ទីក្រុងប៉េកាំង៖ គម្រោងរបស់ប្រទេសចិនក្នុងការសាងសង់ផ្លូវយន្តហោះនៅលើតំបន់ថ្មប៉ប្រះទឹកអេនធីឡូប (Antelope Reef) នៃប្រជុំកោះបារ៉ាសែល (Paracels) កំពុងដំណើរការដោយរលូន រំពឹងថានឹងចប់សព្វគ្រប់ត្រឹមពាក់កណ្ដាលឆ្នាំ២០២៧ ហើយនឹងជួយពង្រឹងកម្លាំងយោធារបស់ចិននៅក្នុងតំបន់មានជម្លោះនៃសមុទ្រចិនខាងត្បូង។ តាមរយៈរូបភាពពីផ្កាយរណប គេឃើញថាក្រុមការងារផ្នែកសាងសង់កំពុងធ្វើការយ៉ាងដុតដៃដុតជើង ព្រមទាំងឃើញគំនរក្រួស បេតុងអាម៉េ និងដងស្ទូច។
ក្រុមអ្នកវិភាគយល់ថាទីនេះអាចជាមូលដ្ឋានយោធាដ៏សំខាន់បំផុតរបស់ចិននៅក្នុងតំបន់។ រូបភាពដែលថតបានកាលពីថ្ងៃទី២៥ ខែកញ្ញានោះក៏បង្ហាញកប៉ាល់ដឹកក្រួសយ៉ាងពេញប៊ឹបបើកសំដៅទៅរកមាត់ផែដែលទើបតែសាងសង់ថ្មី។ នៅពេលដែលមូលដ្ឋានយោធារបស់ចិននៅតំបន់ថ្មប៉ប្រះទឹកអេនធីឡូបសាងសង់រួចរាល់ វានឹងក្លាយជាទីតាំងសំខាន់សម្រាប់យោធាចិននៅសមុទ្រចិនខាងត្បូងសម្រាប់មួយទសវត្សរ៍ចុងក្រោយ។ ពោលគឺពង្រីកទីតាំងបោះជំហានរបស់កប៉ាល់ចម្បាំង និងយន្តហោះចម្បាំងនៅលើដែនសមុទ្រដែលអាចនឹងក្លាយជាទីលានប្រយុទ្ធដ៏បង្ហូរឈាមនាពេលអនាគតរវាងចិន និងអាមេរិក និងសម្ព័ន្ធមិត្តអាមេរិកជុំវិញបញ្ហាតៃវ៉ាន់។
អ្នកវិភាគម្នាក់ឈ្មោះបឹន ឡេវីស (Ben Lewis) យល់ថាផ្លូវហោះហើរនៅលើតំបន់ថ្មប៉ប្រះទឹកនេះអាចនឹងសង់រួចរាល់យ៉ាងយូរត្រឹមពាក់កណ្ដាលទី១នៃឆ្នាំ២០២៧ ហើយបន្ទាប់មក ការចុះចតនៅលើផ្លូវនោះជាលើកដំបូងអាចនឹងចាប់ផ្ដើមនៅពាក់កណ្ដាលឆ្នាំ២០២៧ ឬអាចមុននេះផងក៏ថាបាន។ ផ្លូវនេះមានប្រវែង៣គីឡូម៉ែត្រសង់នៅលើតំបន់ថ្មប៉ប្រះទឹកដែលប្រទាញប្រទង់គ្នារវាងចិន និងប្រទេសដទៃទៀតនៃប្រជុំកោះស្ព្រែតលី (Spratly)។
លោកមិនទាន់ទទួលបានសញ្ញាថាទីនោះមានការជីកគាស់កាយដីសម្រាប់ទុកដាក់គ្រាប់រំសេវ និងប្រេងឥន្ធនៈនៅឡើយទេ។ ប្រទេសចិនមិនទាន់ទទួលស្គាល់ថាមានការសាងសង់មូលដ្ឋានសឹកថ្មីទេ ខណៈដែលប្រព័ន្ធផ្សព្វផ្សាយរបស់រដ្ឋរាយការណ៍ថាមូលដ្ឋាននៅលើតំបន់ថ្មប៉ប្រះទឹកអេនធីឡូបនោះប្រើប្រាស់សម្រាប់តម្រូវការស៊ីវិលតែប៉ុណ្ណោះដូចជាសម្រាប់ព្យាករអាកាសធាតុ និងការស្រាវជ្រាវដែនសមុទ្រជាដើម៕ ប្រភព៖ Reuters
ចែករំលែកព័តមាននេះ