រាជធានីភ្នំពេញ ៖ ជនសង្ស័យម្នាក់ត្រូវបានកម្លាំងប៉ុស្តិ៍នគរបាលរដ្ឋបាលដង្កោធ្វើការឃាត់ខ្លួនបាន រីឯបក្ខពួកម្នាក់ទៀតបានរត់គេចខ្លួនរួច ខណៈពួកគេចូលទៅធ្វើសកម្មភាពលួចយកទូរស័ព្ទនៅក្នុងហាងសាឡនមួយកន្លែង បានចំនួន៤គ្រឿង ។
ប៉ុន្តែភ្លាមៗនោះត្រូវបានម្ចាស់ទូរស័ព្ទខាងលើឃើញទាន់ស្រែកឆោឡោថា«ចោរៗ» ធ្វើឲ្យជនសង្ស័យភ័យ ជិះម៉ូតូរត់គេចខ្លួនជ្រុលទៅទាក់ដៃចង្កូតជាមួយម៉ូតូកង់បី១គ្រឿងបណ្ដាលឲ្យដួល ទើបម្នាក់ជាប់ខ្នោះ និងម្នាក់ទៀតរត់រួច ។
ហេតុការណ៍នោះបានកើតឡើង កាលពីវេលាម៉ោង១១និង៥០នាទីថ្ងៃត្រង់ ថ្ងៃទី២៣ ខែកញ្ញា ឆ្នាំ២០២៦ នៅត្រង់ចំណុចហាងសាឡនយីហោ«១៩៨៨» ស្ថិតនៅផ្ទះលេខ១២AE០E១ ផ្លូវលេខ២០២០ ភូមិម័លសង្កាត់ដង្កោ ខណ្ឌដង្កោ រាជធានីភ្នំពេញ ។
ជនសង្ស័យខាងលើឈ្មោះ ឃុង ឡា ភេទប្រុស អាយុ២៥ឆ្នាំ ស្នាក់នៅបន្ទប់ជួល ស្ថិតនៅតាមផ្លូវលំ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ (មានផ្ទុកសារធាតុញៀន) និងបក្ខពួកម្នាក់ទៀតដែលរត់គេចខ្លួនរួចឈ្មោះ ជា ភេទប្រុស អាយុប្រហែល១៦ឆ្នាំ ។
ម្ចាស់ទូរស័ព្ទមាន២នាក់ ទី១.ឈ្មោះសំអុល ស្រីផា ភេទស្រី អាយុ១៧ឆ្នាំ មុខរបរជាងសាឡន និងទី២.ឈ្មោះ អ៊ីន សារឿន ភេទស្រី អាយុ៤៥ឆ្នាំ មុខរបរជាងសាឡន អ្នកទាំង២ ស្នាក់នៅផ្ទះកើតខាងលើ ។
ដោយឡែក ទូរស័ព្ទដែលត្រូវជនសង្ស័យលួច មានចំនួន៤គ្រឿងរួមមាន ៖ ម៉ាក SAMSUNG ២គ្រឿងជាជារបស់ឈ្មោះ អ៊ីន សារឿន រីឯ២គ្រឿងទៀត មានម៉ាកVIVO និងម៉ាកI PHONE ១១ គឺជាជារបស់ឈ្មោះសំអុល ស្រីផា ។
ក្រោយចាប់ខ្លួនជនសង្ស័យឈ្មោះ ឃុង ឡា នគរបាលដកហូតទូរស័ព្ទមកវិញបានតែ៣គ្រឿងប៉ុណ្ណោះ SAMSUNG ២គ្រឿង និង VIVO ១គ្រឿង ចំណែកម៉ាកI PHONE ១១ ត្រូវបានជនសង្ស័យឈ្មោះជាយកទៅបាត់ហើយ ។
នគរបាលបានប្រាប់ថា វេលាកើតហេតុខាងលើជាងសាឡនទាំង២នាក់បានទុកទូរស័ព្ទនៅលើសាឡុងទទួលភ្ញៀវ នៅក្នុងហាងសាឡនយីហោ«១៩៨៨» ហើយខណៈពេលកំពុងកក់សក់ឱ្យភ្ញៀវនៅក្នុងហាង បានឃើញជនសង្ស័យម្នាក់ឈ្មោះ ជា ចូលមកលួចទូរសព្ទដៃរបស់ពួកនាង ។ ពេលនោះពួកនាងក៏បានស្រែកឆោឡោថា «ចោរៗ» បង្កឲ្យមានការភ្ញាក់ផ្អើល ហើយជនសង្ស័យក៏បានរត់គេចខ្លួន ភ្លាមៗនោះម្ចាស់ទូរស័ព្ទទាំង២នាក់ ក៏បាននាំគ្នារត់ដេញតាមដែរ ។
នគរបាលបានប្រាប់បន្តថា ពេលរត់ចេញដល់ក្រៅហាងពួកនាងបានឃើញជនសង្ស័យឈ្មោះ ឃុង ឡា នៅចាំផ្លូវនិងអង្គុយលើម៉ូតូ១គ្រឿង ម៉ាក HONDA DREAM C១២៥ ពណ៌ខ្មៅ ពាក់ស្លាកលេខភ្នំពេញ1BF-6061 ។ បន្ទាប់មកជនសង្ស័យក៏បាននាំគ្នាជិះម៉ូតូគេចខ្លួន ខណៈនោះកម្លាំងប៉ុស្តិ៍នគរបាលរដ្ឋបាលដង្កោ ដែលកំពុងជិះម៉ូតូល្បាតនៅក្បែរនោះបាន ជួយអន្តរាគមន៍ដេញតាម ហើយដល់ផ្លូវបេតុង ស្ថិតភូមិឫស្សី១ សង្កាត់ស្ទឹងមានជ័យទី៣ ខណ្ឌមានជ័យ ។
ជនសង្ស័យបានទាក់ដៃចង្កូតជាមួយម៉ូតូកង់បី១គ្រឿង បណ្តាលឱ្យដួលម៉ូតូ ក៏ត្រូវនគរបាលឃាត់ខ្លួនបានម្នាក់ឈ្មោះ ឃុង ឡា រួចនាំយកទៅកាន់ប៉ុស្តិ៍នគរបាលរដ្ឋបាលដង្កោ ដើម្បីធ្វើការសាកសួរនិងចាត់តាមច្បាប់ ចំណែកឈ្មោះជា បានយកទូរសព្ទដៃម៉ាក I PHONE ដែលលួចបានគេចខ្លួនបាត់ស្រមោល ៕
ចែករំលែកព័តមាននេះ