បើកគោយន្តខុសផ្លូវ ធ្លាក់ស្ទឹងគ្រញូងកណ្ដាលយប់ ព្រឹកឡើងឃើញគោយន្ត តែបាត់ម្ចាស់
- បាត់ដំបង
ខេត្តបាត់ដំបង ៖ គោយន្តកន្ត្រៃមួយគ្រឿង ត្រូវបានគេប្រទះឃើញរអិលធ្លាក់ផ្លូវចូលក្នុងទឹកស្ទឹងគ្រញូង តែបាត់អ្នកបើកបរបង្កឲ្យមានការផ្អើល នៅព្រឹកថ្ងៃទី០២ តុលា នៅចំណុចផ្លូវឆ្លងកាត់ទឹកស្ទឹងគ្រញូង ស្ថិតក្នុងឃុំតាសាញ ស្រុកសំឡូត ។
គោយន្តកន្ត្រៃនោះ ពុំមានដឹកអ្វីទេ ប៉ុន្តែមានគេអះអាងថា ម្ចាស់គោយន្តនោះ បានបើកធ្លាក់ចេញពីផ្លូវឆ្លងកាត់ទឹកស្ទឹងនៅពេលយប់ លុះព្រឹកឡើងនៅថ្ងៃទី០២ តុលា ស្រាប់តែអ្នកដំណើរឆ្លងកាត់ផ្លូវនោះប្រទះឃើញ តែបាត់អ្នកបើកបរមិនដឹងទៅណាទេ?
គិតត្រឹមម៉ោង១រសៀលថ្ងៃទី០២ តុលា នេះ បើតាមអធិការស្រុកសំឡូត លោកម៉ែន រីម បានប្រាប់កោះសន្តិភាពថា គេមិនទាន់ដឹងដំណឹងពីអុ្នកបើកគោយន្តធ្លាក់ទឹកស្ទឹងនោះនៅឡើយទេ ។ ប៉ុន្តែលោកថា មន្ត្រីមូលដ្ឋាន និងអ្នកភូមិ បានអូសគោយន្តនោះចេញពីក្នុងទឹកស្ទឹងយកទៅរក្សាទុកជាបណ្ដោះសាសន្ននៅក្នុងវត្តស្ទឹងគ្រញូង ដែលនៅត្រើយម្ខាងស្ទឹងនោះហើយ ដើម្បីរង់ចាំម្ចាស់ទៅទទួលយក ។
ពាក់ព័ន្ធនឹងការបាត់ខ្លួនម្ចាស់គោយន្ត លោក ម៉ែន រីម បានបញ្ជាក់ដែរថា បើតាមការសាកសួរព័ត៌មានគោយន្តនេះ ទំនងបើកធ្លាក់ទឹកស្ទឹងពេលយប់ ដែលទំនងបើកឆ្លងកាត់ទៅរកដឹកឈើ តែពេលបើកឆ្លងកាត់ទឹកស្ទឹងគ្រញូង ដោយយប់ងងិតផង ទឹកនៅហូរទៀត ក៏រអិលធ្លាក់ចេញពីផ្លូវចូលទៅក្នុងទឹក ។ ប៉ុន្តែលោកអធិការបានបញ្ជាក់បន្ថែមថា ទឹកកន្លែងគោយន្តបើកធ្លាក់នោះមិនជ្រៅទេ តែជាល្បាក់ទឹកហូរនិងមានថ្មច្រើន ហើយអ្នកបើកបរគោយន្តធ្លាក់ទឹកនោះ ក៏គេមិនទាន់ដឹងថា ធ្លាក់ចូលទឹកបាត់ខ្លួន ឬគេចខ្លួនទៅណាដែរ ឬមានរឿងអ្វី បានជាមិនឃើញទៅយកគោយន្ត ។
ប៉ុន្តែយ៉ាងណា មន្ត្រីរបស់លោក និងអ្នកភូមិបានអូសយកគោយន្តកន្ត្រៃនោះទៅរក្សាទុកក្នុងវត្តមួយនៅក្បែរនោះ ដើម្បីរង់ចាំម្ចាស់ទៅយក ៕
ចែករំលែកព័តមាននេះ