ប៉ៃលិន៖ ឱ្យពេលរហូតដល់ថ្ងៃទី៣០ កញ្ញា កាស៊ីណូទាំង៨ ត្រូវឈប់ធ្វើសកម្មភាពភ្នាល់អនឡាញ
- ប៉ៃលិន
ខេត្តប៉ៃលិន ៖ រហូតមកដល់ពេលនេះ លោកជំទាវបណ្ឌិត បាន ស្រីមុំ អភិបាលខេត្តប៉ៃលិន នារសៀលថ្ងៃទី១០ ខែកញ្ញា ឆ្នាំ២០២៦ បានអញ្ជើញដឹកនាំកិច្ចប្រជុំបន្ទាន់មួយ ដើម្បីដាក់បទបញ្ជា និងណែនាំផ្ទាល់ដល់ម្ចាស់ ឬតំណាងក្រុមហ៊ុនកាស៊ីណូចំនួន០៨ទីតាំង ស្ថិតក្បែរច្រកទ្វារអន្តរជាតិព្រំ ក្នុងឃុំស្ទឹងកាច់ ស្រុកសាលាក្រៅ ខេត្តប៉ៃលិន ឱ្យបញ្ឈប់រាល់សកម្មភាពភ្នាល់តាមប្រព័ន្ធអនឡាញ (Online Betting) ត្រឹមដំណាច់ខែកញ្ញានេះ ជាកំហិតតែម្តង ។
នៅក្នុងឱកាសនោះ លោកជំទាវបណ្ឌិត បាន ស្រីមុំ បានគូសបញ្ជាក់ផងដែរថា ការលុបបំបាត់ និងបង្ក្រាបរាល់បទល្មើសល្បែងស៊ីសងខុសច្បាប់ គ្រប់រូបភាពទាំងអស់ ជាពិសេសល្បែងភ្នាល់តាមប្រព័ន្ធ អ៊ីនធើរណេត / អនឡាញ (Online Betting) ដែលជាប្រភពបង្កឱ្យមានផលប៉ះពាល់យ៉ាងធ្ងន់ធ្ងរដល់សន្តិសុខ សណ្តាប់ធ្នាប់សង្គម និងជីវភាព រស់នៅរបស់ប្រជាពលរដ្ឋ ។
ម្យ៉ាងវិញទៀត ដើម្បីធានាបាននូវប្រសិទ្ធភាពនៃការអនុវត្តច្បាប់ លោកជំទាវបណ្ឌិតអភិបាលខេត្តបានកំណត់កាលបរិច្ឆេទដាក់ឱសានវាទចុងក្រោយ ត្រឹមថ្ងៃទី៣០ ខែកញ្ញា ឆ្នាំ២០២៦ ហើយចាប់ពីថ្ងៃទី០១ ខែតុលា ឆ្នាំ២០២៦ តទៅ អាជ្ញាធរមានសមត្ថកិច្ចនឹងចុះត្រួតពិនិត្យ ដើម្បីអនុវត្តវិធានការច្បាប់ដោយផ្ទាល់ នៅតាមទីតាំងកាស៊ីណូទាំងនោះ ដោយគ្មានការលើកលែង ឬយោគយល់អ្វីឡើយ គឺគ្រប់កាស៊ីណូទាំងអស់ក្នុងខេត្តត្រូវតែគោរព និងអនុវត្តតាមការកំណត់ពេលវេលានេះ ដោយគ្មានការលើកលែងនោះឡើយ ហើយកាស៊ីណូទាំងអស់ ត្រូវបានអនុញ្ញាតឱ្យមានតែអតិថិជន ដែលមកលេងដោយផ្ទាល់ដល់ទីតាំងប៉ុណ្ណោះ ។
លោកជំទាវបណ្ឌិត បាន ស្រីមុំ ក៏បានអំពាវនាវដល់អាជ្ញាធរមូលដ្ឋាន និងកងកម្លាំងសមត្ថកិច្ចគ្រប់លំដាប់ថ្នាក់ ត្រូវអនុវត្តបទបញ្ជារបស់រាជរដ្ឋាភិបាលឱ្យមានប្រសិទ្ធភាពខ្ពស់បំផុត ដោយបន្តតាមដាន ស្រាវជ្រាវ និងក្តាប់ ព័ត៌មាន ឱ្យបានជាប់ជាប្រចាំ ដើម្បីធានាបានថា បន្ទាប់ពីដាច់ខែកញ្ញានេះតទៅ ខេត្តប៉ៃលិននឹងក្លាយជាខេត្តគំរូមួយ ដែលគ្មានសកម្មភាព ល្បែងស៊ីសងតាមអនឡាញ(Online Betting) ឡើយ។ ចំណែកប្រជាពលរដ្ឋក៏គាំទ្រចំពោះចំណាត់ការនេះ ដើម្បីកុំឱ្យមានបញ្ហាកើតឡើងក្នុងទឹកដីខេត្តប៉ៃលិន ៕
ចែករំលែកព័តមាននេះ