ទីក្រុងវ៉ាស៊ីនតោន៖ លោកដូណាល់ត្រាំថ្លែងថាអាមេរិកអាចនឹងស្នើសុំឱ្យបណ្ដាប្រទេសនៅអឺរ៉ុបបញ្ចេញពីស្តុករបស់ខ្លួននូវប្រេងម៉ាស៊ូតដើម្បីប្រើប្រាស់នៅក្នុងគ្រាអាសន្ន។ លោកថ្លែងដូច្នេះនៅពេលទីក្រុងវ៉ាស៊ីនតោនព្យាយាមទប់ទល់នឹងការឡើងថ្លៃនៃប្រេងម៉ាស៊ូតឥតឈប់ឈរដោយសារការទទួលរងឥទ្ធិពលអាក្រក់ពីសង្គ្រាមអ៊ីរ៉ង់។ លោកត្រាំថ្លែងប្រាប់អ្នកសារព័ត៌មានថារដ្ឋាភិបាលរបស់លោកអាចនឹងស្នើសុំឱ្យបណ្ដាប្រទេសនៅអឺរ៉ុបបញ្ចេញប្រេងម៉ាស៊ូតពីឃ្លាំង។ លោកថ្លែងដូច្នេះត្រឹមតែបន្តិចប៉ុណ្ណោះបន្ទាប់ពីរដ្ឋមន្ត្រីក្រសួងរតនាគារ លោកស្កុតបឺសឹន (Scott Bessent) ជំរុញឱ្យពួកអឺរ៉ុបប្រញាប់បញ្ចេញប្រេងពីស្តុកភ្លាមទៅ។
លោកបឺសឹនបង្ហោះសារនៅលើបណ្ដាញសង្គមថាក្រុមប្រទេសជាដៃគូរបស់យើងនៅអឺរ៉ុបគួរតែប្រញាប់បង្ហាញការប្ដេជ្ញារបស់ពួកគេនៅក្នុងពេលនេះ និងបង្កលក្ខណៈងាយស្រួលសម្រាប់ការផ្គត់ផ្គង់ជាបន្ទាន់ (នូវប្រេងម៉ាស៊ូត) ដើម្បីដោះស្រាយបញ្ហារាំងស្ទះ។ កាលពីមុននេះបន្តិច អ្នកតំណាងក្រសួងពាណិជ្ជកម្មអាមេរិក លោកជេមីសុន គ្រីអឺ (Jamieson Greer) បង្ហាញការជឿជាក់ថាប្រទេសបារាំង អាល្លឺម៉ង់ និងអ៊ីតាលីនឹងសហការជាមួយអាមេរិកក្នុងការបង្កលក្ខណៈងាយស្រួលឱ្យទីផ្សារពិភពលោកមានប្រេងម៉ាស៊ូតលក់កាន់តែច្រើន។
បណ្ដារដ្ឋធានីនៅអឺរ៉ុបបានចាត់វិធានការដូចៗគ្នាពាក់ព័ន្ធនឹងប្រេងម៉ាស៊ូត ខណៈដែលរដ្ឋមន្ត្រីក្រសួងថាមពលអាមេរិក លោកគ្រីសរ៉ាយ (Chris Wright) ថ្លែងថាលោកមានទំនុកចិត្តខ្ពស់ថាពួកអឺរ៉ុបនឹងបញ្ចេញប្រេងពីក្នុងស្តុកដើម្បីជួយបញ្ចៀសការឡើងថ្លៃនៃថាមពលនៅលើទីផ្សារសាកលលោក។ ប្រេងម៉ាស៊ូតនៅអាមេរិកឡើងថ្លៃខ្ពស់មិនធ្លាប់មាន។ កាលពីមួយសប្ដាហ៍មុន ប្រេងមួយហ្កាឡុងដែលមានចំណុះ៣,៧៨៥លីត្រលក់ចេញថ្លៃ៦,៥៣ដុល្លារ។ របាយការណ៍ដែលផ្សព្វផ្សាយដោយគណៈកម្មការអឺរ៉ុបបង្ហាញថាប្រេងឡើងថ្លៃខ្ពស់បំផុតនៅក្នុងរដ្ឋចំនួន១២នៃសហភាពអឺរ៉ុប ក្នុងនោះក៏មានអ៊ីតាលី បែលហ្សិច រ៉ូម៉ានី និងប៉ូឡូញផងដែរ។
ករណីប្រេងម៉ាស៊ូតឡើងថ្លៃខ្លាំងឡើងៗនៅអាមេរិកនាំឱ្យរដ្ឋបាលរបស់លោកត្រាំ និងក្រុមអ្នកតំណាងរាស្ត្រនៅក្នុងបក្សសាធារណរដ្ឋពិគ្រោះគ្នាថាត្រូវតែបិទការនាំចេញប្រេងម៉ាស៊ូតជាបណ្ដោះអាសន្នមុនការបោះឆ្នោតសភានាខែវិច្ឆិកា។ ប្រទេសបារាំង និងអាល្លឺម៉ង់មានប្រេងម៉ាស៊ូតស្តុកទុកនៅក្នុងឃ្លាំងលើសពី៣៣%នៃប្រេងបម្រុងសរុបរបស់សហភាពអឺរ៉ុប។ ប្រធានពាណិជ្ជកម្មរបស់ EU ថ្លែងថាវាជារឿងខុសពីការរំពឹងទុក ប្រសិនបើអាមេរិកបិទខ្ទប់ការនាំចេញប្រេងម៉ាស៊ូត។ ប៉ុន្តែបើអាមេរិកធ្វើដូច្នេះមែន វានឹងធ្វើឱ្យប៉ះពាល់សេដ្ឋកិច្ចរបស់អឺរ៉ុប៕ ប្រភព៖ Al Jazeera
ចែករំលែកព័តមាននេះ