ទីក្រុងមូស្គូ ៖ ប្រធានាធិបតីរុស្ស៊ី លោក វ្ល៉ាដឺមៀ ពូទីន (Vladimir Putin) កាលពីថ្ងៃទី១ ខែតុលា បានប្រកាសថា ប្រទេសរុស្ស៊ីនឹងមិនផ្គត់ផ្គង់ប្រេងម៉ាស៊ូតរបស់ខ្លួនទៅកាន់ទីផ្សារពិភពលោកឡើយ លុះត្រាតែទណ្ឌកម្មប្រឆាំងនឹងខ្លួនត្រូវបានដកចេញ។ នេះបើតាមការចេញផ្សាយពីទីភ្នាក់ងារសារព័ត៌មាន Reuters ។
ថ្លែងនៅក្នុងវេទិកា Valdai នៃក្រុមអ្នកជំនាញអន្តរជាតិស្តីពីកិច្ចការរុស្ស៊ី នៅទីក្រុងមូស្គូ លោក ពូទីន បានទទួលស្គាល់ថា ប្រទេសអ៊ុយក្រែនបានសម្រេចគោលដៅរបស់ខ្លួនមួយផ្នែក តាមរយៈការវាយប្រហារលើរោងចក្រចម្រាញ់ប្រេងរុស្ស៊ី ដែលបានធ្វើឱ្យរុស្ស៊ីខាតបង់ថវិកាអស់ ១% នៃផលិតផលក្នុងស្រុកសរុប (GDP) របស់ខ្លួន។ ប៉ុន្តែជាមួយគ្នានោះលោកក៏បានបញ្ជាក់ដែរថា នៅពេលនេះរុស្ស៊ី កំពុងតែឆ្លើយតបទៅវិញតាមរបៀបដូចគ្នានោះដែរ។
គួររំលឹកថា ប្រធានាធិបតីអាមេរិក លោក ដូណាល់ ត្រាំ (Donald Trump) កាលពីខែមុន បានប្រកាសថា ការវាយប្រហាររបស់អ៊ុយក្រែនលើបណ្តាទីតាំងចក្រចម្រាញ់ប្រេងរុស្ស៊ី បានបង្កឱ្យមានការខ្វះខាតប្រេងម៉ាស៊ូតជាសកល និងជំរុញឱ្យតម្លៃឡើងថ្លៃ ហើយលោកបានជំរុញឱ្យទីក្រុងគៀវបញ្ឈប់ការវាយប្រហារទាំងនោះ។
លោក ពូទីន បានគូសបញ្ជាក់ថា រុស្ស៊ីមានប្រេងម៉ាស៊ូតគ្រប់គ្រាន់ ប៉ុន្តែវានឹងមិនអាចនាំចេញទៅដល់ទីផ្សារពិភពលោកបានទេ ដោយសារតែការហាមឃាត់ និងទណ្ឌកម្មនានា ដែលមានស្រាប់ប្រឆាំងនឹងប្រេង ក៏ដូចជាផលិតផលប្រេងរបស់រុស្សី។ តួយ៉ាង នៅក្នុងសប្តាហ៍នេះ រុស្ស៊ីបានបន្តពន្យារការហាមឃាត់ការនាំចេញប្រេងម៉ាស៊ូតសម្រាប់ក្រុមហ៊ុនផលិតប្រេងឥន្ធនៈរហូតដល់ចុងខែតុលា។ ការណ៍នេះ បានបន្ថែមសម្ពាធកាន់តែខ្លាំងដល់ទីផ្សារថាមពលសកល ដែលកំពុងតែរង្គោះរង្គើស្រាប់ដោយសារសង្គ្រាម និងការខ្វះខាតការផ្គត់ផ្គង់៕
ចែករំលែកព័តមាននេះ