រាជធានី​ភ្នំពេញ​ ៖ ​អ្នកនាំពាក្យ​អង្គភាព​ប្រឆាំង​អំពើ​ពុក​រលួយ​ (ACU) ​បានចេញ​សេចក្តី​​ប្រកាស​ព័ត៌មាន​ករណី​ឃុំ​ព្រែក​ខ្សាច់ (​ភាគ​៤)​មេ​អន​ឡាញ​ស្គេម ប្រើប្រាស់​គ្រីប​តូ​ហើយ ឡាយ សុខ​គង់ អ្នក​ប្តូរ​ប្រាក់​ជា​អ្នក​ផ្តល់​សេវា​ប្តូរ​ប្រាក់​គ្រីប​តូ បម្រើ​សកម្មភាព​មេ​អន​ឡាញ​ស្គេម ​។

សេចក្តី​ប្រកាស​ព័ត៌មាន​បាន​លើក​ឡើង​ថា ​សព្វ​ថ្ងៃនេះ មិន​ត្រឹមតែ​ល្បិច​ឆបោក​កាន់តែ​មាន​កម្រិត​ខ្ពស់​ប៉ុណ្ណោះ​ទេ តែ​ភាព​ជឿនលឿន​នៃ​បច្ចេកវិទ្យា បញ្ញា​សិប្បនិម្មិត AI ដែល​ជួយ​ឱ្យ​ឧក្រិដ្ឋជន​រាប់​ទាំង​អ្នក​ឆបោក​តាម​ប្រព័ន្ធ​បច្ចេក​វិទ្យា (​អន​ឡាញ​ស្គេម​) ងាយ​សកម្មភាព ងាយ​បិទ​បាំង គេច​ពី​ការ​ចាប់​បាន​ពី​សំ​ណា​ក់​សមត្ថកិច្ច រហូត​សមត្ថកិច្ច​នៃ​ប្រទេស​មួយ​ត្រូវ​សហការ​មិន​អាច​ខ្វះ​បាន​ ជាមួយ​សមត្ថកិច្ច​នៃ​ប្រទេស​ច្រើន​ចូល​គ្នា ក៏​មាន​ករណី​ជា​ច្រើន​នៅ​​តែ​រក​ចាប់​មេ​អន​ឡាញ​ស្គេមមិន​បាន​ឡើយ​ ។

បន្ថែម​លើ​នេះ​ទៀត ពួក​ឧក្រិដ្ឋជន ពួក​អន​ឡាញ​ហ្គេ​ម ​​បាន​ប្រើប្រាស់​ការ​ទូទាត់​ប្រាក់​ដោយ និម្មិត (​មិនមែន​ប្រាក់​ពិត​) ហៅ​ថា ប្រាក់​គ្រីប​តូ (​ជា​ប្រាក់​កំណត់​ដោយ​បច្ចេកទេស​កុំព្យូទ័រ​) ដែល​គ្មាន​លទ្ធភាព អាច​គ្រប់គ្រង​បាន ដើម្បី​លាក់​លុយ បញ្ជូន​លុយ​ទៅ​កន្លែង​សុវត្ថិភាព ដើម្បី​ប្តូរ​យក​ជា​ប្រាក់​ពិត (​ដូច​ជា​ប្រាក់​ដុល្លារ​អា​មេ​រិ​ក USD, ប្រាក់​យ៉​ន់​របស់​ចិន ប្រាក់​រៀល​របស់​កម្ពុជា​…) មក​វិញ​។ ប្រការ​នេះ សូ​ម្បី​សមត្ថកិច្ច​ស៊ើប​អង្កេត​ល្បី​ៗ​នៃ​ប្រទេស​​មហាអំណាច ក៏​នៅ​តែ​លំបាក​ចាប់​យក​បាន​ប្រាក់​គ្រីប​តូ​នេះ​ណាស់ (​ទើប​ថ្មី​ៗ​នេះ​សហរដ្ឋអាមេរិក​ចាប់​យក (​រឹបអូស​) បាន​ពី​ពួក​អន​ឡាញ​ស្គេម​​នូវ​ប្រាក់​គ្រីប​តូ​ប្រភេទ Bitcoin (BTC) បាន 127,000 BTC ស្មើនឹង​15​ពាន់​លាន​ដុល្លារ​អា​មេ​រិ​ក (USD)​។ 1 កាក់​លុយ​គ្រីប​តូ Bitcoin ស្មើនឹង 118,110 ដុល្លារ​អា​មេ​រិ​ក​)​។

សូម​បញ្ជាក់​ថា ការ​បើក​កុង (​គណនី​) លុយ​គ្រីប​តូ មិន​ទារ​អត្តសញ្ញាណ​បណ្ណ និង​ឯកសារ​អ្វី​ផ្សេង​ទាំង​អស់ ​គ្រាន់តែ​ដាក់​ឈ្មោះ (​ឈ្មោះ​ក្លែងក្លាយ​ក៏​បាន​) អ្នក​ផ្តល់​ទ្រព្យសកម្ម​និម្មិត (​ប្រាក់​គ្រីប​តូ​) ឱ្យ​លេខ​គណនី (​មាន 35 តួអក្សរ​) លេខ​សម្ងាត់​ជា​ស្រេច ដែល​អាច​ប្តូរ​លុយ​ពិត (​ឧ​ទា​. ប្រាក់​ដុល្លារ​អា​មេ​រិ​ក USD – ឬ​ប្រាក់​យ៉​ន់​ចិន​) មក​ជា​ប្រាក់​គ្រីប​តូ​បាន ហើយ​អាច​យក​ទិញ​ទំនិញ ឬ​ផ្ទេរ​ឱ្យ​អ្នក​ផ្សេង​ដែល​មាន​គណនី​ប្រាក់​គ្រីប​តូ​ដូច​គ្នា ​។

ចំពោះ​ប្រាក់​និម្មិត (​គ្រីប​តូ​) ដែល​គ្មាន​រដ្ឋ​ណា​គ្រប់គ្រង​បាន​ដូច​ជា​ការ​គ្រប់គ្រង​ប្រាក់​ពិត និង​ប្រាក់​តាម​ធនាគារ​នោះ​ទេ ហើយ​ប្រាក់​និម្មិត​នេះ ទោះបី​មាន​ច្រើន​យ៉ាង​ខុស​ៗ​គ្នា ប៉ុន្តែ​អាច​បែងចែក​ជា 2 ប្រភេទ​ខុស​គ្នា​៖

១-ប្រភេទ​ប្រាក់​គ្រីប​តូ​ថេរ (Stablecoin) (​មិន​ប្រែប្រួល​តម្លៃ​) ហើយ​យក​តម្លៃ​តាម​ប្រាក់​​ពិត​ដុល្លារ​អា​មេ​រិ​ក USD​។

ឧទាហរណ៍​៖ ប្រាក់​គ្រីប​តូ USDT (​របស់ Tether) ជា​ប្រាក់​គ្រីប​តូ​មាន​ប្រជាប្រិយ និង​ប្រើ​ច្រើន​ជាងគេ​លើ​ពិភព លោក -​ប្រាក់​គ្រីប​តូ USDC (USD Coin) របស់ Circle – ប្រាក់​គ្រីប​តូ DAI (​របស់ Ethereum) មាន​តម្លៃ​ប្រហែល​1​ដុល្លារ​អា​មេ​រិ​ក USD ដែរ​ ។

២-​ប្រភេទ​ប្រាក់​គ្រីប​តូ​អថេរ Volatile Crypto (​ប្រាក់​គ្រីប​តូ​ប្រែប្រួល​តម្លៃ​ឡើង​ចុះ​លឿន​) ។ ​ឧទាហរណ៍​៖ ប្រាក់​គ្រីប​តូ Bitcoin (BTC) ប្រាក់​គ្រីប​តូ​មុន​ដំបូង​គេ​ចាត់ទុកជា «មាស​ឌី​ជី​ថ​ល» ​។

ប្រាក់​គ្រីប​តូ BTC មួយ​កាក់​ធ្លាប់​ឡើង​ដល់​12​ម៉ឺន​ដុល្លារ​អា​មេ​រិ​ក ហើយ​ពេល​នេះ 1BTC = ជាង​8​ម៉ឺន​ដុល្លារ​អា​មេ​រិ​ក ​។ ​ឧទាហរណ៍​៖ ប្រាក់​គ្រីប​តូ ETH របស់ Ethereum – ប្រាក់​គ្រីប​តូ SOC របស់ Solona (​ប្រាក់​គ្រីប​តូ​នេះ​ល្បី ខាង​ផ្ទេរ​លឿន និង​មាន​តម្លៃ​សេវា​ទាប – BNB របស់ Binance Coin ជា​ប្រាក់​ប្តូរ Exchange ធំ​បំផុត ក្នុង​ពិភពលោក​…

ប្រភព​បាន​លើក​ឡើង​ទៀត​ថា ក្នុង​ករណី​ឃុំ​ព្រែក​ខ្សាច់​ភាគ​ទី 4 ដែល​ជា​ភាគ​បញ្ចប់​នេះ មេខ្លោង​ចិន​អន​ឡាញ​ហ្គេ​ម​ដ៏​តូច​មួយ​នេះ ប្រើ ប្រាស់​គ្រីប​តូ​ប្រភេទ USDT របស់ TOKEN POCKET (TP) ហើយ​បុគ្គល​ជា VASP (1) គឺ ឡាយ សុខ
​គង់។

សេចក្តី​ប្រកាស​ព័ត៌មាន​លើក​ឡើង​ទៀត​ថា ​មេ​អន​ឡាញ​ស្គេម ឈ្មោះ​ហៅ​ក្រៅ ត្រងោល – ឈ្មោះ​ក្នុង​បញ្ជី​របស់​ក្រុម​ឆបោក​គឺ ឆៃ យ៉ូ​វ​យៀន Cai You Yuan ហើយ​ឈ្មោះ​ពិតប្រាកដ​ គឺ ចាង ចៀន​ឃាំង Zhang Jian Qiang ត្រូវ​បាន​រក​ឃើញ​មាន​ប្រើ​គណនី គ្រីប​តូ​ប្រភេទ​ប្រាក់ USDT ហើយ ឡាយ សុខ​គង់ ក៏​មាន​គណនី​គ្រីប​តូ​ប្រភេទ USDT (​ប្រភេទ​ប្រាក់​គ្រីប​តូ​ថេរ 1USDT = 1USD) ។

អ្នកនាំពាក្យ ACU បាន​លើក​ឡើង​ទៀត​ថា ​មេ​អន​ឡាញ​ហ្គេ​ម​ឈ្មោះ ត្រងោល – ឈ្មោះ​ផ្សេង​ទៀត ឆៃ យ៉ូ​វ​យៀន Cai You Yuan/ ឈ្មោះ ចាង ចៀន​ឃាំង Zhang Jian Qiang (​ឈ្មោះ​ក្នុង​លិខិតឆ្លងដែន និង​អត្តសញ្ញាណ​បណ្ណ​ជនជាតិ​ចិន​) មាន គណនី​ប្រាក់​គ្រីប​តូ​ច្រើន​ជាង 10 ដែល​ក្នុង​នោះ ACU រក​ឃើញ​ថា​៖

វា​ប្រើ​ប្រាក់​គ្រីប​តូ (USDT) ឱ្យ​ប្តូរ​ជា​ប្រាក់​ពិតជា​ដុល្លារ​អា​មេ​រិ​ក (USD) (1USDT = 1USD) ឬ​ជា​ប្រាក់ យ៉​ន់​ចិន (1USDT = 6.7 យ៉​ន់​ចិន​) ហើយ​ឱ្យ​អ្នក​ប្តូរ​លុយ​នេះ ផ្ញើ​ជា​ប្រាក់​ដុល្លារ​អា​មេ​រិ​ក ឬ​លុយ​យ៉​ន់ ចិន​ឱ្យ​អ្នក​ដែល ឆៃ យ៉ូ​វ​យៀន ចង់​បញ្ជូន​ឱ្យ ឬ​ត្រូវ​ចំណាយ​ឱ្យ​សម្រាប់​ទិញ​ទំនិញ ដឹក​ជញ្ជូន បង់ថ្លៃ​សេ វា និង​ប្រាក់​ពុក​រលួយ ដូច​ជា ករណី ឆៃ យ៉ូ​វ​យៀន ត្រូវ​បង់​ឱ្យ​មន្ត្រី​នគរបាល​អន្តោប្រវេសន៍ ភេ ផាត់​ផេង ឬ បង់ប្រាក់​ឱ្យ​មេឃុំ រៀម រុំ ជាដើម គឺ​ពេល​ផ្ទេរ​ប្រាក់​ពី ឆៃ យ៉ូ​វ​យៀន ហើយ មិន​ត្រូវ​មើលឃើញ​ថា ប្រាក់ នេះ​ចេញពី ឆៃ យ៉ូ​វ​យៀន​ទេ​ ។ ឧទាហរណ៍ ឆៃ យ៉ូ​វ​យៀន ឱ្យប្រាក់​គ្រីប​តូ​ទៅ ឡាយ សុខ​គង់ (​ម្ចាស់​តូប ប្តូរ​ប្រាក់ សុខ​គង់ 148) ហើយ ឡាយ សុខ​គង់ យក​ប្រាក់​ដុល្លារ​តាម​គណនី​ស្របច្បាប់​របស់​ខ្លួន​ផ្ញើ​ឱ្យ​ រៀម រុំ​ ។

ក្រៅពី​នេះ យើង​រក​ឃើញ​ទៀត​ថា ចំណូល​ដែល ឆៃ យ៉ូ​វ​យៀន ទទួល​បាន ឆៃ យ៉ូ​វ​យៀន ផ្ទេរ​ទៅ​តាម​គណនី​គ្រីប​តូ​ឱ្យ​មេ​ធំ (​កាបូប​ប្រាក់​គ្រីប​តូ​ឈ្មោះ OKX Hot Wallet  ហើយ ACU បានឃើញ​មាន ទឹកប្រាក់ 250,605,000 USDT (​ស្មើ 250,605,000 ដុល្លារ​អា​មេ​រិ​ក​) ។

ភស្តុ​តាង​នេះ​បង្ហាញ​ថា ប្រាក់​បាន​ពី​អំពើ​ឆបោក​90% ត្រូវ​ផ្ទេរ​ចេញ​តាម​គ្រីប​តូ​ទៅ​ក្រៅប្រទេស​ភ្លាម​ៗ មិន​មាន​បន្សល់​នៅ​កម្ពុជា​នោះ​ទេ​ ។ ប្រាក់​ចាយវាយ និង​នៅ​សល់​នៅ​កម្ពុជា​ត្រឹម​រាប់​ម៉ឺន​ដុល្លារ​ប៉ុណ្ណោះ ដែល​យើង​អាច​ចាប់​យក​បាន (​រឹបអូស​) ប្រសិនបើ​យើង​រក​ឃើញ​ ។

អំពី​ឈ្មោះ ឡាយ សុខ​គង់ ដែល​ជា​អ្នក​ទទួល​ប្តូរ​ប្រាក់​គ្រីប​តូ និង​ដុល្លារ​អា​មេ​រិ​ក ប្រាក់​យ៉​ន់​ចិន ឱ្យ ឆៃ យ៉ូ​វ​យៀន តាម​គណនី​គ្រីប​តូ (​រាល់​ការ​ផ្ទេរ​ប្រាក់​គណនី​គ្រីប​តូ តាម​បញ្ញត្តិ​របស់​ធនា គារ​ជាតិ គឺ​ខុស ច្បាប់​) ហើយ​ប្រើ​គណនី​ប្រាក់​ដុល្លារ​ពិត​នៅ​ធនាគារ​ស្របច្បាប់ ដើម្បី​បញ្ជូន​ប្រាក់​ទៅ​ឱ្យ រៀម រុំ និង គោលដៅ​ផ្សេង​ទៀត​ដែល ឆៃ យ៉ូ​វ​យៀន ចង់​បញ្ជូន​ទៅ​ ។

ឈ្មោះ​ពិត និង​ឈ្មោះ​បាន​ប្រើ ឡាយ សុខ​គង់ Lay Sokong, SOKONG148-​ប្តូរ​ប្រាក់​, Licensed FX, Sokong, ថ្ងៃ​មុខ​នៅ​វែង​ឆ្ងាយ​ទៀត (​ឈ្មោះ​នេះ​ប្រើ​ក្នុង WeChat), SK, U1, U2, U3, U4 (​ឈ្មោះ U1 ដល់ U4 នេះ ប្រើ​ក្នុង​គណនី​គ្រីប​តូ Token Pocket, SK148 (​ឈ្មោះ​នេះ​ប្រើ​ក្នុង​គណនី គ្រីប​តូ Token Pocket – ឈ្មោះ ស៊ូ ជើង ឈ្មោះ​ជា​ភាសា​ចិន​) – ជើង​ស៊ូ (​ឈ្មោះ​ប្រើ​ក្នុង​ក្រុម​អន​ឡាញ ហ្គេ​ម​របស់ ឆៃ យ៉ូ​វ​យៀន ដែល​មាន 4 នាក់ ដែល​មាន ឡាយ សុខ​គង់ – ឆៃ យ៉ូ​វ​យៀន និង​ចិន 2 នាក់ ទៀត​)​។ ក្រុម 4 នាក់​នេះ ដាក់​ឈ្មោះ​ថា OD ជិ​ញ​ស៊ូ – លុយ​ស​សុទ្ធ – ធានា​យូរអង្វែង​)

អ្នកនាំពាក្យ​ACU​បាន​លើក​ឡើង​ទៀត​ថា​ឡាយ សុខ​គង់ បច្ចុប្បន្ន 25 ឆ្នាំ កម្រិតវប្បធម៌​ថ្នាក់​ទី 9 – ឆ្នាំ 2018 ដល់ 2020 រៀន​ភាសា​ចិន​នៅ សាលា​ទួន​ហ្វា និង​អង់គ្លេស​នៅ​សាលា Standford International Academy​។ មុខរបរ​ការងារ បុគ្គលិក​បិទ​ក្រដាស​ជញ្ជាំង​ផ្ទះ – ឆ្នាំ 2020-2021 ធ្វើ​ជា​អ្នកបកប្រែ​ភាសា​ចិន​។ តាំងពី​ឆ្នាំ 2024 ដល់ បច្ចុប្បន្ន ម្ចាស់​តូប​ប្តូរ​ប្រាក់​យីហោ សុខ គង់ 148 ក្នុង​បុរី​ប៉េង​ ហួត បឹង​ស្ទោ សង្កាត់​និរោធ ខណ្ឌ​ច្បារ​អំពៅ រាជធានី​ភ្នំពេញ​ ៕