សង្គ្រាមអ៊ុយក្រែន ៖ ប្រធានាធិបតីរុស្ស៊ី លោកវ្ល៉ាឌីមៀរពូទីន អះអាងជាថ្មីកាលពីថ្ងៃទី១ តុលា ពីជំហររយៈពេលយូររបស់ក្រុង
មូស្គូ ដែលថា រុស្ស៊ីមិនមានបំណងវាយប្រហារបណ្ដាប្រទេសអឺរ៉ុបឡើយ តែនឹងឆ្លើយតបវិញចំពោះរាល់ការឈ្លានពាន ដោយប្រើគ្រាប់អាវុធទាំងអស់ដែលខ្លួនមាន ។
ក្នុងសង្កថាមួយ នាឱកាសនៃវេទិកាស្ដីពីនយោបាយការបរទេស លោកពូទីនចោទប្រកាន់ពួកលោកខាងលិច និងអឹរ៉ុបថា កំពុងធ្វើឲ្យធ្ងន់ធ្ងរដល់ភាពតានតឹង ដោយលោកលើកពីការរៀបចំសង្គ្រាមមួយ ប្រឆាំងក្រុងមូស្គូ នាបណ្ដាឆ្នាំខាងមុខតាមរយៈការធ្វើសមយុទ្ធយោធានានានៅសមុទ្របាល់ទិក និងដោយចាប់បណ្ដានាវារុស្ស៊ី ។ ការលើកឡើងទាំងនេះ របស់លោកពូទីន ធ្វើឡើងបន្ទាប់ពីការព្រមានរបស់ក្រុងមូស្គូចំពោះអូតង់ដោយថា រុស្ស៊ីមិនរារែកឡើយក្នុងការប្រើអាវុធនុយក្លេអ៊ែរ ដើម្បីការពារទីក្រុងកាលីនីនហ្រា្គដ ប្រសិនបើសមាជិកអូតង់ណាមួយ ប៉ុនប៉ងបិទខ្ទប់ទីក្រុងនោះឲ្យនៅឯកោដាច់ពីដែនដីរុស្ស៊ី ។
ស្ថានទូតរុស្ស៊ីជាច្រើននៅអឺរ៉ុប បានចេញផ្សាយក្នុងសប្ដាហ៍នេះសេចក្ដីប្រកាសនានាដោយគូសបញ្ជាក់ថា ក្រុងមូស្គូមានព័ត៌មានដែលថា អូតង់រៀបចំបិទខ្ទប់តំបន់ទីក្រុងកាលីនីនហ្គ្រាដទាំងជើងអាកាសទាំងជើងទឹក ។ សេចក្ដីប្រកាសទាំងនោះចោទប្រកាន់បណ្ដាមេដឹកនាំអឺរ៉ុបថា កំពុងតែលេងល្បែងដ៏គ្រោះថ្នាក់ ដោយស្រែកថា រុស្ស៊ីអាចវាយប្រហារប្រទេសណាមួយ ឬបង្កើនយុទ្ធនាការវាយប្រហារបង្កអស្ថេរភាព តាមរយៈដ្រូននិងសកម្មភាពវិច្ឆេទកម្មដទៃៗទៀត។ ក្រុងមូស្គូចាត់ទុកការលើកឡើងទាំងនោះថាមិនទំនង ។
ក្នុងសេចក្ដីប្រកាសមួយស្ថានទូតរុស្ស៊ី ប្រចាំប្រទេសអៀរឡង់ លើកឡើងកាលពីថ្ងៃទី២៩ កញ្ញា ថា ច្បាស់ណាស់រុស្ស៊ីត្រៀមប្រើប្រាស់គ្រប់អាវុធទាំងអស់ ក្នុងនោះ មានទាំងអាវុធនុយក្លេអ៊ែរផង ដើម្បីការពារដែនដីខ្លួនប្រសិនបើបណ្ដាប្រទេសអូតង់ប៉ុនប៉ងដាក់ឲ្យតំបន់កាលីនីនហ្គ្រាដ ស្ថិតនៅឯកោដាច់ពីដែនដីរុស្ស៊ីផ្សេងទៀត ។ ពេលសួរលោកនាឱកាសវេទិកានោះថា តើរុស្ស៊ីកំពុងតែរំកិលទៅរកការធ្វើសង្គ្រាមជាមួយអូតង់ ឬភាគីទាំង២ប៉ុនប៉ងសម្លុតបំភ៏យគ្នាទៅវិញទៅមកឬយ៉ាងណា លោកពូទីនឆ្លើយថា មិនមែនជាការសម្លុតបំភ័យទេតែជាចម្លើយមួយចំពោះការប៉ុនប៉ងសម្លុតបំភ័យយើង ៕
ចែករំលែកព័តមាននេះ