ប្រទេសអ៉ីរ៉ង់ ៖ អង្គការសិទ្ធិមនុស្ស HUMAIN RIGHTS WATCH និង CENTRE ABDORRAHMAN BOROUMAND ដើម្បីសិទ្ធិមនុស្សនៅអ៉ីរ៉ង់ ប្រកាសនាថ្ងៃទី១០ កញ្ញា ថា អាជ្ញាធរអ៉ីរ៉ង់បានប្រហារជីវិតបាតុករ និងអ្នកប្រឆាំងនយោបាយដល់៥៩នាក់ រវាងថ្ងៃទី១៨ មីនា និងដំណាច់ខែសីហា ។ អង្គការទាំងនេះ ចាត់ទុកការប្រហារជីវិតនោះថា ខុសច្បាប់និងបំពានច្បាប់អន្តរជាតិទាក់ទិននឹងសិទ្ធិមនុស្ស ។
រយៈពេលតែ៥ខែប៉ុណ្ណោះ គឹរវាងថ្ងៃទី១៨មីនា និងដំណាច់ខែសីហា ២០២៦ អាជ្ញាធរអ៉ីរ៉ង់ប្រកាសពីការប្រហារជីវិតមនុស្ស៥៩នាក់ ក្នុងនោះ ២៩នាក់ទាក់ទិននឹងបាតុកម្មនាពេលថ្មីៗនេះ ក្នុងខែធ្នូ ឆ្នាំ២០២៥ និងខែ មករា ឆ្នាំ២០២៦។ នេះជាការកើនឡើងយ៉ាងខ្ពស់នៃចំនួនមនុស្សត្រូវប្រហារជីវិត ទាក់ទិនរឿងនយោបាយពេលដែលចំនួនមនុស្សត្រូវប្រហារជីវិតមានការកើនឡើងខ្លាំងនៅអ៉ីរ៉ង់ ។
មជ្ឈមណ្ឌលCENTRE ABDORRAHMAN BOROUMAND កត់សម្គាល់ឃើញការប្រហារជីវិតមនុស្សយ៉ាងតិច២១១៣នាក់ នៅអ៉ីរ៉ង់ក្នុងឆ្នាំ២០២៥ ។ បាតុករច្រើននាក់ដែលត្រូវប្រហារជីវិតរយៈពេល៥ខែកន្លងទៅនេះនៅអ៉ីរ៉ង់ ជាយុវជនមានអាយុ១៨ និង១៩ឆ្នាំ ។ មនុស្សច្រើនសិបនាក់ទៀត អាចត្រូវប្រហារជីវិតក្នុងពេលឆាប់ៗ ។
នៅអ៉ីរ៉ង់រយៈពេលប៉ុន្មានសប្ដាហ៍ចុងក្រោយនេះ ដោយសារវិបត្តិសេដ្ឋកិច្ចទំនិញកាន់តែឡើងថ្លៃខ្ពស់មកពីសង្គ្រាម ទណ្ឌកម្មនិងការបិទខ្ទប់សេដ្ឋកិច្ចពិសេស ដោយអាមេរិក ពលរដ្ឋអ៉ីរ៉ង់ដែលមានទាំងបុគ្កលិកសុខាភិបាល គ្រូបង្រៀន និយោជិតនិងនិស្សិត បាននាំគ្នាធ្វើបាតុកម្មនៅក្នុងប្រទេស។
នាថ្ងៃទី៩ កញ្ញា សហជីពសាស្ត្រាចារ្យសាកលវិទ្យាល័យ ថ្លែងក្នុងលិខិតចំហមួយថា ប្រសិនបើរដ្ឋាភិបាលមិនប្រកាន់ពាក្យសន្យាខាងសេដ្ឋកិច្ច ហើយមិនបង្កើនប្រាក់បៀវត្សដល់សាស្ត្រាចារ្យទេ នោះបណ្ដាសាស្ត្រាចារ្យនឹងមិនមកបង្រៀនឡើយនាឆ្នាំសិក្សាថ្មីរបស់សាកលទ្យាល័យ ៕

ចែករំលែកព័តមាននេះ