្ទុះគ្រាប់បែក និងសំឡេងគ្រាប់មីស៊ីលនៃប្រព័ន្ធការពារដែនអាកាសក៏បានបញ្ចេញសំឡេងខ្ទរខ្ទារទូទាំងរដ្ឋធានីផងដែរ។
មានករណីមួយនោះ រុស្ស៊ីវាយប្រហារចំស្ពាន Northern Bridge ដែលឆ្លងកាត់ទន្លេឌីនីប្រូ (Dnipro) បណ្ដាលឱ្យខូចខាតផ្លូវឆ្លងកាត់លើស្ពាន។ នេះបើតាមអភិបាលនៃគណៈអភិបាលទីក្រុងកៀវ លោកវីតាលី គ្លីតឆ្កូ (Vitali Klitschko) បង្ហោះសារនៅលើតេឡេក្រាម។ លោកសរសេររៀបរាប់ថាការវាយប្រហារនោះក៏បណ្ដាលឱ្យខូចខាតប្រព័ន្ធផ្គត់ផ្គង់ទឹកស្អាតសម្រាប់តំបន់នោះផងដែរ។ រុស្ស៊ីបន្តវាយប្រហារស្ពាននានារបស់អ៊ុយក្រែនចាប់តាំងពីសប្ដាហ៍មុនមកម៉្លេះនៅក្នុងកិច្ចខិតខំប្រឹងប្រែងរបស់ខ្លួនដើម្បីបន្ទច់បង្អាក់ខ្សែបណ្ដាញតភ្ជាប់ពីរដ្ឋធានីកៀវទៅត្រើយទន្លេចំនួន២ និងតភ្ជាប់ទៅផ្លូវដឹកជញ្ជូនព័ស្តុភាររវាងអ៊ុយក្រែនភាគកណ្ដាល និងភាគខាងកើត។
អធិការបតីអាល្លឺម៉ង់ លោកម៊ែក ទៅអ៊ុយក្រែនលើកនេះអមដំណើរដោយរដ្ឋមន្ត្រីក្រសួងសេដ្ឋកិច្ច និងគណៈប្រតិភូសេដ្ឋកិច្ច រួមទាំងថ្នាក់ដឹកនាំក្រុមហ៊ុនមួយចំនួនផង។ គេរំពឹងថាលោកនឹងជំរុញឱ្យរដ្ឋាភិបាលអ៊ុយក្រែនធ្វើកំណែទម្រង់តបតាមសំណើរបស់ក្រុមប្រទេសជាដៃគូ។ ក្នុងនោះ ក៏មានការប្រយុទ្ធប្រឆាំងនឹងអំពើពុករលួយផងដែរ។ បន្ទាប់ពីសន្ទនាគ្នាតាមទូរស័ព្ទជាមួយម៊ែករួច កាលពីថ្ងៃពុធ លោកហ្សេឡិនស្គីថ្លែងថាអ៊ុយក្រែនជិតសម្រេចបានកិច្ចព្រមព្រៀងជាមួយអាល្លឺម៉ង់ដើម្បីផលិតដ្រូន មីស៊ីល និងប្រព័ន្ធសូហ្វវែពាក់ព័ន្ធនឹងការគ្រប់គ្រង-បញ្ជាអាវុធទាំងនេះ៕ ប្រភព៖ Reuters
ចែករំលែកព័តមាននេះ