ខ្ចីឡានស៊េរីទំនើបគេបើកក្នុងស្ថានភាពស្រវឹ.ងបុ.ករះម៉ូតូ និងកង់បី ស្លា.ប់ម្នាក់ និងរបួសស្រាលម្នាក់
- បន្ទាយមានជ័យ
ខេត្តបន្ទាយមានជ័យ ៖ បុរសម្នាក់ខ្ចីរថយន្តស៊េរីទំនើបគេបើកក្នុងស្ថានភាពស្រវឹង បុករះម៉ូតូ និងកង់បី បណ្តាលឱ្យស្លាប់ម្នាក់និងម្នាក់រងរបួសស្រាល ចំណែកជនបង្កត្រូវបានឃាត់ខ្លួន ។
ហេតុការណ៍ខាងលើនេះបានកើតឡើងនៅយប់ថ្ងៃទី០១ ខែតុលា ឆ្នាំ២០២៦ លើផ្លូវជាតិលេខ៥៦ ស្ថិតភូមិពីរ សង្កាត់កំពង់ស្វាយ ក្រុងសិរីសោភ័ណ។
អ្នកបើកបររថយន្តបង្កដែលឃាត់ខ្លួន មិនត្រូវបានគេស្គាល់ឈ្មោះឡើយ មានអាយុប្រហែលជាង២០ឆ្នាំ បានខ្ចីរថយន្តគេបើក ហើយបង្កគ្រោះថ្នាក់យ៉ាងធ្ងន់ធ្ងរ ។
មន្ត្រីនគរបាលចរាចរណ៍ផ្លូវគោកខេត្តបន្ទាយមានជ័យប្រាប់ថា មុនពេលកើតហេតុ មានបុរសម្នាក់បានបើករថយន្តមួយគ្រឿងម៉ាកតូយ៉ូតា ត្រាវ៉ូ VEDITION ស៊េរីទំនើប គ្មានផ្លាក់លេខ បានបើកបរតាមបណ្តោយផ្លូវជាតិលេខ៥៦ ក្នុងទិសដៅពីជើងមកត្បូងក្នុងល្បឿនលឿនបានរ៉េចង្កូតបុករះអ្នកជិះម៉ូតូ បណ្តាលឱ្យស្លាប់ម្នាក់នៅនឹងកន្លែងកើតហេតុ និងកង់បី របួសស្រាល ក្នុងទិសដៅបញ្ច្រាសគ្នា។
មន្ត្រីនគរបាលចរាចរណ៍បានបញ្ជាក់ថា ៖ ក្រោយជនបង្កដែលបើករថយន្តបុករះម៉ូតូនិងកង់បី បណ្តាលឱ្យស្លាប់ម្នាក់ និងរបួសស្រាលម្នាក់ ហើយជនបង្កបើកបរក្នុងស្ថានភាពស្រវឹង ត្រូវបានអ្នកជិតខាង ចាប់ប្រគល់ជូនកម្លាំងជំនាញយកទៅការិយាល័យចរាចរណ៍ផ្លូវគោកខេត្តបន្ទាយមានជ័យដើម្បីអនុវត្តន៍តាមនីតិវិធី។
មន្ត្រីនគរបាលជំនាញបានបញ្ជាក់ថា ជនរងគ្រោះម្នាក់ដែលស្លាប់ត្រូវបានគេស្គាល់ថាជាជាងម៉ូតូនៅផ្សារថ្មីរឺចំការគរ មានអាយុជាង៤០ឆ្នាំ ។
ក្រោយកើតហេតុ ម៉ូតូនិងកង់បីដែលរងការខូចខាតធ្ងន់និងរថយន្តបង្ក ត្រូវបានមន្ត្រីជំនាញនាំយកទៅរក្សាទុកនៅស្នងការដ្ឋាននគរបាលខេត្តដើម្បីអនុវត្តតាមច្បាប់ចរាចរណ៍ផ្លូវគោកនៅពេលក្រោយទៀត ៕
ចែករំលែកព័តមាននេះ