អ៉ីស្រាអែល-លីបង់ ៖ អ៉ីស្រាអែល កាលពីថ្ងៃទី១០ កញ្ញា បានប្រើគ្រឿងផ្ទុះកម្ទេចទីតាំងក្រោមដីនានារបស់ក្រុមហេសប៊ុលឡាហ៍នៅភាគខាងត្បូងលីបង់ បណ្ដាលឲ្យមានការញ័ររញ្ជួយដីខ្លាំងគួរសមមួយកំណត់ឃើញដោយបណ្ដាទីភ្នាក់ងារត្រួតពិនិត្យការរញ្ជួយដី ។

នៅតំបន់ភាគខាងត្បូងលីបង់នោះ គេឮស្នូរផ្ទុះខ្លាំងនានា ហើយវីដេអូមួយផ្សាយដោយរដ្ឋមន្ត្រីការពារប្រទេសអ៉ីស្រាអែលលោកអ៉ីស្រាអែលកាត គេឃើញដុំភ្លើងដ៏ធំជះទៅលើអាកាសនាពេលយប់ក្រហមស្រាល ។ ការផ្ទុះនោះ កើតមានប៉ុន្មានថ្ងៃបន្ទាប់ពីអាជ្ញាធរអ៉ីស្រាអែលអះអាងពីការដណ្ដើមត្រួតត្រាតំបន់ភ្នំALI TAHER ដោយអះអាងថា ពួកហេសប៊ុលឡាហ៍ស្និទ្ធអ៉ីរ៉ង់ បានជីកក្នុងតំបន់នោះនូវផ្លូវរូងក្រោមដីជាច្រើន ដែលអាចវាយប្រហារអ៉ីស្រាអែលចេញពីតំបន់ភ្នំនោះ។

កងទ័ពអ៉ីស្រាអែលដែលកាន់កាប់ផ្នែកមួយនៃភាគខាងត្បូងលីបង់ កន្លែងដែលនាយករដ្ឋមន្ត្រីលោកបេនចាមីននេតាន់យ៉ាហ៊ូ ចង់បង្កើតតំបន់សន្តិសុខមួយដើម្បីរារាំងរាល់ការវាយប្រហារប្រឆាំងភាគខាងជើងប្រទេសលោក ។ ក្នុងសេចក្ដីប្រកាសមួយលោកនេតាន់យ៉ាហ៊ូ និងលោកអ៉ីស្រាអែលកាតគូសបញ្ជាក់ថា កងទ័ពអ៉ីស្រាអែលពេលនេះ បានកម្ទេចបណ្ដាហេដ្ឋារចនាសម្ព័ន្ធក្រោមដីរបស់ហេសប៊ុលឡាហ៍នៅតំបន់សេមាន់ALI TAHER ដែលបែបនេះជាការបង្ហើយការបង្កើតតំបន់សន្តិសុខមួយនៅភាគខាងត្បូងលីបង់ ។

ការដាក់រំសេវផ្ទុះះដ៏ខ្លាំងកម្ទេចរូងក្រោមដីទាំងនេះ បណ្ដាលឲ្យមានការញ័ររង្គើរដែលតាមវិទ្យាស្ថានភូគុម្ភសាស្ត្រអាមេរិកUSGS ថា ការរញ្ជយនោះមានកម្លាំងដល់៤,១រីស្ទ័រ ដែលកើតមាននាវេលាម៉ោង២១ និង០៨នាទីម៉ោងក្នុងស្រុក នៅតំបន់ណាបាទី
យេស្ថិតនៅតំបន់សេមាន់ALI TAHER។ ការញ័ររង្គើរនោះស្មើនឹងការរញ្ជយដីតូចមួយ នាំឲ្យមានការជ្រួលច្របល់ដល់ប្រជាជននៅភាគខាងត្បូងលីបង់ ។ ការញ័ររង្កើរមានរហូតដល់ទីក្រុងសៃអ៉ីដាស្ថិតនៅចម្ងាយប្រមាណជា៤០គីឡូម៉ែត្រពីក្រុងបេរូត។
ក្នុងបណ្ដាទីតាំងក្រោមដីនោះមានទីបញ្ជាការដ្ឋានយោធារបស់ហេសប៊ុលឡាហ៍ មានកន្លែងស្តុកអាវុធនិងគ្រាប់រំសេវហើយតំបន់នោះមានសង្កាត់ប្រជាជនរស់នៅនានា ដែលអាចឲ្យក្រុមហេសប៊ុលឡាហ៍គ្រប់គ្រងបណ្ដាប្រតិបត្តិការប្រយុទ្ធនិងស្ថិតនៅក្រោមដីបានយូរ។ នេះបើតាមការអះអាងរបស់កងទ័ពអ៉ីស្រាអែល ក្នុងសេចក្ដីប្រកាសមួយ ។

តាមអ្នកទទួលខុសត្រូវយោធាអ៉ីស្រាអែលម្នាក់ថា បណ្ដាសមាជិកក្រុមហេសប៊ុលឡាហ៍បានជីកកសាងផ្លូវថ្នល់ក្រោមដីដល់ទៅ៨ដើម្បីធ្វើចរាចរណ៍ដោយមានសន្តិសុខក្រោមតំបន់សេមាន់នោះ ហើយដ្រូនផ្ទុកគ្រឿងផ្ទុះច្រើនសិបគ្រឿងនិងគ្រាប់មីនច្រើនរយគ្រាប់ ត្រូវបានកងទ័ពអ៉ីស្រាអែលរឹបអូសយកបាន ៕
ចែករំលែកព័តមាននេះ