ទីក្រុងវ៉ាស៊ីនតោន៖ លោកដូណាល់ត្រាំបដិសេធរបាយការណ៍ដែលថាអុីរ៉ង់ទទួលបានរូបភាពពីផ្កាយរណបរបស់ចិនស្ដីពីមូលដ្ឋានយោធាអាមេរិកនៅប្រទេសហ្សកដង់ ហេតុដូច្នេះហើយបានជាអុីរ៉ង់វាយប្រហារមូលដ្ឋាននោះចំគោលដៅល្អកាលពីខែកក្កដា។ ការថ្លែងដូច្នេះបន្ទាប់ពីសារព័ត៌មានវ៉លស្ទ្រីតជើណល (Wall Street Journal) ដកស្រង់ប្រភពពីមន្ត្រីរដ្ឋាភិបាលអាមេរិកដែលស្នើសុំមិនបញ្ចេញឈ្មោះមកចុះផ្សាយពាក់ព័ន្ធនឹងការវាយប្រហារនោះ។
នៅពេលអ្នកសារព័ត៌មានសាកសួរថាតើលោកនឹងលើកយកបញ្ហានេះមកនិយាយនៅពេល ជួបគ្នាជាមួយលោកស៊ីជីនពីងនាពេលខាងមុខនេះដែរឬទេ? លោកត្រាំមិនបានឆ្លើយតបដោយត្រង់ៗទេ។ លោកថាចិន និងអាមេរិកធ្វើសកម្មភាពឈ្លបយកការណ៍ដូចគ្នា។ ពួកគេធ្វើសកម្មភាពដូចអ្វីដែលយើងកំពុងធ្វើដែរ។ នៅពេលពួកគេនិយាយថាចិនស៊ើបការណ៍ពីយើង ពួកគេនិយាយត្រូវហើយ ហើយយើងក៏ស៊ើបកាណ៍ពីចិនវិញដែរ។ តាមគម្រោង ថ្នាក់ដឹកនាំទាំង២នឹងជួបគ្នានៅអាមេរិកនាថ្ងៃទី២៤ ខែកញ្ញាខាងមុខនេះ។ ប៉ុន្តែប្រទេសចិនមិនទាន់ប្រកាសជាផ្លូវការថាការជួបគ្នានេះនឹងកើតឡើងនោះទេ។
លោកត្រាំកាលពីយប់មិញបញ្ជាក់ជំហរជាថ្មីថាលោកនៅតែមានទំនាក់ទំនងល្អជានិច្ចជាមួយលោកស៊ីជីនពីង។ លោកយល់ថាលោកស៊ីជីនពីងធ្វើអ្វីៗប្រកបដោយភាពសមហេតុផល ហើយយើងក៏ធ្វើអ្វីប្រកបដោយភាពសមហេតុផលដូចគ្នា។ សូមរំលឹកថាសារព័ត៌មានវ៉ល់ស្ទ្រីតជើណលចុះផ្សាយដោយយោងតាមសម្ដីរបស់មន្ត្រីរដ្ឋាភិបាលអាមេរិកថាស្ថាប័នរបស់ចិនបានលួចផ្ដល់រូបភាពមូលដ្ឋានទ័ពអាមេរិកទៅឱ្យអុីរ៉ង់។ ប៉ុន្តែមន្ត្រីទាំងនោះមិនបានចោទប្រកាន់ថារដ្ឋាភិបាលចិនមានជាប់ពាក់ព័ន្ធនឹងរឿងនេះឬយ៉ាងណាទេ។
បទអត្ថាធិប្បាយរបស់លោកត្រាំហាក់ដូចជាស្របគ្នានឹងកិច្ចខិតខំប្រឹងប្រែងរបស់រដ្ឋាភិបាលលោកនៅដំណាក់កាលចុងក្រោយនេះដើម្បីបន្ធូរបន្ថយភាពតានតឹងរវាងទីក្រុងវ៉ាស៊ីនតោន និងប៉េកាំងទោះបីអាមេរិកមិនសប្បាយចិត្តនឹងប្រទេសចិនមានទំនាក់ទំនងជិតស្និទ្ធជាមួយអុីរ៉ង់យ៉ាងណាក្ដី។ ចាប់តាំងពីសង្គ្រាមអុីរ៉ង់ផ្ទុះឡើងកាលពីចុងខែកុម្ភៈរហូតមកដល់ពេលនេះ ទាហានអាមេរិកយ៉ាងតិច១៨នាក់បានស្លាប់៕ ប្រភព៖ Reuters
ចែករំលែកព័តមាននេះ