បុរសម្នាក់ចេញពីកម្មវិធីជុំមិត្តភក្តិជិះម៉ូតូធ្លាក់ជង្ហុកការដ្ឋានជួសជុលផ្លូវ ដួ.លបោ.កក្បាលជង់ដែកសរសៃ យ៉ាងរន្ធ.ត់
- ភ្នំពេញ
រាជធានីភ្នំពេញ ៖ បុរសម្នាក់ទើបចេញពីកម្មវិធីជួបជុំមិត្តភក្ដិ បានជិះម៉ូតូជ្រុលធ្លាក់ជង្ហុកការដ្ឋានជួសជុលផ្លូវ បណ្ដាលឲ្យដួលបោកក្បាលជង់ដែកចម្រឹងធ្លាយខួរស្លាប់យ៉ាងអាណោចអាធ័ម នៅវេលាម៉ោង១០និង៣០នាទីយប់ ថ្ងៃទី១៣ ខែកញ្ញា ឆ្នាំ២០២៦ នៅចំណុចក្រោយវត្តភ្នៀតសិម្ពលី ផ្លូវបេតុង ភូមិអង្គជ័យ សង្កាត់ស្នោរ ខណ្ឌកំបូល រាជធានីភ្នំពេញ ។
ជនរងគ្រោះមានឈ្មោះជួន សុជាតិ ភេទប្រុស អាយុ៣៥ឆ្នាំ មុខរបរលក់ដូរ មានទីលំនៅភូមិបឹងគ្រើល សង្កាត់ឪឡោក ខណ្ឌកំបូល ។
ប្រភពព័ត៌មានបានអោយដឹងថា មុនពេលកើតហេតុ គេបានឃើញបុរសរងគ្រោះជិះម៉ូតូមួយគ្រឿងម៉ាកស៊ុយហ៊ុយគីស្មាស ពណ៌ខ្មៅ ពាក់ស្លាកលេខ ភ្នំពេញ 1FH 1906 ធ្វើដំណើរតាមបណ្ដោយផ្លូវបេតុងក្រោយវត្តភ្នៀត ក្នុងទិសដៅពីកើតទៅលិច ក្នុងល្បឿនលឿន លុះមកដល់ចំណុចកើតហេតុ មិនដឹងថាអ្នកបើកមើលផ្លូវមិនច្បាស់ឬយ៉ាងណា ទើបធ្វើអោយម៉ូតូជ្រុលធ្លាក់ជង្ហុកការដ្ឋានជួសជុលផ្លូវ ដួលបោកក្បាលជង់នឹងចម្រឹងដែកសរសៃធ្លាយខួរស្លាប់ដេកក្រោមម៉ូតូយ៉ាងអាណោចអាធ័ម ។
បន្តិចក្រោយមក ក៏មានសមត្ថកិច្ចមូលដ្ឋានបានចុះមកកន្លែងកើតហេតុ និងបានទាក់ទងសាច់ញាតិដែលនៅជិតកន្លែងកើតហេតុ អោយមកទទួលយកសពទៅធ្វើបុណ្យតាមប្រពៃណី ។
តាមប្រភពពីសាច់ញាតិ បានអោយដឹងថា ជនរងគ្រោះទើបចេញពីកម្មវិធីជួបជុំមិត្តភក្ដិ ក្នុងគោលបំណងត្រឡប់ទៅផ្ទះវិញក៍ជួបគ្រោះថ្នាក់ចរាចរណ៍បែបនេះតែម្តង។
ក្រោយកើតហេតុ សមត្ថកិច្ចបានធ្វើលិខិតប្រគល់សពអោយសាច់ញាតិយកទៅធ្វើបុណ្យតាមប្រពៃណី ចំណែកម៉ូតូត្រូវបានសមត្ថកិច្ចជំនាញយកទៅរក្សាទុកនៅអធិការដ្ឋាននគរបាលខណ្ឌកំបូល រង់ចាំប្រគល់អោយសាច់ញាតិវិញ ៕
ចែករំលែកព័តមាននេះ