ប្រទេសហ្វ៊ីលីពីន ៖ មនុស្ស៣នាក់ បានត្រូវស្លាប់ និង១៥នាក់ទៀត រងរបួសកាលពីថ្ងៃទី១៣ កញ្ញា ដោយសារការបាញ់ប្រហារមួយក្នុងតំបន់ស្វយ័ត BANGSAMORO ដែលប្រជាជនភាគច្រើនជាសាសនិកអ៊ិស្លាម ។ ការបាញ់ប្រហារនេះ កើតមានខណៈដែលតំបន់នោះត្រូវបោះឆ្នោតមូលដ្ឋាន នាថ្ងៃទី១៤ កញ្ញា ជាការបោះឆ្នោតលើកដំបូងក្រោយអំពើហិង្សាបំបែកខ្លួននិយមអស់ពេលច្រើនទសវត្សរ៍មក ។
ការបោះឆ្នោតនោះ គឺជាលទ្ធផលនៃដំណើរការសន្តិភាព ដែលចាប់ផ្ដើមពីដំណាច់ទសវត្សឆ្នាំ១៩៩០មក ហើយឈានទៅសម្រេចបានការបង្កើតតំបន់ស្វយ័តBANGSAMOR នាភាគខាងត្បូងហ្វ៊ីលីពីន ។ ប្រមុខប៉ូលិសក្រុងកូតាបាតូទីប្រជុំជនតំបន់នោះអះអាងថា ការបាញ់ប្រហារនោះ កើតមានមុនពាក់កណ្ដាលយប់ ពេលដែលបណ្ដាសមាជិកគណបក្សដែលប្រជែងគ្នា កើតមានការឈ្លោះគ្នាពីរឿងទាមទារបោះឆ្នោតមុន ។
ពីដំបូងនោះជាការឈ្លោះទាស់ទែងគ្នារបស់មនុស្ស២ក្រុម ដណ្ដើមបោះឆ្នោតមុន នៅសាលារៀនមួយដែលប្រើជាការិយាល័យបោះឆ្នោត ក្នុងទីក្រុងជាទីប្រជុំជនតំបន់នោះ។ ការឈ្លោះគ្នានោះនាំឲ្យមានការផ្អើលរត់ជាន់គ្នា និងក្លាយជាភាពរញ៉េរញ៉ៃហើយទីបំផុតក៏កើតមានការផ្ទុះអាវុធ ដែលបាញ់នៅកន្លែងមានមនុស្សច្រើនកុះករ ។
ប៉ូលិសបន្តថា បណ្ដាមនុស្សដែលទាក់ទិននឹងការបាញ់ប្រហារនេះ ជាអ្នកប្រជែងគ្នាក្នុងអតីតក្រុមឧទ្ទាមហ្វ៊ីលីពីនធំជាងគេគឹក្រុមរណសិរ្សអ៊ិស្លាមរំដោះម៉ូរ៉ូ ដែលប្រយុទ្ធអស់ពេលច្រើនសតវត្ស ដើម្បីដណ្ដើមស្វ័យភាពតំបន់នោះ ។ ឧទ្ទាមកម្មនេះបណ្ដាលឲ្យមនុស្សស្លាប់ដល់ទៅ១៥០.០០០នាក់ ៕
ចែករំលែកព័តមាននេះ