ទីក្រុងវ៉ាស៊ីនតោន៖ លោកដូណាល់ត្រាំអំពាវនាវឱ្យអ៊ុយក្រែនផ្អាកវាយប្រហាររោងចក្រចម្រាញ់ប្រេងរបស់រុស្ស៊ី និងហេដ្ឋារចនាសម្ព័ន្ធដទៃទៀតដែលប្រើប្រាស់សម្រាប់ការផលិត និងចែកចាយប្រេងម៉ាស៊ូត។ លោកអះអាងថាការវាយប្រហារនោះធ្វើឱ្យខ្វះខាតការផ្គត់ផ្គង់ទៅកាន់ទីផ្សារពិភពលោក។ លោកថ្លែងដូច្នេះបន្ទាប់ពីតម្លៃប្រេងម៉ាស៊ូតហក់ឡើងខ្ពស់បំផុតនៅលើទីផ្សារអាមេរិកកាលពីថ្ងៃសុក្រ។ ពោលគឺលក់ចេញលើសពី៦ដុល្លារក្នុងមួយហ្កាឡុង (៣,៧៨៥លីត្រ)។
អស់ជាច្រើនខែមកហើយ អ៊ុយក្រែនបន្តវាយប្រហារទីតាំងប្រេងឆៅ និងហ្គាសរបស់រុស្ស៊ីដោយប្រើប្រាស់ដ្រូនរយៈចម្ងាយឆ្ងាយ ដែលជាហេតុធ្វើឱ្យខ្វះខាតប្រេងទូទាំងប្រទេសរុស្ស៊ី និងបង្ខំឱ្យរុស្ស៊ីបិទការនាំចេញប្រេងម៉ាស៊ូតកាលពីខែកក្កដា។ ហេតុនេះធ្វើឱ្យការផ្គត់ផ្គត់ប្រេងទៅកាន់ទីផ្សារពិភពលោកដែលមានបញ្ហារអាក់រអួលស្រាប់ទៅហើយនោះរឹតតែជួបនឹងបញ្ហាថែមមួយកម្រិតទៀត។ សង្គ្រាមអ៊ីរ៉ង់ និងការបិទច្រកសមុទ្រហ័រម៉ូសក៏ធ្វើឱ្យការផ្គត់ផ្គង់ប្រេងមានបញ្ហាផងដែរ។
បញ្ហាប្រេងឡើងថ្លៃជាចំណុចស្លាប់រស់ដែលពលរដ្ឋអាមេរិកាំងក្នុងនាមជាម្ចាស់ឆ្នោតត្រូវយកចិត្តទុកដាក់ខ្ពស់នៅពេលពួកគេទម្លាក់សន្លឹកឆ្នោតនៅក្នុងការបោះឆ្នោតសភានាខែវិច្ឆិកាខាងមុខនេះ។ អ្នកសារព័ត៌មានបានសាកសួរលោកដូណាល់ត្រាំថាតើលោកបានជជែកគ្នាជាមួយលោកហ្សេឡិនស្គីដែរឬទេបន្ទាប់ពីលោកទើបតែសន្ទនាគ្នាតាមទូរស័ព្ទជាមួយលោកពូទីនកាលពីពេលថ្មីៗនេះ។ លោកត្រាំឆ្លើយតបដោយអំពាវនាវឱ្យលោកហ្សេឡិនស្គីផ្អាកវាយប្រហាររុស្ស៊ី។
លោកថាលោកហ្សេឡិនស្គីត្រូវតែធ្វើរឿងមួយគឺឈប់វាយប្រហារទីតាំងប្រេងរបស់រុស្ស៊ី។ លោកថ្លែងបន្តទៀតថាយើងបាននិយាយជាមួយលោកហ្សេឡិនស្គីអំពីបញ្ហានេះ។ មានគោលដៅជាច្រើនដែលត្រូវវាយប្រហារ។ សូមតែកុំវាយប្រហារប្រេងទៅបានហើយព្រោះវាបង្កបញ្ហាច្រើនណាស់ បង្កបញ្ហាសម្រាប់ពិភពលោកទាំងមូល។ យោងតាមរបាយការណ៍ដែលផ្សព្វផ្សាយកាលពីថ្ងៃសុក្រដោយទីភ្នាក់ងារថាមពលអន្តរជាតិ អត្រានាំចេញប្រេងម៉ាស៊ូត និងសាំងពីឈូងសមុទ្រពែក្សកាលពីខែសីហាមានចំនួនត្រឹមតែជាង២៥%ប៉ុណ្ណោះបើប្រៀបធៀបនឹងបរមាណនាំចេញកាលពីមុនពេលផ្ទុះសង្គ្រាមអ៊ីរ៉ង់៕ ប្រភព៖ AP
ចែករំលែកព័តមាននេះ