ត្រៀមខ្លួនទស្សនាព្រះអាទិត្យរះចំកំពូលកណ្ដាលអង្គរវត្ត! បាតុភូតសមរាត្រីរដូវវស្សា ២០២៦ នឹងចាប់ផ្តើមនៅថ្ងៃស្អែក
- សៀមរាប
ខេត្តសៀមរាប ៖ សូមលោកអ្នកត្រៀមខ្លួនឱ្យរួចរាល់ ដើម្បីចូលរួមទទួលយកបទពិសោធន៍ដ៏រំភើប និងស្ញប់ស្ញែងបំផុតចំពោះទេពកោសល្យស្នាដៃនៃបុព្វបុរសខ្មែរ ចាប់ពីស្អែកនេះតទៅ។
បើតាមអាជ្ញាធរជាតិអប្សរា បានឱ្យដឹងថា ព្រឹត្តិការណ៍ សមរាត្រី (Angkor Equinox) នារដូវវស្សាឆ្នាំ២០២៦ នឹងឈានចូលមកដល់នៅថ្ងៃស្អែកនេះ។ នេះជាបាតុភូតធម្មជាតិដ៏អស្ចារ្យដែលថ្ងៃនិងយប់មានរយៈពេលស្មើគ្នា ហើយជាពេលវេលាដែលពន្លឺព្រះអាទិត្យពណ៌មាស នឹងរះឡើងត្រង់ចំកំពូលកណ្ដាលនៃប្រាសាទអង្គរវត្តយ៉ាងល្អឯក។
ទិដ្ឋភាពដ៏អស្ចារ្យនេះ មិនត្រឹមតែជាសម្រស់ធម្មជាតិដ៏កម្របានឃើញប៉ុណ្ណោះទេ ប៉ុន្តែជាភស្តុតាងរស់បង្ហាញពីចំណេះដឹងផ្នែកតារាសាស្ត្រ គណិតវិទ្យា និងស្ថាបត្យកម្មដ៏កំពូលគ្មានពីររបស់ដូនតាខ្មែរក្នុងការកសាងប្រាសាទប្រវត្តិសាស្ត្រនេះឡើង។
សូមជូនព័ត៌មានសម្រាប់ការចូលរួមទស្សនា៖
-កាលបរិច្ឆេទដែលអាចទស្សនាបាន៖ ចាប់ពីថ្ងៃទី២១ ដល់ ២៣ ខែកញ្ញា ឆ្នាំ២០២៦
-ថ្ងៃត្រូវតាមក្បួនតម្រា៖ ថ្ងៃទី២២ ខែកញ្ញា ឆ្នាំ២០២៦
-ពេលវេលាល្អបំផុត៖ ចាប់ពីម៉ោង ៦និង១៥ព្រឹក ដល់ ៦និង៤៥ព្រឹក
សូមអញ្ជើញភ្ញៀវទេសចរជាតិ អន្តរជាតិ និងបងប្អូនប្រជាពលរដ្ឋខ្មែរទាំងអស់ រៀបចំដំណើរកម្សាន្តមកកាន់ទឹកដីប្រវត្តិសាស្ត្រខេត្តសៀមរាប ដើម្បីចូលរួមទស្សនា និងផ្តិតយករូបភាពអនុស្សាវរីយ៍ដ៏កម្រនេះដោយផ្ទាល់ភ្នែក។
សូមចំណាំ៖ ដើម្បីចូលរួមថែរក្សាកិត្តិយស និងតម្លៃបេតិកភណ្ឌពិភពលោក សូមភ្ញៀវទេសចរទាំងអស់មេត្តាស្លៀកពាក់ឱ្យបានត្រឹមត្រូវ និងគោរពតាម «ក្រមប្រតិបត្តិអង្គរ» (Angkor Code of Conduct) ឱ្យបានខ្ជាប់ខ្ជួន៕
ចែករំលែកព័តមាននេះ