ទីក្រុងសេអ៊ូល៖ ប្រធានាធិបតីកូរ៉េខាងត្បូង លោកលីជេម្យុង ព្រមានចាត់វិធានការក្ដៅ ប្រសិនបើអ៊ុយក្រែនមិនព្រមទទួលស្គាល់ថាប្រទេសទាំង២ពិតជាបានសន្យាគ្នាថានឹងរក្សាទុកជាការណ៍សម្ងាត់នូវការបញ្ជូនឈ្លើយសឹកកូរ៉េខាងជើង២នាក់ទៅឱ្យរដ្ឋាភិបាលទីក្រុងសេអ៊ូល និងប្រសិនបើអ៊ុយក្រែនមិនព្រមសូមអភ័យទោសជាផ្លូវការនោះទេ។ លោកលីបង្ហោះសារនៅលើបណ្ដាញអ៊ិចថា «ប្រសិនបើ (អ៊ុយក្រែន) នៅតែមិនព្រមទទួលស្គាល់ការពិត និងមិនព្រមសូមទោសទេ យើងនឹងចាត់វិធានការបន្ថែមទៀតជាមិនខានឡើយ»។ លោកលីសម្ដែងការសោកស្ដាយរកអ្វីប្រៀបផ្ទឹមពុំបានទេចំពោះអ្វីដែលលោកហៅថាពាក្យសម្ដីរបស់អ៊ុយក្រែនអាចជំរុញឱ្យមានការប៉ះទង្គិចគ្នាផ្នែកយោធារវាងបងប្អូនគូសត្រូវកូរ៉េទាំង២។ លោកចាត់ទុកថាការទម្លាយអាថ៌កំបាំងនោះមានន័យស្មើនឹងការដុតបញ្ឆេះសង្គ្រាមនៅឧបទ្វីបកូរ៉េ។
កូរ៉េខាងត្បូង និងអ៊ុយក្រែនមានជម្លោះការទូតជាមួយគ្នាចាប់តាំងពីលោកហ្សេឡិនស្គីប្រកាសនៅចំពោះមុខមហាសន្និបាតអង្គការសហប្រជាជាតិកាលពីខែកញ្ញាថាអ៊ុយក្រែនបានបញ្ជូនឈ្លើយសឹកជនជាតិកូរ៉េខាងជើង២នាក់ទៅឱ្យកូរ៉េខាងត្បូង។ អ្នកទាំង២ត្រូវអ៊ុយក្រែនចាប់បាននៅពេលពួកគេទៅជួយកងទ័ពរុស្ស៊ីដើម្បីវាយប្រហារអ៊ុយក្រែន។ ក្រោយមក រដ្ឋាភិបាលទីក្រុងសេអ៊ូលចោទប្រកាន់ថាទីក្រុងកៀវរំលោភកិច្ចព្រមព្រៀងស្ដីពីការរក្សាទុករឿងនេះជាការណ៍សម្ងាត់ដើម្បីទីមួយការពារឈ្លើយសឹកទាំង២នាក់នោះផង និងទីពីរការពារសុវត្ថិភាពរបស់ក្រុមគ្រួសាររបស់អ្នកទាំង២នៅកូរ៉េខាងជើងផង។ ទោះជាយ៉ាងណាក្ដី មន្ត្រីរដ្ឋាភិបាលអ៊ុយក្រែនអះអាងថាគ្មានការព្រមព្រៀងគ្នាក្នុងការរក្សាការណ៍សម្ងាត់ទេ។ រឿងនេះនិយាយគ្នាស្ងាត់ៗត្រឹមកម្រិតអ្នកការទូតតែប៉ុណ្ណោះ។ ពោលគឺមិនបានព្រមព្រៀងគ្នាកម្រិតប្រធានាធិបតីទាល់តែសោះ។
អ៊ុយក្រែនកំពុងព្យាយាមជួសជុលភាពប្រេះឆាផ្នែកការទូតនេះឡើងវិញ។ សារព័ត៌មានអ៊ុយក្រែនបានដកស្រង់ពាក្យសម្ដីរបស់រដ្ឋមន្ត្រីការបរទេសអ៊ុយក្រែន លោកអានឌ្រី ស៊ីប៊ីហា (Andrii Sybiha) មកផ្សាយថារដ្ឋាភិបាលរបស់លោកកំពុងព្យាយាមផ្សះផ្សាជម្លោះការទូតនេះ។ លោកថ្លែងថាលោកសូមមិនចាត់ទុកថានេះជាឧបទ្ទវហេតុនោះទេ។ អាចនិយាយឱ្យស្រួលស្ដាប់ជាងនេះថាជាការមិនយល់គ្នាផ្នែកការទូត។ មន្ត្រីជាន់ខ្ពស់របស់ក្រសួងការបរទេសកូរ៉េខាងត្បូងថ្លែងកាលពីថ្ងៃសុក្រថាប្រមុខការទូតនៃប្រទេសទាំង២បន្តពិភាក្សាគ្នាថាត្រូវរកវិធីបែបណាដើម្បីដោះស្រាយកង្វល់របស់ទីក្រុងសេអ៊ូល។ ក្នុងនោះអាចមានការសូមទោស។ នេះបើយោងតាមការផ្សាយរបស់សារព័ត៌មានកូរ៉េខាងត្បូង។
រដ្ឋមន្ត្រីការបរទេសកូរ៉េខាងត្បូង លោកឆូយុន (Cho Hyun) និងលោកស៊ីប៊ីហាបន្តទំនាក់ទំនងគ្នាដោយផ្ទាល់ និងពិភាក្សាគ្នាថាតើកូរ៉េខាងត្បូងចង់ឱ្យអ៊ុយក្រែនធ្វើបែបណា? និងតើការទាមទារកម្រិតណាដែលអ៊ុយក្រែនអាចទទួលយកបាន? ទន្ទឹមនឹងនោះ គេក៏ត្រូវគិតថាអ៊ុយក្រែនក៏គ្នាកំពុងតែពិបាកដែរព្រោះត្រូវរែកពន្ធនៅក្នុងសង្គ្រាម។ ប៉ុន្តែចំណុចសំខាន់ត្រូវធ្វើយ៉ាងណាមិនឱ្យភាគីណាមួយបាក់មុខបាក់មាត់នោះទេ។ រឿងអ្វីដែលកូរ៉េខាងត្បូងមិនអាក់អន់ស្រពន់ចិត្តបើរដ្ឋាភិបាលរបស់លោកលីជេម្យុងកំពុងខិតខំកែលម្អទំនាក់ទំនងជាមួយរដ្ឋាភិបាលទីក្រុងព្យុងយ៉ាង។ ម៉្យាង ទើបតែឡើងកម្ដៅជាថ្មីនៅក្នុងឧបទ្ទវហេតុផ្ទុះគ្រាប់មីននៅតំបន់គ្មានកងទ័ពដែលខណ្ឌចែកប្រទេសកូរ៉េទាំង២។
អ្នកវិភាគនៅ «វិទ្យាស្ថានកូរ៉េដើម្បីការបង្រួបបង្រួមជាតិ» លោកឆូហានប៊ុម (Cho Han-bum) យល់ថាវិធានការរបស់កូរ៉េខាងត្បូងគឺពាក់ព័ន្ធនឹងការជួយជ្រោមជ្រែងរបស់ខ្លួនចំពោះអ៊ុយក្រែនទាំងនៅក្នុងវិស័យមនុស្សធម៌ ហិរញ្ញវត្ថុ និងការកសាងជាតិឡើងវិញ។ លោកយល់ថានៅក្នុងជម្លោះការទូតនេះ អ្នកដែលខាតគឺអ៊ុយក្រែន។ កូរ៉េខាងត្បូងធ្លាប់ផ្ដល់ជំនួយជាហូរហែទៅអ៊ុយក្រែន ហើយសន្យាផ្ដល់ជំនួយគិតជាទឹកប្រាក់មួយរយលានដុល្លារនាពេលខាងមុខជាប្រភេទជំនួយមិនមែនអាវុធ។ អ្នកវិភាគរូបនេះយល់ថានៅក្នុងការប្រឈមមុខដាក់គ្នានេះ គ្មានភាគីណាមួយទទួលបានផលចំណេញឡើយ។ កូរ៉េខាងត្បូងក៏ត្រូវការព័ត៌មានសម្ងាត់ពីអ៊ុយក្រែនផងដែរពាក់ព័ន្ធនឹងសកម្មភាពយោធារបស់កូរ៉េខាងជើង៕ ប្រភព៖ Channel News Asia
ចែករំលែកព័តមាននេះ