ក្មេងស្រីអាយុ១៣ឆ្នាំម្នាក់ ត្រូវគេល្បួងឌុបតាមម៉ូតូទាំងយប់យកទៅបាត់០៥ថ្ងៃហើយនៅតែគ្មានដំណឹង
- បាត់ដំបង
ខេត្តបាត់ដំបង ៖ រយៈពេល០៥ថ្ងៃហើយ បើគិតត្រឹមថ្ងៃទី១៤ កញ្ញា នេះ ដែលក្មេងស្រីវ័យ១៣ឆ្នាំម្នាក់ត្រូវជនមិនស្គាល់មុខល្បួងចេញពីផ្ទះឌុបតាមម៉ូតូយកទៅបាត់ទាំងកណ្ដាលយប់ នៅតែគ្មានដំណឹងសូម្បីប៉ុនក្រចក បើទោះជាម្ដាយរបស់នាងបានប្ដឹងសុំអន្តរាគមន៍ពីសមត្ថកិច្ច និងធ្វើការស្វែងរកគ្រប់ច្រកល្ហកក្ដី ។
ក្មេងស្រីដែលត្រូវគេល្បូងចេញពីផ្ទះនោះឈ្មោះ សុង ស្រីណយ អាយុ១៣ឆ្នាំ រស់នៅភូមិស្នឹងកើត ឃុំស្នឹង ស្រុកបាណន់ ។ បើតាមអាណាព្យាបាលបានប្រាប់ថា កូនស្រីគាត់ត្រូវបានយុវជនម្នាក់វ័យប្រហែល២០ឆ្នាំ ល្បូងយកទៅជាមួយនឹងម៉ូតូមួយគ្រឿងទៀត នៅវេលាម៉ោង១០ និង៣០នាទីយប់ថ្ងៃទី ០៩ កញ្ញា នៅពេលនាងជិះម៉ូតូចេញពីផ្ទះទៅរកទិញម្ហូបនៅម្ដុំ «ផ្សារស្នឹង» ហើយក៏ត្រូវយុវជននោះ ល្បួងឌុបយកទៅបាត់រហូតមកដល់ថ្ងៃនេះ នៅតែពុំមានដំណឹងដដែល ។ គាត់បានជិះម៉ូតូតាមទាន់មួយភ្លែតក៏បាត់ដាន តែគាត់មិនចំណាំមុខយុវជននោះទេ ប៉ុន្តែអាចសន្និដ្ឋានពីអាយុប្រហែល២០ឆ្នាំ ។
អធិការស្រុកបាណន់ លោក ហេង បាំរាំង បានបញ្ជាក់ប្រាប់តាមទូរស័ព្ទនៅរសៀលថ្ងៃទី ១៤ កញ្ញានេះថា មន្ត្រីប៉ុស្ដិ៍រដ្ឋបាលបានទទួលបណ្ដឹងពីម្ដាយជនរងគ្រោះនោះហើយ ហើយលោកក៏បានរាយការណ៍ទៅការិយាល័យជំនាញ ដើម្បីជួយអន្តរាគមន៍ ប៉ុន្តែរហូតមកទល់នឹងថ្ងៃនេះ យើងមិនទាន់មានតម្រុយពីមុខសញ្ញានេះនៅឡើយទេ ។ លោកបានបញ្ជាក់ថា រឿងបាត់ក្មេងស្រីខាងលើនេះ បើតាមក្រុមគ្រួសារដែលបានដាក់ពាក្យបណ្ដឹងថា កូនស្រីគាត់ត្រូវបានសង្សារបស់នាងឌុបយកទៅ តែពុំទាន់ដឹងគោលដៅទេ ។
ម្ដាយក្មេងស្រីរងគ្រោះ គឺអ្នកស្រី ឈឿម ស្រីនិច អាយុ៣៦ឆ្នាំ បានរៀបរាប់ថា នៅយប់កើតហេតុ គាត់បានប្រើកូនស្រីឲ្យទៅទិញសាច់មាន់អាំងនៅម្ដុំ «ផ្សារស្នឹង» ។ ប៉ុន្តែក្រោយពេលជិះម៉ូតូចេញទៅក៏បាត់ឈឹង មិនឃើញត្រឡប់មកវិញ ។ គាត់បន្តថា ដោយបាត់កូនស្រីយូរពេក គាត់និងប្អូនស្រីគាត់ម្នាក់ទៀត ក៏ជិះម៉ូតូទៅតាម លុះទៅដល់ផ្លូវបំបែកទៅឃុំចែងមានជ័យ ស្រុកបាណន់ និងទៅប៉ៃលិន ក៏ប្រទះឃើញកូនស្រីគាត់ត្រូវគេឌុបចេញពីផ្លូវមួយក្នុងភូមិព្រះស្រែ ឡើងលើផ្លូវជាតិលេខ៥៧ ឆ្ពោះទៅបាត់ដំបង ប៉ុន្តែពេលគាត់ស្រែកហៅអ្នកឌុបនោះ ក៏បត់ម៉ូតូត្រឡប់ក្រោយ តាមផ្លូវជាតិលេខ៥៧ដដែល ឆ្ពោះទៅខេត្តប៉ៃលិនយ៉ាងលឿន ខណៈគាត់ពីរនាក់ប្អូនស្រីនៅតែបន្តជិះដេញតាមពីក្រោយ ។
អ្នកស្រី ឈឿម ស្រីនិច បានបញ្ជាក់ថា ពេលគាត់ជិះដេញតាមពីក្រោយរហូតដល់ផ្លូវបត់ត្រង់ចំណុចភូមិរំជៃ ឃុំស្នឹង ជននោះក៏បិទភ្លើងម៉ូតូ ស្របពេលចាំងភ្លើងរថយន្តមកពីមុខផង ធ្វើឲ្យគាត់វង្វេងបាត់ដានម៉ូតូកូនស្រីគាត់ត្រង់នោះតែម្ដង ។ ហើយក៏មិនដឹងថា មនុស្សប្រុសនោះឌុបកូនស្រីគាត់យកទៅណាបន្តទៀតទេ ព្រោះគាត់បាត់ដានត្រឹមផ្លូវកែងនោះ ។ គាត់បញ្ជាក់ថា គាត់មើលមិនច្បាស់ពីភិនភាគអ្នកឌុបកូនស្រីគាត់ទេ តែអាចចំណាំបានថា យុវជននោះ មានវ័យប្រហែល២០ឆ្នាំ ។
ជាចុងក្រោយ គាត់បានបញ្ជាក់បន្ថែមថា មួយថ្ងៃ ក្រោយបាត់កូនស្រី គឺនៅវេលាថ្ងៃត្រង់ ថ្ងៃទី១០ កញ្ញា មានអ្នកស្គាល់ម្នាក់ បានប្រាប់គាត់ថា គេបានប្រទះឃើញកូនស្រីគាត់ចាក់សាំងម៉ូតូនៅហ្គារាសសាំងមួយកន្លែង នៅម្ដុំផ្លូវហាយវេ (ផ្លូវភ្នំសំពៅ) ។ នាងពុំមានប្រាក់មួយរៀលទេ តែនាងបានសុំគេចំនួន៥,០០០រៀល ប៉ុន្តែពេលចាក់សាំងរួច គេមិនដឹងថា នាងជិះចេញទៅណាទេ ។ ហើយរហូតមកដល់ពេលនេះ គាត់បានព្យាយាមសាកសួរដំណឹងគ្រប់ច្រកល្ហក រាប់ទាំងមិត្តភក្ដិដែលរៀនជាមួយនាងផង សួរនាំទាំងសមត្ថកិច្ចផង នៅតែគ្មានដំណឹងឡើយ ។ ម៉ូតូដែលនាងជិះយកទៅម៉ាកហុងដាឌ្រីមសេ១២៥ ពណ៏ខ្មៅ ពាក់ស្លាកលេខ បាត់ដំបង 1AL-6981។
លោក ហេង បារាំង អធិការស្រុកបាណន់ ក៏បានបញ្ជាក់ដែរថា មន្ត្រីជំនាញរបស់លោក និងមន្ត្រីការិយាល័យជំនាញ បាននិងកំពុងធ្វើការផ្សាយតាមបណ្ដាស្រុក និងតាមបណ្ដាប៉ុស្ដិ៍រដ្ឋបាលនានា ដើម្បីសុំជួយតាមឃ្លាំងមើលមុខសញ្ញា ដែលមានភិនភាគដូចខាងលើនេះ តែមិនទាន់មានតម្រុយនៅឡើយទេ រហូតមកដល់ពេលនេះ ៕
ចែករំលែកព័តមាននេះ