ម្ចាស់ក្សត្រីថៃ Sirikit បានសម្តែងព្រះរាជហឫទ័យសោកសង្រេងចំពោះអំពើហិ.ង្សាដែលកាន់តែ រីកធំឡើងនៅក្នុងតំបន់ភាគខាងត្បូងប្រទេស។ ជាមួយគ្នានេះការវាយប្រហារមកលើព្រះសង្ឃ គឺជាការរំលោ.ភលើសេរីភាពសាសនាយ៉ាងធ្ងន់ធ្ងរ។ ម្ចាស់ក្សត្រីបានមានព្រះសវនីយ៍ពីក្តីបារម្ភរបស់ទ្រង់ទៅលើបញ្ហាផ្សេងៗ
ម្ចាស់ក្សត្រីថៃ Sirikit បានសម្តែងព្រះរាជហឫទ័យសោកសង្រេងចំពោះអំពើហិង្សាដែលកាន់តែរីកធំឡើងនៅក្នុងតំបន់ភាគខាងត្បូងប្រទេស។ ជាមួយគ្នានេះការវាយប្រហារមកលើព្រះសង្ឃ គឺជាការរំលោភលើសេរីភាពសាសនាយ៉ាងធ្ងន់ធ្ងរ។
ម្ចាស់ក្សត្រីបានមានព្រះសវនីយ៍ពីក្តីបារម្ភរបស់ទ្រង់ទៅលើបញ្ហាផ្សេងៗក្នុងតំបន់ភាគខាងត្បូងប្រទេស ក្នុងអំឡុងថ្លែងសុន្ទរកថាក្នុងកម្មវិធីចំរើនព្រះជន្មគម្រប់៧៩វស្សា ក្រោមការចូលរួមពីសមាជិកគណៈរដ្ឋមន្ត្រី អ្នកមានបណ្តាស័ក្តិ មន្ត្រីរាជការជាន់ខ្ពស់ អ្នកមានមុខមាត់ក្នុងសង្គម នៅឯប្រាសាទDusitdalai Pavilion កាលពីថ្ងៃទី១១ សីហា និងមានការចាក់ផ្សាយតាមទូរទស្សន៍ព្រមពេលគ្នាទាំងអស់។
ព្រះអង្គមានព្រះសវនីយ៍ថា ទ្រង់មានការភ្ញាក់ផ្អើលនិងក្រៀមក្រំយា៉ងខ្លាំងពីអំពើហិង្សាដែលបានរីករាលដាលដល់ព្រះសង្ឃ ដែលជាបុគ្គលមិនដែលបង្កបញ្ហាដល់សង្គម ដល់អាជ្ញាធររដ្ឋ និងប្រជាពលរដ្ឋស៊ីវិល។ ព្រះរាជាណាចក្រថៃមានកេរ្តិ៍ឈ្មោះល្បីល្បាញចំពោះសេចក្តីសន្តោសប្រណីក្នុងវិស័យសាសនាចាប់តាំងពីក្នុងរាជ្យស្តេច Mongkut ។ ទីក្រុងបាងកកត្រូវបានគេបោះឆ្នោតសម្រេចថា ជាទីក្រុងល្អបំផុតពីទស្សនាវដ្តីដំណើរកំសាន្តអន្តរជាតិ ទាំងនេះក៏ដោយសារមានគុណសម្បត្តិមួយផ្នែកពីការសន្តោសប្រណីក្នុងវិស័យសាសនា ដែលមានមនុស្សមកពីសាសនាផ្សេងៗគ្នានិងមានជំនឿខុសគ្នានៅរួមគ្នា និងអនុញ្ញាតឲ្យពួកគេប្រតិបត្តិជំនឿរបស់គេដោយសេរី។
ព្រះអង្គបានបន្តថា ទ្រង់មិនជឿថា វាជាសកម្មភាពរបស់ប្រជាជនថៃមូស្លីមដែលជាមនុស្សមានចិត្តធម៌ និងករុណានោះទេ។ ការការពារមិនឲ្យប្រជាពលរដ្ឋប្រគល់ទេយ្យទានដល់ព្រះសង្ឃ គឺជាការបំពារបំពានដល់សេរីភាពក្នុងការប្រតិបត្តិជំនឿសាសនារបស់ពួកគេ។
ជាចុងក្រោយទ្រង់ព្រះសវនីយ៍ថា ព្រះមហាក្សត្រតែងតែមានហឫទ័យសន្តោសស្មើគ្នាលើគ្រប់សាសនាទាំងអស់ និងយាងទៅកាន់គ្រប់តំបន់ ហើយទ្រង់ផ្ទាល់ក៏ធ្វើដូចគ្នានោះដែរ។ អ្នកទាំងអស់គ្នាក៏មានសេចក្តីសោកសង្រេង និងបែបន់ឲ្យបញ្ហាបានចប់ដែរ។ ដូច្នេះខ្ញុំសូមសំណូមពរដល់អ្នកទាំងអស់គ្នាធ្វើយ៉ាងណាឱ្យប្រទេសមានសន្តិភាព និងសុភមង្គលឡើងវិញនៅលើដែនដីខាងត្បូងប្រទេស។ រាជរដ្ឋាភិបាល និងមន្ត្រីសាធារណៈត្រូវខិតខំប្រឹងប្រែងប្រយុទ្ធប្រឆាំងជាមួយគ្រឿងញៀនខុសច្បាប់ដែលរីករាលដាលធំលឿនជាងមេរោគ។ ជាមួយគ្នានេះដែរ ព្រះមហាក្សត្រក៏បានខិតខំប្រឹងប្រែងលើកទឹកចិត្តដល់មនុស្សក្នុងកុលសម្ព័ន្ធតាមភ្នំឲ្យផ្លាស់ប្តូរពីការដាំដុះគ្រឿងញៀនទៅដាំដំណាំងផ្សេងវិញ ព្រោះប្រទេសត្រូវបានគេប្រើប្រាស់ជាផ្លូវជូញដូរគ្រឿងញៀននិងជាកន្លែងផលិតផងដែរ។
ម្ចាស់ក្សត្រីបានថ្កោលទោសមនុស្សដែលជាប់ទាក់ទងនឹងជំនួញខុសច្បាប់នេះថា ជាឃាតកឈាមត្រជាក់ ទ្រង់នៅមិនសុខឡើយនៅពេលឮថា ថ្នាំញៀនកើនឡើង និងអាចរកបាននៅគ្រប់ទីកន្លែង ជាពិសេសនៅក្នុងសាលារៀន។ ពួកគេបានធ្វើសកម្មភាពដូចជាឃាតក ដោយបានសម្លាប់កូនៗរបស់ខ្លួនផ្ទាល់តាមវិធីត្រជាក់នេះ។ ទ្រង់បានផ្តល់ប្រាក់ផ្ទាល់ខ្លួនឧបត្ថម្ភដល់ការិយាល័យនៃគណៈកម្មការគ្រប់គ្រង Narcotics (ONCB) ដើម្បីគាំទ្រសកម្មភាពប្រឆាំងគ្រឿងញៀន។
ONCB បានប្រើប្រាស់ប្រាក់ទាំងនោះលើភូមិចំនួន១២.១៨៩ ដើម្បីជួយដល់សហគមន៍របស់ពួកគេគ្មានគ្រឿងញៀន។ ក្នុងសម័យរដ្ឋាភិបាលលោកអាប់ភីស៊ីត ក៏មានការបន្ថែមប្រាក់៣០០លានបាត ហើយទ្រង់មានក្តីសង្ឃឹមថា រដ្ឋាភិបាលថ្មីនឹងគាំទ្រកិច្ចការនោះបន្តទៀត។
បន្ទាប់មកទ្រង់បានមានព្រះសវនីយ៍ពីព្រះរាជសុខភាពព្រះមហាក្សត្រថា ព្រះអង្គបានធូរស្បើយហើយ។ ព្រះអង្គនៅបន្តទទួលការព្យាបាលដោយចលនាដើម្បីឲ្យសាច់ដុំរឹងមាំវិញ។ ព្រះអង្គអាចធ្វើការបានច្រើនជាងមុន ហើយកំពុងមានក្តីបារម្ភពីបញ្ហាទឹកជំនន់នៅភាគខាងជើង និងតំបន់ភាគឦសាន៕
ចែករំលែកព័តមាននេះ