សំណុំរឿងលោកមេភូមិម្នាក់ស្លា.ប់ក្នុងទឹកស្រះហើយបាត់ម៉ូតូ តើជាអំពើ«ប្ល.ន់.ស.ម្លា.ប់» ឬបែបណា ?
- បាត់ដំបង
ខេត្តបាត់ដំបង ៖ សមត្ថកិច្ចហាក់មិនទាន់ធ្វើការសន្និដ្ឋានឱ្យច្បាស់លាស់នៅឡើយទេ ចំពោះការស្លាប់របស់លោកមេភូមិម្នាក់ដែលគេប្រទះឃើញនៅក្នុងទឹកស្រះមួយកន្លែងកាលពីចុងសប្ដាហ៍មុននៅក្នុងភូមិដាក់សសរ សង្កាត់អូរម៉ាល់ ក្រុងបាត់ដំបង ខណៈម៉ូតូដែលគាត់ជិះក៏ត្រូវបាត់ពីកន្លែងកើតហេតុដែរ ។
លោក ឈឿង គឹមសុង ស្នងការរងទទូលផែនព្រហ្មទណ្ឌបានប្រាប់កោះសន្តិភាពនៅព្រឹកថ្ងៃទី១៤ កញ្ញា នេះថា សាកសពលោកមេភូមិឈ្មោះ ហេង វណ្ណា ត្រូវបានគេប្រទះឃើញស្លាប់នៅក្នុងទឹកស្រះមួយកន្លែងនៅកណ្ដាលវាលស្រែ ប៉ុន្តែម៉ូតូរបស់គាត់បានបាត់ពីកន្លែងកើតហេតុ ហើយរហូតមកទល់ពេលនេះ សមត្ថកិច្ចបាននិងកំពុងធ្វើការស៊ើបអង្កេតនៅឡើយ ។
លោកបាននិយាយថា បើយោងលើមន្ត្រីបច្ចេកទេសដែលបានចុះពិនិត្យសាកសពលោកមេភូមិ ហាក់ពុំមានស្លាកស្នាមដែលពាក់ព័ន្ធនឹងអំពើហិង្សាទេ តែមានស្លាកស្នាមត្រីស៊ីលើផ្ទៃមុខបន្តិចបន្តួច ។ ប៉ុន្តែអ្វីដែលធ្វើឲ្យមានមន្ទិលសង្ស័យអាចជាបទល្មើសនៅត្រង់ថា សាកសពលោកមេភូមិនៅក្នុងទឹក ហើយម៉ូតូរបស់គាត់បានបាត់ ។
លោក ហេង វណ្ណា (ជនរងគ្រោះ) មានតួនាទីជាមេភូមិដាក់សសរ សង្កាត់អូរម៉ាល់ បានបាត់ខ្លួនពីផ្ទះនៅម៉ោងប្រហែល៦ព្រឹកថ្ងៃទី១២ កញ្ញា ដោយជិះម៉ូតូមួយគ្រឿងប្រភេទ«សង់កូរ៉េ» ។ បើតាមក្រុមគ្រួសារគាត់បានប្រាប់ថា នៅព្រឹកកើតហេតុ គាត់បានពិសារកាហ្វេមួយកញ្ចប់ មុនពេលជិះម៉ូតូកញ្ចាស់របស់គាត់ចេញពីផ្ទះ ។
មុនចាកចេញ គាត់បានប្រាប់ថា ទៅមើលត្រីដែលគាត់ដាក់ «ដៃ» នៅក្នុងស្រះនៅឯវាលស្រែ(ចំណុចកើតហេតុ) ។ ចាប់តាំងពីជិះម៉ូតូចេញទៅ គាត់ក៏បាត់ដំណឹងរហូត លុះនៅវេលាថ្ងៃត្រង់មិនឃើញគាត់ត្រឡប់មកផ្ទះ កូនរបស់គាត់ក៏ជិះម៉ូតូទៅតាមរកនៅគោលដៅដែលគាត់ទៅមើលត្រី ។
ពេលទៅដល់គោលដៅ ហើយក៏រកមិនឃើញជនរងគ្រោះទៀត រហូតដល់ម៉ោង១ និង៣០នាទីរសៀលថ្ងៃដដែល ទើបគេប្រទះឃើញស្បែកជើងនៅក្បែរមាត់ស្រះ ហើយក្រឡេកមើលទៅក្នុងស្រះទឹក ដែលមានជម្រៅប្រហែលត្រឹមជង្គង់ ក៏ប្រទះឃើញសាកសពគាត់ ប៉ុន្តែមិនឃើញម៉ូតូដែលគាត់ជិះនៅទីនោះទេ ទើបមានការភ្ញាក់ផ្អើលឆោឡោឡើង និងបានផ្ដល់ព័ត៌មានទៅសមត្ថកិច្ចភ្លាមៗដែរ ។
ជុំវិញករណីនេះ បើពិនិត្យស្ថានភាពជាក់ស្ដែងនៅកន្លែងកើតហេតុ មហាជនភាគច្រើនសុទ្ធតែបានធ្វើការសន្និដ្ឋានថា វាជាអំពើ «ប្លន់សម្លាប់»លោកមេភូមិ ។ ការសន្និដ្ឋានបែបនេះ ដោយយោងលើជនរងគ្រោះ«ស្លាប់នៅក្នុងទឹក» ហើយម៉ូតូរបស់គាត់បានបាត់ពីចំណុចកើតហេតុ បន្សល់ទុកតែស្បែកជើងមួយសម្រាប់ក្បែរមាត់ស្រះ ។ អ្នកភូមិដាក់សសរដែលបានទៅមើលសាកសពលោកមេភូមិ ពួកគេម្នាក់ៗសុទ្ធតែដាក់ការសង្ស័យថា ជាអំពើ «ប្លន់សម្លាប់» ។
ប៉ុន្តែសមត្ថកិច្ចហាក់មិនបានធ្វើការសន្និដ្ឋានដូចការលើកឡើងរបស់អ្នកភូមិទេ ។ សមត្ថកិច្ចបានផ្ដោតទៅលើជំងឺរបស់ជនរងគ្រោះទៅវិញ ដោយយោងលើសាកសពជនរងគ្រោះ ពុំមានស្លាកស្នាម ។ បានន័យថា បើវាជាអំពើ «ប្លន់សម្លាប់» ជនរងគ្រោះអាចមានស្លាកស្នាម ប៉ុន្តែនៅលើសាកសពពុំមានស្លាកស្លាមបន្សល់ទុកទេ ។ ប៉ុន្តែអ្វីដែលមហាជនចោទជាសំណួរថា បើមិនមែនជាករណីប្លន់សម្លាប់ទេ តើម៉ូតូជនរងគ្រោះបាត់ទៅណា ? (នេះជាសំណួរដែលគ្មានចម្លើយ ឬពុំមានអ្នកឆ្លើយ) ។
ប៉ុន្តែយ៉ាងណាក្ដី នៅក្នុងសំណុំរឿងនេះ បើតាមលោក ឈឿង គឹមសុង ស្នងការរងទទូលផែនព្រហ្មទណ្ឌបានបញ្ជាក់ថា ពិតមែនតែយើងមិនទាន់វាយតម្លៃបែបណា ជុំវិញការស្លាប់របស់ជនរងគ្រោះ ប៉ុន្តែលោកកំពុងដឹកនាំមន្ត្រីជំនាញបន្តធ្វើការស្រាវជ្រាវនៅឡើយ ៕
ចែករំលែកព័តមាននេះ